SEMUEL SUSULAK-KA ESAN-NA 21 - Susula Malalaok Hehelu Palak Ma Hehelu Beuk

Dauk nalai neme Saul mai

¹ Boema Dauk neu leo Imam Ahimelekh-ka, nai Nob. Ahimelekh kalua no ana nggenge-la de neu soluk Dauk, boema natanen nae, “Tao le'e de, ka'da o mesam-ma mai leo ia mai?”

² Boema Dauk nataa nae, “Ama Manek fe basa au bela-ba'uk esa so, de ana pa'dak au, fo au boso afa'da bela-ba'uk ndia neu hataholi esa boen. Hu ndia de, au adenu au solda'dung-ngala, lahani nai mamanak esa.

³ Ampon, te besak ia, au ahiik atane, ama hapu nana'a beek nai ia boe do? Ama fe au loti biak lima, do ama hapu su'di beek-ka nai ia soona, fe au.”

⁴ Boema, imam ndia nae, “Au ta pe'da loti biasa fa, te ka'da loti tunu-hotuk-ka nai ia; o bole ho'i-man, sa'di o solda'dum-mala, nai fai lai-lai anak ia, ala ta sungu loo inak fa.”

⁵ Dauk nataa nae, “Tao leo bee-o ta. Metema, ami makalala'ok ami bela-ba'um soona, au solda'dung-ngala lanea besa-besa, fo ela sila balisi lahele, tunga agama nakaneneten-na, leomae bela-ba'uk ndia, ka'da bela-ba'u biasa; mu'dahata no bela-ba'uk fo sama leo besak ia!”

⁶ Boema imam ndia, ana fe Dauk loti tunu-hotuk ndia, nana ana pe'da ka'da loti nanatunu-hotuk soaneu Manetualain; loti ndia besak-ka ana so'u henin neme mei tunu-hotuk-ka mai, fo ana tao seluk loti beuk neu. (

⁷ Nai faik ndia, Doëg, fo Saul malanga manafoo bana-manun-na, nai ndia boe, fo ana tao natetu agama bela-ba'un esa.)

⁸ Basa boema, Dauk natane Ahimelekh nae, “Ade, Ama pe'da tee do tafainan-nai ia fo au bisa paken boe do? Ama Manek paletan-na no kaiboik, nalosa au la'o no dedelek nanseli, de au ta hapu loak fo ho'i tafaina do tafa-sisilo fe'ek fa.”

⁹ Boema, Ahimelekh nataa nae, “Au pe'da Goliat, hataholi Filistin fo o taomisan neme Bafak Ela ndia, tafainan-na nai ia; au pe'da tafaina ndia nai ba'du babaa fanak-ka dean-na, nanapotik nai temak esa dalek. Metema o nau soona, ka'da muu ho'i-man, nana au pe'da ka'da tafaina ndia mesak-kana nai ia.” Dauk nae, “Tafaina ndia, tafaina neulauk nanseli, nai basa nusak ia lala'en-na, de fe tafaina ndia leo au mai!”

¹⁰ Nai faik ndia boe, Dauk nalai neme Saul mai, boema ana losa Akhis, fo kota Gat-ta, manen-na.

¹¹ Akhis hataholi mana'a ngga'din-nala lafa'dan lae leo ia, “Ade Dauk, fo manek nai nusan-na, nde ia hetu? Ma, ade ta soaneu ndia fa de, lelek ndia, basa inak-kala foti-longe ma lakamee lae leo ia, ‘Saul taonisa musu lifu-lifuk-kala, tehu Dauk taonisa kefi-kefin hetu?’ ”

¹² Dede'a-kokolak sila-la, tao-la Dauk langan-na naleo, de ana bii Manek Akhis-sa nanseli.

¹³ Hu ndia de, Dauk tao, ta'ko namulu nai lea matan. Lelek ala so'ba lae ho'un, boema ana tao nono'kabai de, dodolen-na ta maneu fa; ana kikisu-kakalu kota lelesun-na, ma ana po'ilotak apen-na loo sali-sali leo nggolomein-na neu.

¹⁴ Boema, Akhis nafa'da basa hataholi mana'a ngga'din-nala nae, “Ade, emi ta mita hataholi ndia kamulus fa do? Tao le'e de, emi moon leo ia mai?

¹⁵ Hataholi dodole ta maneu, beita dai nai au nggolo titia-tataing fa de, emi moo hataholi kamulus esa seluk leo au umang ia mai?”