SEMUEL SUSULAK-KA ESAN-NA 28 - Susula Malalaok Hehelu Palak Ma Hehelu Beuk

¹ Nai lelek ndia, hataholi Filistin-nala hoka la'iesak solda'dun-nala, fo leu sapu-la Israel, de Akhis nafa'da Dauk nae, “Tao leo bee-o, o ma o solda'dum-mala bubuluk, mae emi muse matee-mata'ti mook au.”

² Boema Dauk nataa nae, “Tao leo bee-o, see leondiak, de mahani te, neukose Ama Manek nita matan, hata fo Ama Manek atan ia, taon.” Boema, Akhis nae, “Hei, au so'u o da'di au manamanea maheleng nakandoo.”

Saul noke natutu'duk neme hataholi manamaloo nalelak samanek-kala mai

³ Mate basa Semuel so, de Israel-lala'en-na kii-makaleleun, basa boema, latoin nai Rama, fo Semuel kotan-na. Teuk de'u bee maneuk-ka, Saul usi heni basa manasiula-tongonok-kala, ma hataholi manamaloo nalelak samanek-kala lema Israel mai.

⁴ Boema, nai lelek solda'du Filistin-nala lakabubua, de ala ofu deka loo kota Sunem-ma boema, Saul boeo, naloo nakabubua hataholi Israel-la, de ala ofu leme Letek Gilboa.

⁵ Lelek Saul nita solda'du Filistin sila-la boema, ana bii nanseli.

⁶ Boema, noke natutu'duk neme Manetualain mai, tehu Manetualain ta nataa fa, nau tunga me'i-afek do tunga batu Urim ma Tumim-ma, do tunga nabi-la boe.

⁷ Hu ndia de, Saul kokolak no basa hataholi mana'a ngga'din-nala nae, “Sanga-ma, ina manamaloo nalelak samanek esa, fo au sanga u oken natutu'duk.” Boema, lataa lae, “Hapu hataholi malelak leondiak-ka, nai En-Dor.”

⁸ Boema, Saul pake-nggao sama leo laun-na papake-ngganggaon, fo ela hataholi boso nalelak-kana. Touk dua tungan, de ala la'o, de le'odae boema, ala losa ina malelak ndia uman. Boema Saul nafa'da ina malelak ndia nae, “Maloo hataholi fo au sanga afa'da na'den-na ia, samanen-na, fo moken nafa'da memak, hata fo neukose ana da'di.”

⁹ Boema, inak ndia nataa nae, “Tao leo bee-o, Tuan boeo bubuluk mae, Mane Saul-la usiheni basa manasiula-tongonok-kala, ma manamaloo nalelak samanek-kala neme Israel mai so. Tao le'e de, Tuan so'ba tao soe au, nalosa ala taolisa au?”

¹⁰ Boema, Saul soo nae, “No Manetualain fo maso'dak-ka na'den-na, au aheluk ae neukose ala ta taolisa o fa, hu kane o tao tataos ia.”

¹¹ Inak ndia natane nae, “Au muse aloo fe Tuan, see samanen-na?” Boema Saul nataa nae, maloo fe au, “Semuel samanen-na.”

¹² Lelek inak ndia nita Semuel boema, ana nggasi ma nafa'da Saul nae, “Tao le'e de, Tuan ke'di-ndiu atam-ma? Au Tuang fo Mane Saul-la, lupa-aon nde ia!”

¹³ Manek-ka nataa nae, “Boso bii! Ka'da mafa'da, o mita beek!” Inak ndia nataa nae, “Atam-ma nita samanek-ka to'da mai neme daebafak-ka buin-na mai.”

¹⁴ Saul natane nae, “Lupa-aon leo beek?” Boema, Inak ndia nataa nae, “Toulasik esa. Ana to'da mai, no ana pake ba'du manalu.” Boema, Saul bubuluk nae Semuel nde ndia, boema ana sene-do'ok, fo ana fe ha'da-holomata neun.

¹⁵ Basa ndia boema, Semuel nafa'da Saul nae, “Tao le'e de, o taom-ma au daleng-nga ta tesa-tama fa? Tao le'e de, o maloo falik au?” Boema, Saul nataa nae, “Au apangamak anseli, nanahu hataholi Filistin-nala sapu-la au, tehu Manetualain la'oela au so. Ana ta nataa au so'on, nau tunga basa nabi-la, do tunga me'i-afek boe. Hu ndia de, au dokodoe neu Ama, fo ela Ama nafa'da au muse tao beek.”

¹⁶ Boema, Semuel nae, “Sosoak hata, o maloo au, te Manetualain la'oela o, ma Ana da'di o musu-noom so?

¹⁷ Manetualain Manakoasa tao-no'i basan neu o so, sama leo hata fo nafa'dan tunga au. Manetualain ho'in-na nusa Israel-la neme o mai, de Ana fen neu Dauk so.

¹⁸ O lena-la'ban basa Manetualain paletan-na so, ma o ta nau tao mamopo-mamate hataholi Amalek-kala loo sila hata-heton lala'en-na fa. Hu kande ndia de, besak ia, Manetualain tao o leondiak.

¹⁹ Neukose Anafe'o-ma hataholi Israel-la leo hataholi Filistin nala neu. Balahaa soona, o moo o anamanem-mala, neukose makabubua moo au; Nakalenak bai, neukose Manetualain fe solda'du Israel-la lala'en-na, leo hataholi Filistin-nala neu boe.”

²⁰ Nai hatematak ndia boe, Saul bala neu dae lain, sama leo ta'tas-sa ho'in, nanahu ana nggenge, nai lelek namanene Semuel hala-kokolan sila-la. Bai te, aon-na male-tale, nana ta na'a-ninu hata esa boen, lele'dok esa ma le'odaek esa.

²¹ Boema, ina malelak ndia neu deka no Saul, de nitan napangamak nanseli; hu ndia de, inak ndia nafa'dan nae, “Tuan, atam-ma nggali heni basa atam-ma tatao-nono'in, ka'da soaneu tao atetu Tuan nonoken-na so.

²² Da'di, ela leo been-na, Tuan boeo, tao matetu atam-ma dokodoen-na; mu'a atam-ma sadia-na nana'a-nininuk-kala faa anak, fo ela Tuan hapu leo-la'ok nakandoo Tuan leleo-lala'on.”

²³ Saul ta nau fa, de nafa'da nae, ta nau na'a fa. Tehu basa hataholi mana'a ngga'din-nala lakaseti lahelen de ana tunga. Boema, ana fo'a neme dae lain mai, de nangatuuk neu loanak lain.

²⁴ No lai-laik, inak ndia ta'ti ndia sapiana maaon esa, ma ana ho'i ha'desopuk de ana kame, boema ana tao loti ta pake laluteik fa.

²⁵ Basa ndia boema, ana sadia fe Saul no hataholi mana'a nga'din-nala nana-nininuk sila-la, de la'a. Basa boema, ala la'o nai le'odaek ndia dalen-na boe.