SEMUEL SUSULAK-KA ESAN-NA 29 - Susula Malalaok Hehelu Palak Ma Hehelu Beuk

Hataholi Filistin-nala ladenu falik Dauk

¹ Hataholi Filistin-nala lakabubua basa solda'dun-nala lala'en-na nai Afek, ma hataholi Israel-la ofu deka loo oemata manai Bafak Yizreel-la.

² Mane Filistin ka limakala, ala tutulumatak lakadadalak, loo esa-esak solda'dun, fo solda'du dalak esa soona, hataholi natun esa ma lifun esa. Dauk no solda'dun-nala, sama-sama loo Mane Akhis-sa, lakadadalak lai dea.

³ Hataholi Filistin-nala, malanga solda'du matuainan-nala litas, boema latane lae, “Te hataholi Ibrani sila-la, ala tao beek nai ia?” Boema Akhis nataa nae, “Dauk nde ia, ana da'di hai Mane Saul fo neme Israel mai, hataholi mana'a ngga'din so. Ana leo dodooana faa no au so. Mulai neme ana mai leo au mai, losa faik ia, au beita hapun, ana tao salak fa.”

⁴ Tehu malanga solda'du matuaina Filistin sila-la, lamanasa Akhis, de lafa'dan lae, “Madenu hataholi ndia, fali ne'un leo o fen kota neu. Ana ta bole natee-nata'ti sama-sama no ita fa; boso nalosak natee-natatik-ka makee boema, nalelesi ita. Ade, ia ta nde da'di fai loak malole hiik ba'eneun, fo ana tao namaloa ndia manen-na dalen-na, no enok, ana taonisa ita solda'dun-nala hetu do?

⁵ Dauk nde ndia hetu? Soaneu Dauk ndia de, makahulun-na, basa inak-kala foti-longe ma lakamee lae leo ia, ‘Saul taonisa musu lifu-lifuk-kala, tehu Dauk taonisa kefi-kefin.’ ”

⁶ Boema, Akhis naloo Dauk, de nafa'dan nae, “Au amahele no Manetualain fo maso'dak-ka na'den-na, ae o lilineka neu au. Au amahoko, metema nai natee-natatik ia dalek, o nai au boboang-nga. Nana, mulai neme o mai leo au mai, losa hatematak ia, au ta hapu o salam-ma fa. Tehu manek fe'ek sila-la, ta hii o fa.

⁷ Hu ndia de, fali mu'um-ma no so'da-molek, ma boso tao hata esa, ana tao nafo'a sila nasa-melun.”

⁸ Boema, Dauk nataa nae, “Atam-ma tao salak beek-ka so, Ama Manek? Metema, sama leo Ama Manek halan-na, fo Ama Manek ta hapu atam-ma sala hata esa boen, neme atam-ma mulai nalalau-naoono Ama Manek, losa fai ia soona, tao le'e de, ta fe atam-ma loak, fo natee-nta'ti la'ban Ama Manek musun-nala fa?”

⁹ Boema, Akhis nataa nae, “O bubuluk mae au amahele o lilinekam, sama leo Manetualain ata nusa so'dan-na. Tehu basa malanga solda'du matuaina sila-la, laketu basa lae, o ta bole tunga matee-mata'ti sama-sama moo ami fa.

¹⁰ Hu ndia de Dauk, balahaa soona, basa emi fo manala'o ela Saul, de emi mai leo au mai, muse fo'a fafaianak, fo le'do-a tii soona, la'o no lai-laik leona.”

¹¹ Hu ndia de, balahaa fafaianak boema, Dauk no solda'dun-nala fali le'us leo nusa Filistin-na leu, te solda'du Filistin sila-la, leu leo Yizreel leu.