SEMUEL SUSULAK-KA ESAN-NA 23 - Susula Malalaok Hehelu Palak Ma Hehelu Beuk

Dauk soi-tefa-na kota Kehila

¹ Faik esa boema, Dauk hapu halak lae hataholi Filistin-nala sapu-la kota Kehila, de ala kalo leni gandum nanake'di beuk-kala.

² Boema Dauk natane Manetualain nae, “Ade, au muse u sapu-a hataholi Filistin-nala do?” Manetualain nataa nae, “Hei, muu sapu-malas, fo soi-tefa-ma Kehila laun-nala.”

³ Tehu Dauk solda'dun-nala lafa'dan lae, “Bei ka'da nai ia, fo nai Yehuda boeo, ita bii-popo-tamata'u tanseli so; mu'da hata no, metema ita muse teu sapu-ta solda'du Filistin-nala nai Kehila bai.”

⁴ Hu ndia de, Dauk noke natutu'duk la'i esa seluk neme Manetualain mai, de Manetualain nataa nae, “Boso bii. Muu sapu-ma kota Kehila leona, nanahu neukose Au fe solda'du Filistin sila-la leo o neu.”

⁵ Boema Dauk no solda'dun-nala leu sapu-la Kehila, de ala taolisa hataholi Filistin makadotok, ma ala kalo leni bana-manun-nala. Dauk soi-tefa-na kota ndia laun-na, enon-na leondiak.

⁶ Lelek Abyatar, fo Ahimelekh anan-na, nalai leo Dauk neu, de sama-sama no Dauk leu leo Kehila leu-a, ana ho'i neni ba'du babaa fanak boe.

⁷ Lelek Saul hapu halak, nae Dauk nai Kehila boema, Saul dodoo nae, “Manetualain fe Dauk leo au mai so. Nala hihi'ik dale, nanahu neu leo kota fo nanuu papala nanadamak ma nanuu lelesuina, dalek neu so.”

⁸ Boema Saul hoka la'iesak solda'dun-nala, de leu leo Kehila leu, fo lakahapi-la Dauk no basa solda'dun-nala.

⁹ Tehu Dauk bubuluk basa, nae Saul nape'da dale mangalauk soaneun. Hu ndia de, nafa'da Imam Abyatar-ra nae, “Meni ba'du babaa fanak ndia leo ia mai.”

¹⁰ Boema Dauk hule-haladoi nae, “Manetualain, fo Israel Manetualain-na, au amanene lae Saul tutu'u basa, ana mai leo Kehila mai, fo ana tao nakalulutuk kota ndia, nanahu au, fo O atam-ma.

^11-12 Au amanene halak-ka, tete'ek-ka do? Manetualain, fo Israel Manetualain, sa'di leo been-na, mafa'da au.” Manetualain nataa nae, “Hei, neukose Saul mai.” Boema Dauk natane seluk nae, “Ade kota Kehila laun-nala, neukose ala fe au ma au solda'dung-ngala leo Saul neu do?” Boema Manetualain nataa nae, “Hei.”

¹³ Boema Dauk no solda'dun-nala, fafa'kama hataholi 600, no lai-laik ala la'o ela Kehila, de laleu-lalaak, leme mamanak esa leo mamanak esa leu. Lelek Saul namanene lae, Dauk la'o neme Kehila mai so, boema ta neu sapu-nan so'on.

Dauk nai nggolo letelepak-kala

¹⁴ Basa ndia boema, Dauk leo nai lea-leak manai letelepak-kala dalek, nai moo solokaek Zif-fa. Saul usi do'e-do'e non, tehu Manetualain ta fe Dauk leo manek ndia neu fa.

¹⁵ Leomae leondiak boe, Dauk bii-namata'u boe, nanahu Saul tutu'u basa, ana sanga taonisan. Faik esa boema, Dauk nai Hores, fo nai moo solokaek Zif-fa.

¹⁶ Yonatan neu natongo non nai mamanak ndia, fo natetea-nahele namahehelen-na nae, neukose Manetualain nasulu-nahapan.

¹⁷ Yonatan nafa'dan nae, “Boso bii, te neukose o ta tu'da leo au amang liman dale neu fa. Ama bubuluk te'e-te'e nae, neukose o nde da'di mane Israel-la, ma nae neukose, au hapu kandela nangatutuuk nai o dae.”

¹⁸ Basa boema, Dauk no Yonatan tao hengenee-balataa tia-laik nai Manetualain matan. Basa boema, Yonatan fali ne'un leo uman neu, te Dauk leo nahele neme Hores.

¹⁹ Basa boema, hataholi de'ubee, ala mai leme Zif mai, fo leu leo Saul nai Gibea, de lafa'dan lae, “Dauk ke'ke nai ami nusam-ma, nai lea-leak manadeka no Hores, nai Pupukuk Hakhila lain, fo nai moo solokaek Yehuda boboan kona.

²⁰ Ami bubuluk, mae Ama Manek nahiik nanseli ho'un-nan; hu ndia de, muu leo ami nggolom-ma muu. Ami mapalani mafa'da mae, tao leo bee-o, Ama Manek bisa ho'un-nan.”

²¹ Saul nataa nae, “Sa'di leo been-na, Manetualain fe emi baba'e-papalak, nanahu emi tao malole soaneu au!

²² Meu leona, fo sanga hapu ndoon-na seluk; palisak besa-besa, Dauk nai mamanak bee, ma see nde nitan nai naa. Au amanene lae hataholi ndia, dodole matane nanseli.

²³ Da'di, palisak besa-besa no basa leak fo ana ke'ke hai neme dalek so, soona fali ma'im-ma leo ia mai, fo mafa'da au. Fo ata teu sama-sama, fo metema bei nai nggolok ndia soona, tao leo bee-o, neukose au sangan, leomae au muse sanga okofefeok Yehuda lala'en-na boe!”

²⁴ Boema hataholi sila-la, fali le'us lakahuluk Saul, leo Zif leu. Nai lelek ndia, Dauk no solda'dun-nala lai moo solokaek Maon-na, nai bafak nees esa, fo nai moo solokaek Yehuda, boboan kona.

²⁵ Saul no solda'dun-nala sanga leu sanga Dauk, tehu hataholi-la lafa'da dede'ak ndia neu Dauk, nalosa neu leo lete batu esa, nai moo solokaek Maon-na, de ana leo neme ndia. Lelek Saul namanene dede'ak ndia boema, no lai-laik neu usi Dauk.

²⁶ Saul no solda'dun-nala, lai letek-ka selik ia, ma Dauk no solda'dun-nala lai selik eli. Saul mulai nakahapi-nalas, fo ana sanga ho'us, tehu no lai-laik, Dauk nala deak.

²⁷ Tehu no kaiboik, hataholi nadenuk esa, neu leo Saul neu, de nafa'dan nae, “Ama Manek muse fali ne'un no lai-laik! Te hataholi Filistin-nala, sapu-la ita nusan-na so!”

²⁸ Boema Saul ta usi Dauk so'on, de ana la'o fo neu natee-nata'ti no hataholi Filistin-nala. Hu ndia de, loke mamanak ndia soona lae, Lete Binga-ba'ek.