SEMUEL SUSULAK-KA ESAN-NA 17 - Susula Malalaok Hehelu Palak Ma Hehelu Beuk

Goliat nakaheheek hataholi Israel-la

¹ Nai faik esa, fo nai lelek hataholi Filistin-nala hoka basa solda'dun-nala, fo ala tutulu matak soaneu latee-lata'ti. Ala ito-ato solda'dun-nala lapadeik lakadadalak nai kota Sokho, fo nai Yehuda nusan dale, ma ala tao sila mamana ofun-na nai Sokho ma Azeka tala'da, deka no Efes-Damim.

² Saul no hataholin-nala boeo lakabubua, de ala ofu nai Bafak Ela; laheheleaon fo lasasalematak loo hataholi Filistin-nala mamai-na.

³ Hataholi Filistin-nala lapadeik lakadadalak lai pupukuk esa lain, ma hataholi Israel-la lapadeik lakadadalak lai pupuku fe'ek esa lain; bafak esa, nai pupuku ka duak sila-la tala'da.

⁴ Boema palani ta'ti batu esa na'de Goliat, neme kota Gat-ta mai, ana kalua neme hataholi Filistin-nala mamana ofun dale mai, de nahee hataholi Israel-la. Deman-na, fafa'kama metel telu,

⁵ ana pake ti'ilanga liti ma ba'du musu liti, belan-na fafa'kama kilo limahulu hitu.

⁶ Ana feo ketu ein-na nenik liti, ma nasaa tee liti esa nai alun lain.

⁷ Tee ndia ain-na, ba'u ina manatenu-hengek-kala bolen esa, ma tee ndia isin-na belan-na, fafa'kama kilo hitu. Solda'du esa ho'u babaa fanan-na, de ana la'ok nai matan-na.

⁸ Goliat nate'e, boema naloo bou-bou neu hataholi Israel-la nae, “Ade, emi tao beek nai ndia? Ade, emi sanga matee-mata'ti do? Au hataholi Filistin esa, hai Saul atan-nala lemin! Hele-ma, emi hataholi palanim esa, fo natee-nata'ti la'ban au.

⁹ Metema mate au nai nakasusu'di natee-natatik ndia dalek soona, ami nau da'di emi atam, tehu metema au nde sengi, fo au taoisan soona, neukose emi nde da'di ami atam.

¹⁰ Besak ia boe, au ahee solda'du Israel-la; hele-ma hataholi esa, fo natee-nata'ti la'ban au!”

¹¹ Lelek Saul no hataholin-nala lamanene naheek ndia boema, ala nggenge-la, ma ala bii lanseli.

Dauk nai Saul mamana ofun

¹² Dauk nde been-na Isai anan, fo hataholi Efrata, neme Betlehem nai Yehuda mai. Isai anatoun falu, ma nai tepo-lelek Saul paleta, Isai namalasi nanseli so.

¹³ Isai ana ka esa, ka dua, ka telun-na, leu latee-lata'ti tunga Saul. Uluk-ka na'de Eliab, ka dua, na'de Abinadab, ma ka telu na'de Syama.

¹⁴ Dauk nde mate'a teisu'uk-ka. Nai lelek ka'a ka telun sila-la latee-lata'ti tunga Saul,

¹⁵ nasi'a, Dauk la'oela Saul, fo ana fali ne'un leo Betlehem neu, fo ana foo aman bi'ilopon-nala.

¹⁶ Faik haahulu dalen-na, tunga-tunga fafai-le'do noson, Goliat neu deka no solda'du Israel-la fo nahees.

¹⁷ Nai faik esa boema, Isai nafa'da Dauk nae, “Ho'i-ma gandum nanadalak kilo sanahulu, ma loti nde ia, fo menis leo o ka'am-mala lai solda'du-la mamana ofun-na.

¹⁸ Boeo, meni fe malanga solda'du-a, keju balek sanahulu nde ia. Matanen, o ka'am-mala leo beek, fo meni fe au buti, mae o matongo moos so, de bei so'da-molek-kala.

¹⁹ Lai Bafak Ela, sama-sama loo Mane Saul-la, ma basa hataholi Israel fo latee-lata'ti la'ban hataholi Filistin-nala.”

²⁰ Balahaa fafaianak boema, Dauk fo'a de naheheleaon. Ana fe bi'in-nala leo manafoo esa neu, fo naneas, de basa boema ana ho'in-na, neni bua-lo'as-sala de ala la'o, nandaa no aman paletan-na. Ana losa mamana ofuk-ka, nai lelek hataholi Israel-la leu leo musu dale leu, no ala eki, eeki musu-a.

²¹ Solda'du Filistin-nala loo solda'du Israel-la lasasalematak de laheheleaon-nala, fo latee-lata'ti.

²² Boema Dauk fe neni bua-lo'as-sala neu solda'du-la manamanea tafa-sisilon esa, de nalai leo musu dale neu, fo natongo no ka'an-nala.

²³ Tehu lelek ana bei kokolak nos te, Goliat tutulumatak leo uluk neu, de nahee hataholi Israel-la, sama-na leo ndia tatao-nono'i biasan-na. Dauk boeo, namanene hala-kokola naheen sila-la.

²⁴ Hataholi Israel-la lita Goliat no kaiboik boema, lalai no bibiik nanseli.

²⁵ Esa nafa'da esa nae, “Mitak-kana nde ndia. Mamanene hala-kokola neheen-na leona! Ita manen Saul naheluk basa, nae su'di see fo ana taonisa Goliat soona, neukose ana fen bua palsen matuaina. Boeo, neukose manek-ka fe hataholi ndia sao anafe'on-na. Ma neukose ana fe hataholi ndia, aman teidalen-nala ta bae bea so'on.”

²⁶ Boema Dauk nae, “Hataholi Filistin dinitiu ndia, napalani nanseli nahee Manetualain fo maso'dak-ka solda'dun-nala!” Basa boema, natane solda'du esa nae, “Ala fe hataholi fo ana bisa taonisa hataholi Filistin ndia beek, fo lose heni nakamumulu-nakamamaek-ka neme Israel mai?”

²⁷ Laun-na lafa'dan, manek-ka helu basan ndia so.

²⁸ Eliab, fo Dauk ka'a ulun-na, namanene Dauk kokolak no solda'du ndia. Namanasa Dauk nanseli, de nafa'da nae, “Tao le'e de o mai leo ia mai? O fe see mete-nakanae o bi'ilopom ka de'ubeem sila-la, lai moo solokaek-ka? Au bubuluk, o tao o aoinam-ma nono'kabai hataholi palani; o mai leo ia mai, ka'da soaneu mete natee-natatik-ka hetu?”

²⁹ Dauk nataa nae, “Au sala beek? Ka'da au atane boe!”

³⁰ Boema ana la'o, de neu natane solda'du fe'ek esa, bei dede'ak matak esa; de ana hapu natataak-ka, bei leondiak boe.

³¹ Tehu hataholi de'ubee, lamanene Dauk hala-kokolan, de landuku-lalosak-kana neu Saul, da'di Saul naloo Dauk neu nataa.

³² Dauk nafa'da Saul nae, “Ama Manek, ta paluu ita bii hataholi Filistin ndia fa! Au sadia basa, soaneu la'ban hataholi ndia.”

³³ Saul nataa nae, “Bosok. Tao leo beek, fo o bisa makasusu'dik moo hataholi ndia? O bei muli-soluk manseli, te hataholi ndia, biasa natee-nata'ti neme bei muli-solun-na mai so.”

³⁴ Tehu Dauk nae, “Ama Manek, atam-ma biasa foo atam-ma aman bi'ilopon-nala. Metema singa do meoasu mai kaa bi'ilopo-la soona,

³⁵ au usi bana makaak ndia, fo au hotu fen, fo atam-ma se'i-po'in. Ma metema, singa do meoasu ndia la'ban atam-ma, soona atam-ma ki'du-na botoliin-na, fo atam-ma fepanisan.

³⁶ Atam-ma taonisa, nau singa do meoasu boe, de hataholi Filistin dinitiu ndia boeo, neukose sama-na leo bana sila-la, nanahu napalani nakamumulu-nakamamaek Manetualain fo maso'dak-ka, solda'dun-nala.

³⁷ Manetualain soi-tefa-na atam-ma neme singa ma meoasu-a mai so, de Ndia boeo neukose soi-tefa-na atam-ma neme hataholi Filistin ndia mai.” Boema Saul nafa'dan nae, “Hei, sa'di leo been-na, Manetualain, tulu-fali o.”

³⁸ Saul fe bua papake musun-na leo Dauk neu, fo nde ba'du besi esa, de Dauk pake. Boema Saul tao topi liti-a neu Dauk langan-na.

³⁹ Mate'en-na, Dauk pa'a Saul tafainan-na neu ba'du besi ndia, boema ana la'ok so'ba, tehu ana ta bisa fa, nanahu Dauk ta biasa pake bua papake musu fa. Dauk nafa'da Saul nae, “Atam-ma ta bisa la'ok no pake bua papakek ia fa. Atam-ma ta biasa pake fan.” Boema ana o'du heni bua papakek sila-la lala'en-na.

⁴⁰ Basa boema, ana ho'in-na aitete'e foo bi'in-na, de ana helen-na batu bobongok 5 neme lee dale mai, boema ana taos leo ba'du-na sakun dale neu. Ma ana sadia-na pipilun-na nai liman dale so, de neu natongo no Goliat.

Dauk sengi Goliat

⁴¹ Dodoo faa boema, Goliat manaho'u babaa fanan-na nakahuluk, ma Goliat tunga dean-na, de ana la'ok deka no Dauk.

⁴² Tehu lelek Goliat nita Dauk, de ana mete hehelun boema, ana hika ma ana hakinonolin, nanahu Dauk bei muli-soluk nanseli, ma aon-na makadelek.

⁴³ Goliat nafa'da Dauk nae, “Ai tete'ek ndia, sosoan-na beek? Ade, o maedaenga au ia busa do?” Boema Goliat soo-supa Dauk nenik basa Goliat lamatua daebafa-nala na'den-na.

⁴⁴ Bai te, nahee Dauk nae, “Ayo, tutulumatak leona! Te neukose au fe manupui, ma bana-la la'a o aopaam-ma.”

⁴⁵ Tehu Dauk nataa nae, “O mai la'ban au nenik tafaina, tee ma dongi, tehu au mai la'ban o nenik Manetualain Fo Manakoasa, fo solda'du Israel-la Manetualain, fo o makamumulu-makamamaek-kana ndia, na'den-na.

⁴⁶ Faik ia boe, neukose Manetualain fe o leo au mai; neukose au sengi o, fo au te'te heni o langam-ma. Neukose au fe o aopaam-ma, ma solda'du Filistin-nala aopaan-nala, neu manupui-la ma bana-la fo la'an. Soona basa daebafak-ka lala'en-na, neukose bubuluk, lae ami leoinam Israel, manuu Manetualain, de ami sene-do'ok-kana,

⁴⁷ ma basa hataholi manai ia-la, neukose lita, lae Manetualain ta paluu tafaina do tee soaneu soi-tefa anan-nala fa. Ndia nde naketu natee-natatik ia eno-dalan, ma Ndia nde neukose fe emi leo ami limam dale mai-a.”

⁴⁸ Goliat mulai tutulumatak fo neu deka no Dauk, boema no lai-laik Dauk nalai leo hataholi Filistin-nala dalek neu, fo nasasalematak non.

⁴⁹ Dauk olo ba'du saku-na, de ana ho'i-na batu esa, boema ana pilun neu Goliat. Batu ndia la'e Goliat dedein-na, nalosa ba'e langa so'en-na, de ana tu'u natotonokala.

^50-51 Dauk nalai leo Goliat neu, boema napadeik deka non; ana fe'a-na Goliat tafainan-na neme mamanan dale mai, de ana te'te-na hataholi Filistin ndia langan-na. Dauk sengi ma ana taonisa Goliat, ka'da nenik pipiluk ma batu! Lelek hataholi Filistin-nala lita, lae mate sila palani ta'ti batu-na so boema, lalai.

⁵² Hataholi Israel-la ma Yehuda-la eki kao-kao, ma ala usi hataholi Filistin-nala losa Gat, ma Ekron lelesuinan-na. Hataholi Filistin makahinak-kala, lalefule'ak su'di enok leo Saaraim ndia, nanalun-na.

⁵³ Basa ndia de, hataholi Israel-la usi fali hataholi Filistin-nala boema, ala kalo mamana ofun-nala oe-isin.

⁵⁴ Dauk ho'in-na Goliat langan-na, de nenin leo Yerusalem neu, tehu ana pe'da Goliat tafa-sisilon nai ndia uma ofun dale.

Dauk nalelelaok no Saul

⁵⁵ Lelek Saul nita Dauk neu la'ban Goliat boema, natane Abner, fo malanga solda'dun-na nae, “Abner, see ni'iana ndia?” Abner nataa nae, “Atam-ma ta bubuluk fa, Ama Manek.”

⁵⁶ Boema Saul fe paleta nae, “Muu leona, fo matane dede'ak ndia.”

⁵⁷ Da'di, lelek Dauk taonisa Goliat de ana fali leo mamana ofu neu boema, Abner non neu nataa Saul. Ndia te, Dauk bei su'u Goliat langan-na, nai langan lain.

⁵⁸ Boema, Saul natanen nae, “Hai, touana muli-soluk-konei! See anan o?” Dauk nataa nae, “Atam ia, Isai neme Betlehem mai, anan au.”