SEMUEL SUSULAK-KA ESAN-NA 2 - Susula Malalaok Hehelu Palak Ma Hehelu Beuk

Hana huhule-haladoin

¹ Boema Hana hule-haladoi nae, “Manetualain tao-na au daleng-nga namahoko; tatao-nono'in tao tesa-tama au daleng-nga. Au ame'da au aua-anale, de au hakinonoli au musung-ngala, nana te'e-te'e, Manetualain tulu-fali basa au so.

² Ta hapu malalao-malalafuk sama leo Manetualain fa! Ka'da Ndia nde hapu fe nasulu-nahapak.

³ Hahae o tutui bafa loum-ma leona! Hahae o kokola manakoao-ndaeaom-ma leona! Nana Manetualain ndia, Manetualain fo manabubuluk basa hata lala'en-na; fo mananaketu-nala'di basa hataholi-a tatao-nono'in lala'en-na.

⁴ La'di heni palani tati batu-la kou-koun-na so, tehu hataholi tapandoes-sa, boetai balakaik.

⁵ Hataholi fo makahulun-na nakabete nanahu nana'a-nininun sasi kao-kao, besak ia, ana da'di hataholi mana'a ngga'di, ka'da soaneu hapu nana'ak. Hataholi fo makahulun-na namala'a-namandoe, besak ia namahokok, nana'a-nininun dai so. Saoinak kalate'dis-sa, besak ia dalen-na namatua, ana bongi-na ni'iana hitu so! Tehu inak fo anan ba'uk-ka, dalen-na he'dis-sa, nanahu ana-nala mate la'oelan.

⁶ Manetualain tao mamates, ma Ana tao naso'dan boe. Nakona hataholi daebafak-ka leo hataholi manamatek-ka daebafan-na neu. Ma Ndia boeo nde so'u falik-kana neme naa mai.

⁷ Hapu hataholi fo Ana taon-nan da'di nuu taa-hata taak nanseli, hapu nggelok, Ana taon-nan namasu'i boe. Hapu nggelok, nakadadaek-kana, hapu nggelok, Ana tao namadedeman boe.

⁸ Ana so'u hataholi nuu taa-hata taak-ka neme doi-doson mai, Ana soi-po'i hataholi nananakadadaek-ka neme doidosok-ka mai. Ana taos da'di manefetoana-la tia-lain, ma Ana fes nangatuuk maha'da-holomatak Manetualain nde nanuu daebafak-ka buin-na, de nafofo'a daebafak-ka nai lain.

⁹ Hataholi manalilinekak-ka nee-nee lino-lino tataas esa nai Manetualain nasulu-nahapan dale. Tehu manatao mangalauk-ka mate mopon nai makiu-makahatuk dale. Ta bisa tasalai dea-tala neu be'i-balakai mesa-tala fa, hataholi daebafak-ka be'i-balakain ta neni sesengik fa.

¹⁰ Manetualain musun-nala lutu-lutu, ala bii-lamata'u, nanahu Manetualain namanasa de halan-na nadodolo neme lalai-a mai; Neukose Manetualain, naketu-nala'di basa daebafak ia lala'en-na, ma Ana fe koasa mandela-masa'ak-ka neu manek fo Ana helek-ka.”

¹¹ Boema Elkana no uma isin-nala fali leo Rama leu, tehu Semuel, fo ni'iana ndia, nahele neme Silo, de nalalau-naoono Manetualain nai Imam Eli paletan-na dae.

Eli anan-nala

¹² Eli anan-nala tatao-nono'in mangalaun nanseli. Ala ta lamanene Manetualain fa,

¹³ ma da'di leo imam, ala tao su'di bebe'ik-ka neu leoina Israel-la. Metema, sama-na leo hapu hataholi tunu-hotu tutunu-hohotuk soona, imam-ma limaboboa konan-na ana mai, fo neni kokofuk. Fo bei nasu-nasu loo paa sila-la te,

¹⁴ ala pau kokofuk ndia leo ule nasu paa dale neu, fo ana pau neni su'di paa beek ndia leo lain mai soona, imam-ma nuun ndia. Basa hataholi Israel manamai leo Silo mai, soaneu tunu-hotu tutunu-hohotuk-ka, ala taos leondiak boe.

¹⁵ Nakalenak, nasi'a beita tunu paa mina fa te, imam-ma limaboboa konan ndia, ana mai fo nafa'da hataholi manatunu-hotu tutunu-hohotuk ndia nae, “Fe imam-ma paa matak ndia, fo daenga ana dalan; te ana ta nau sipo paa nananasuk fa.”

¹⁶ Metema hataholi ndia nataa nae, “Malole lenak ata tunga nakanenetek-ka, fo ata tunu takahuluk paa mina ndia; basa ndia soona, emi bole ho'i tunga emi dale hihiim-ma,” boema imam-ma limaboboa konan ndia nafa'da lae, “Ta, o muse fe besak ia boe, metema ta soona, neukose au ho'i no nakasetik.”

¹⁷ Enon-na leondiak, Eli ana ka duan sila-la lasala-lasingo ba'un-na seli nai Manetualain matan, nanahu lakadadaek tutunu-hohotuk soaneu Manetualain.

Semuel nai Silo

¹⁸ Ndia te, Semuel fo bei ni'iana ndia, nalalau-naoono nakandoo Manetualain. Ana pake ba'du nanaseu hehelik neme tema abalutu mai, sama leo basa imam-mala ba'du makaluku-makatelen.

¹⁹ Tunga teuk, metema inak ndia sama-sama no saon-na leu tunu-hotu tutunu-hohotu teuk-ka soona, ana seu fe Semuel ba'du manalu ana fo ana pake.

²⁰ Boema Eli fe baba'e-papalak neu Elkana no saon-na, de nafa'da Elkana nae, “Sa'di leo been-na, Manetualain fe seluk o anak neme o saom ia mai, fo ana nggati ni'iana fo o fe basan neu Manetualain so.” Basa ndia boema, ala fali le'us leo Rama leu.

²¹ Manetualain ba'e-pala Hana, nalosa ana bongi seluk anatouk telu ma anainak dua. Semuel boeo boetai namatua, de nalalau-naoono Manetualain.

Eli ma anan-nala

²² Eli namalasi nanseli so. Namanene hataholi-la kalaak do'e-do'e, la'eneu anan-nala ha'da-paliin neu hataholi Israel-la. Eli boeo bubuluk, anan sila-la sungu loo inak malalau-maoono nai Manetualain Lalaa Teman-na lelesu bafan-na.

²³ Hu ndia de, nafa'da anan-nala nae, “Au hapu basa hala nafa'dak neme hataholi lala'en-na mai, la'eneu emi ha'da-tatao mangalaum-ma so. Taole'e de, emi tao tataos ndia?

²⁴ Boso boe tao seluk leondiak bai, anang-ngala lemin. Manetualain anan-nala kokolak beek la'eneu emi ndia, te'e-te'e ta malole makandondook fa.

²⁵ Metema, hataholi nasala neu hataholi daebafak soona, Manetualain nasala'en; tehu metema hataholi nasala-nasingo neu Manetualain soona, see kande tulu-falin-nana?” Tehu, ala ta lafaduli sila aman Eli, nanoli-nafa'dan fa, nana Manetualain naketu basa soaneu taonisas so.

²⁶ Nasafalin-na, Semuel, fo ni'iana ndia, boetai namatuak-ka, ma boetai lahiik-kana, nau Manetualain, do basa hataholi-la boe.

Dede'a nafa'da elak la'eneu Eli teidale-bobongin-na

²⁷ Nai faik esa boema, nabi esa mai leo Eli mai, de nanduku-nalosak Manetualain hala hehelun-na neun nae, “Lelek o bei-ba'i kaim Harun, ma teidale-bobongin da'di mane Masir-ra atan-na, Au atu'du basa Au aoinang-nga neu Harun so.

²⁸ Neme basa leo Israel-la lala'en-na mai, Au hele basa teidale-bobongin-nala da'di Au imam so, fo lalalau-laoono nai mei tunu-hotuk-ka, tunu boomenik, ma pake ba'du efod, metema ala kokolak loo Au. Ma Au fe basa hak neu sila, boema sila tititi-nonosin, fo ala ho'i baba'ek neme tutunu-hohotuk fo nanatunuk nai mei tunu-hotuk-ka.

²⁹ Da'di, tao le'e de emi bei tenepeta lita tutunu-hohotuk fo nandaa no Au paletang-nga, fo Au leoinang-nga, tunu-hotu fen neu Au? Tao le'e de, o fo Eli, fe ha'da-holomata neu o anam-mala, lena neme o fe ha'da-holomata neu Au, ma o po'ilotak-kasa tao laao aoinan-nala nenik baba'ek neulauk-kala, neme basa tutunu-hohotuk fo Au leoinang-nga tunu-hotun soaneu Au?

³⁰ Au, fo Israel Manetualain makahulun-na helu basa, ae o teidale-bobongim-ma o leo-ma, neukose lalalau-laoono Au da'di leo imam losa dodoon-na. Tehu besak ia, Au ta ahiik dede'ak ndia so'on! Nana manafe ha'da-holomata neu Au, neukose Au fe ha'da-holomata neun, tehu mananakamumulu-nakamamaek Au, neukose Au akamumulu-akamamaek-kana.

³¹ Mamanene leona, te neukose fain-na losa Au taoisa basa touana muli-soluk-kala nai o teidale-bobongim-ma o leom dale, nalosa ta hapu toulasik nai o teidale-bobongim dale fa.

³² Neukose o dalem-ma he'dis-sa, ma o mape'da dalek, metema o mita Au fe baba'e-papalak lala'en-na neu hataholi fe'ek-kala lai Israel, tehu nai o teidale-bobongim dale, neukose basa-basas mate nulak.

³³ Tehu, neukose Au fe hataholi esa nai o tititi-nonosin dale naso'da, fo nalalau-naoono Au da'di leo imam. Tehu, neukose ana da'di pokek ma naso'da no ketu namahehenan-na. Neukose o tititi-nonosin fe'ek-kala, nanataonisak.

³⁴ Fo da'di buti nae, Au afa'da basa sila-la, neukose ala da'di, soona neukose mate o anam duas fo nde Hofni no Pinehas, nai faik esa dalen-na.

³⁵ Basa soona, neukose Au hele imam manalilinekak neu Au, ma manatao-no'i hata fo Au paletan neun. Neukose Au fen tititi-nonosik fo nalalau-naoono tataas esa da'di leo imam nai Au hele manek-kala matan.

³⁶ Basa o tititi-nonosim bei maso'dak-kala, neukose leu leo imam ndia leu, fo loke doik ma nana'a-nininuk. Neukose ana dokodoe nae, sipok au da'di manatulu-manafali neu basa imam-mala, fo ela au hapu u'a, leomae au hao ka'da bafak esa mesak-kana boe.”