SEMUEL SUSULAK-KA ESAN-NA 19 - Susula Malalaok Hehelu Palak Ma Hehelu Beuk

Saul usi Dauk

¹ Saul nafa'da anamanen Yonatan, ma basa hataholi mana'a ngga'din-nala nae, ana sanga taonisa Dauk. Tehu Yonatan sue-na Dauk ba'un-na seli,

² hu ndia de, nafa'dan nae, “Au amang sanga enok, taonisa o; da'di manea matalolole! Balahaa fafaik soona, muu ke'ke nai mamana nafunik esa, fo mahele meme ndia.

³ Neukose, au o au amang meu leo moo solokaek-ka meu, fo mapadeik deka moo mamanak fo o ke'ke nai ndia. Boema neukose, au kokolak o ama, la'eneu ama dale tutu'un soaneu o, fo neukose au afa'da o, kokolak ndia isin-na.”

⁴ Boema Yonatan kokolak no Saul dede'a malole la'eneu Dauk nae, “Ama, Ama boso tao soe o atam Dauk. Nana ana ta tao salak hata esa boen neu ama fa; nakalenak nasafalin-na, ana tao tatao-nono'i malole ba'uk-ka nanseli neu ama.

⁵ Ana pasak so'dan-na, nai lelek ana taonisa Goliat, ma Manetualain fe basa Israel sesengi matuaina tunga Dauk so. Ama mita matam manada'dik ndia so, de nai lelek ndia, ama mamahoko. Da'di, tao le'e de besak ia, ama sanga tao doi-doso hataholi sala taak-ka, ma ta no ne'ek hata esa boen, ama nau taomisa Dauk?”

⁶ Yonatan hala-kokolan taon-na Saul dalen-na nasafali, de ana soo pake Manetualain na'den-na, nae neukose ana ta taonisa Dauk fa.

⁷ Basa ndia boema, Yonatan naloo Dauk, de ana tuin basa dede'a-kokolak na'kasa. Basa boema, no Dauk leo Saul neu, de Dauk nalalau-naoonon sama-na leo makahulun-na.

⁸ Basa boema, natee-natatik-ka da'di seluk loo hataholi Filistin-nala. Dauk sapu-nalas, de ana sengi la'iesak-kasa, nalosa lalai.

⁹ Faik esa boema, Saul nangatuuk nai uman, ma ana ho'u tee, de no kaiboik, Manetualain nadenu duladale mangalauk-ka, ana mai seluk leo Saul mai. Nai lelek ndia, Dauk nakaminak sasanun-na.

¹⁰ Boema, Saul sanga enok, fo ana tee nakanete Dauk no papala. Tehu Dauk sili henin, nalosa tee ndia tola papala. Boema Dauk nalai, fo ela naso'da.

¹¹ Nai le'odaek ndia boe, Saul nadenu hataholi de'ubee leu leo Dauk uman leu, fo ala maku Dauk, fo fafaik soona, ala taolisan. Tehu Dauk saoinan Mikhal, nafa'dan nae, “Metema le'odaek ia, o ta malai fa soona, tao leo bee-o, balahaa fafaik te, ala taolisa o.”

¹² Boema, Mikhal nakona Dauk tunga jendela de nalai, nalosa naso'da.

¹³ Basa ndia boema, Mikhal ho'in-na ndia lamatua daebafa uma loon-na, dodoki-dudulan de, ana pe'dan neu Dauk pepe'un lain. Boema ana tao kailungu bi'ihii bulu-a neu dodoki-dudulak ndia langan-na, de basa boema, ana popoti dodoki-dudulak ndia, nenik lafa.

¹⁴ Lelek Saul nadenu hataholi-la ala mai ho'u Dauk boema, Mikhal nafa'da nae, “Dauk namahe'di.”

¹⁵ Tehu Saul nadenu hataholi sila-la leu seluk leo ndia leu, fo ala mete matan Dauk. Saul fes paleta nde ia nae, “Ndolo moon no pepe'un-na leo ia mai, fo ela au taoisan.”

¹⁶ Boema, Saul nadenu hataholi-la, ala masok leo kama dale leu, te se'kona lamatua daebafak-ka dodoki-dudulan nde nanape'dak nai pepe'uk lain ndia, no kailungu bi'ihii bulu-a nai dodoki-dudulak ndia langan-na.

¹⁷ Boema Saul nafa'da Mikhal nae, “Tao le'e de, o ke'di-ndiu au leoiak! O tulu-fali au musung-nga, de nalai so!” Mikhal nataa nae, “Ana fe au nasanene'da mahelek nae, metema au ta nau tulu-falin fo nalai fa soona, neukose ana taonisa au.”

¹⁸ Lelek Dauk nala deak boema, neu leo Semuel uman neu, nai Rama, boema ana tui basa Saul tatao-nono'in soaneu ndia. Basa boema, Dauk no Semuel leu sama-sama leo Nayot leu, de ala leo leme ndia.

¹⁹ Tehu hataholi nafa'da Saul nae Dauk nai Nayot, deka no Rama.

²⁰ Hu ndia de, Saul nadenu hataholi de'ubee, leu ho'u Dauk. Tehu hataholi ia-la, lita nabi bubuak esa, ala foti-longe ma ala eki sama-sama, fo Semuel nde da'di mauli-malangan. Boema, Manetualain Duladalen-na, koasan-na basa Saul nadenu hataholi-la, nalosa sila boeo, mulai foti-longe ma ala eki.

²¹ Lelek halak ndia losa Saul boema, nadenu hataholi fe'ek leu, tehu hataholi sila-la boeo, mulai foti-longe ma ala eki. Soaneu ka la'i telun-na, Saul nadenu hataholi-la leu, tehu manada'dik ndia, la'e hataholi sila boe.

²² Hu ndia de, Saul neu leo Rama neu. Ana losa oedolu matua esa nai Sekhu boema, natane, Semuel no Dauk lai bee, de hataholi manai sila-la lafa'dan lae, Semuel no Dauk lai Nayot.

²³ Da'di, nakandoo leo naa neu, tehu Manetualain Duladalen-na koasan-nan boe, nalosa ana foti-longe ma ana eki nakandoo, nai leleo-lala'on leo Nayot neu-a.

²⁴ Ana losa naa boema, ana o'du heni bua papaken-na, de ana foti-longe ma ana eki nai Semuel matan-na, boema ana bala neu dae lain no makaholak, nai lele'dok ma le'odae katemak esa dalen-na. (Dede'a bini-a, dada'di makasososan-na nde ndia, fo nae, “Ade Saul da'di nabi boe do?”)