SEMUEL SUSULAK-KA ESAN-NA 27 - Susula Malalaok Hehelu Palak Ma Hehelu Beuk

Dauk leo nai hataholi Filistin-nala tala'da

¹ Dauk dodoo nai dalen dale nae, “Leomae leo beek boe, nai faik esa te, Saul taonisa au. Da'di, ta hapu eno fe'ek so'on, ba'eneu au, ka'da au alai leo nusa Filistin-na u. No enok ndia, neukose Saul ta sanga seluk au nai Israel fa, de neukose, au boeo nee-nee lino-linok.”

² Boema no lai-laik, Dauk no solda'du natu ka neen-nala, leu leo Akhis, fo kota Gat-ta manen Maokh anan-na.

³ Boema, Dauk no solda'dun-nala, esa-esak nok ndia teidalen, de ala leo lahele leme Gat. Dauk no saoinan duas, fo nde Ahinoam, fo neme Yizreel mai, ma Abigail, fo Nabal manamatek-ka saoinan-na, neme Karmel mai.

⁴ Lelek Saul namanene lae Dauk nalai leo Gat neu so boema, ana ta sanga seluk enok fo ho'un so'on.

⁵ Boema Dauk nafa'da Akhis nae, “Metema, Ama Manek dalen-na tu'da kasian neu au soona, fe au kota anak esa nai letelepak-ka, fo au leo nai ndia, fo ela Ama Manek atan ia, boso leo no Ama Manek nai kota ia polon-na.”

⁶ Boema, Akhis fe Dauk, kota Ziklag; hu ndia de, mane Yehuda nanuu Ziklag losa besak ia.

⁷ Dauk leo neme nusa Filistin-na, teuk esa, bulak 4 dalen-na.

⁸ Nai tepo-lelek ndia, Dauk no solda'dun-nala nasi'a ala sapu-la hataholi Gesur-ra, hataholi Girzi-la ma hataholi Amalek-kala; hataholi sila-la, leo dook-ka nai nusak ndia so. Ana sapu-na dae ndia, losa Sur, de nakandoo leo Masir neu.

⁹ Ana taonisa la'iesak touk-kala ma inak-kala, boema ana kalo neni bi'ilopo, sapi, keledei, onta, boema papake-ngganggaok boe. Basa boema, ana fali ne'un, de neu leo Akhis neu.

¹⁰ Metema, Akhis natanen nae, “Oek ia, emi sapu leo bee meu?” Boema Dauk nafa'dan nae, meu leo Yehuda boboan kona, do meu leo hataholi Yerahmeel-la nusan-na, do meu leo hataholi Keni-la mamana leleon-na neu.

¹¹ Ana ta po'ilotak esa boen, naso'da nai nusa-nusak fo ana natee-nata'ti nok-kala dalek fa, fo ela boso hapu hataholi neme nusak sila-la leu leo Gat leu, fo lafa'da hata fo tete'ek-ka, Dauk no solda'dun-nala taon so. Dauk tatao-nono'in leondiak, nai lelek ana leo neme Filistin.

¹² Tehu Akhis namahele Dauk, de ana dudu'a-dodoo nai dalen dale nae, “Leoinan, ta lahiik loon makadondook fa, nalosa no nakasetik, ana da'di au atang, nai fai maso'dan-na dalek.”