SEMUEL SUSULAK-KA ESAN-NA 16 - Susula Malalaok Hehelu Palak Ma Hehelu Beuk

Ndo ei Dauk da'di manek nenik lose mina neun

¹ Basa teuk de'ubee boema, Manetualain nafa'da Semuel nae, “O dalem-ma he'dis losa fa'ihi'da hu kande Saul? Ade, Saul ta da'di manek Israel so'on hetu? Besak ia, ho'i-ma mina setun, fo muu leo Betlehem muu, soona muu leo hataholi esa na'de Isai, nanahu Au hele basa anan esa da'di manek so.”

² Tehu, Semuel nataa nae, “Au muse taon tao leo beek? Metema Saul namanene dede'ak ndia soona, tao leo bee o, ana taonisa au!” Manetualain nataa nae, Pa'a meni sapiana esa, fo mafa'da laun-na mae, o muu leo naa muu, fo tunu-hotu tutunu-hohotuk fe Manetualain.

³ Boema ka'i Isai, fo neu leo feta tutunu-hohotuk ndia neu. Mahani te, Au sanga afa'da o, hata fo neukose o muse tao-no'in. Hataholi fo Au atu'dun neu o ndia, muse o ndo ein da'di manek.

⁴ Semuel taon sama leo Manetualain nafa'dak-ka. Lelek ana losa Betlehem boema, basa mauli-malangan kota, sipok-kana no nggenggengek ma latane lae, “Ade, Ama mamain ia, neni so'da-molek do?”

⁵ Semuel nataa nae, “Hei, tete'ek-ka. Au mai soaneu tunu-hotu fe Manetualain tutunu-hohotuk. Hu ndia de, tao malalao-malalafu o aoinam-ma, fo ela o hapu tunga feta tutunu-hohotuk ndia.” Nadenu Isai no anan-nala boe, fo esa-esak tao nalalao-nalalafu aoinan-na, ma ana ka'is fo leu leo feta ndia leu.

⁶ Lelek basa-basas tesa boema, Semuel nita Eliab, fo Isai anan-na boema, ana dodoo nae, “Tao leo bee o, neukose Manetualain helek-ka nde ia.”

⁷ Tehu Manetualain nafa'da Semuel nae, “O dalem-ma boso tu'da, hu kande mata makee-na ma ao mademan-na; Au ahiik-ka, ta nde ndia fa. Au mata memeteng-nga ta sama leo hataholi daebafak-ka mata memeten-na fa. Hataholi daebafak-ka mete matak, te Au mete dalek.”

⁸ Basa boema, Isai naloo anan Abinadab, de nadenun neu nataa Semuel. Tehu Semuel nafa'da nae, “Ndia boeo, Manetualain ta hele fan.”

⁹ Boema Isai nadenu Syama neu leo mata neu, tehu Semuel nafa'da nae, “Ndia boeo, Manetualain ta hele fan.”

¹⁰ Leondiak, Isai nadenu ana ka hitun-nala latutungao, leu lataa Semuel, tehu Semuel nafa'dan nae, “Manetualain ta hele sila fa.”

¹¹ Boema, Semuel natanen nae, “Bei hataholi esa seluk bai, fo mate'a teisu'uk-ka, tehu ana da'di manafoo bi'ilopo.” Isai nata nae, “Beana toanak esa fo mulianak ka, tehu ana be neu foo bi'ilopo-la.” Semuel nae, “Madenu leu laloon, nanahu ana beita mai fa soona, ita ta ta'a fa.”

¹² Boema Isai nadenu leu laloo ni'iana ndia. Te se'kona ni'iana ndia, ta'eana ao kahelek esa, ma so'da-la'dak, ma matan-na manahiik. Boema Manetualain nafa'da Semuel nae, “Hataholi-a nde ndia!”

¹³ No lai-laik, Semuel ho'in-na mina setun ndia, de ana ndo ei Dauk, nenik ana lose mina neun, nai ka'an-nala matan. Nai hatematak ndia boe, Manetualain Duladalen-na koasa-na Dauk. Mulai neme faik ndia mai, Manetualain Duladalen-na sama-sama non tataas esa. Basa boema, Semuel fali ne'un leo Rama neu.

Dauk nai Saul uma manen-na

¹⁴ Manetualain Duladalen-na la'oela Saul so, de besak ia, Manetualain nadenu duladale mangalauk-kala tao doi-doson.

¹⁵ Hu ndia de, Saul atan-nala lafa'dan lae, “Ami bubuluk mae Manetualain nadenu duladale mangalauk-kala, tao doi-doso Ama Manek.

¹⁶ Metema, Ama Manek nau soona, ami sadia basa, meu sanga hataholi makaminak nalelak kecapi esa. Neu faik bee fo duladale mangalauk-kala tao doi-doso Ama Manek soona, hataholi ndia nakaminak kecapi-na, fo Ama Manek dalen-na tesa-tama seluk.”

¹⁷ Boema, Saul fes paleta nae, “Sanga hataholi makaminak nalelak sasanu esa, fo moon leo ia mai.”

¹⁸ Lamanene dede'ak ndia boema, atan esa nafa'da nae, “Kota Betlehem-ma laun esa, na'de Isai, anatouanan esa nakaminak nalelak sasanu. Hataholi ndia palani, ma solda'du malole esa. Bai te, aon-na makadelek ma malela dede'ak, ma Manetualain tulu-falin tataas esa.”

¹⁹ Boema, Saul nadenu hataholi neu leo Isai neu, fo neni hala heheluk-ka nde ia nae, “Madenu o anam Dauk, fo manafoo bi'ilopo ndia, mai nataa au.”

²⁰ Basa boema, Isai sadia-na keledei esa, boema ana fua bi'ihiiana esa, loti ma alukosu bana louk esa henuk no angol. Ana fe basa sila-la leo Dauk neu, fo ana fen leo Saul neu.

²¹ Boema Dauk neu leo Saul neu, de ana da'di Saul malalau-maoonon. Saul sue-nan ba'un-na seli, de ana so'un da'di manaho'u tafa-sisilon.

²² Basa boema, Saul haitua hala heheluk leo Isai neu, nae, “Au hii Dauk. De po'in, fo ana leo neme ia, fo nalalau-naoono au.”

²³ Mulai neme ndia mai, metema duladale mangalauk-ka masok leo Saul dalek neu soona, Dauk ho'in-na sasanun-na, fo nakaminak-kana. Boema Saul name'da dalen-na tesa-tama ma nee-nee lino-lino seluk, nanahu duladale mangalauk ndia kalua so.