SEMUEL SUSULAK-KA ESAN-NA 14 - Susula Malalaok Hehelu Palak Ma Hehelu Beuk

Yonatan da'di leo palani ta'ti batu

¹ Nai faik esa boema, Yonatan nafa'da touanak manaho'u tee-tafa-na nae, “Aiou, mai teu leo hataholi Filistin-nala uma nanea-na nai selik eli!” Tehu ana la'o deak aman.

² Nai hatematak ndia, Saul bei nai ai dalima huun-na, nai Migron, ta dook-ka neme Gibea mai fa. Laun manatungan-nana, fafa'kama hataholi natun nee.

³ (Imam maneni ba'du babaa fanak-ka nde Ahya, fo Ahitub anan-na, fo nde Pinehas anan Ikabod tolanon-na, ma Pinehas, fo Eli anan-na, fo Manetualain imam-ma nai Silo.) Laun-na boeo, tabubuluk lae Yonatan la'o neme ndia mai so.

⁴ Soaneu losa hataholi Filistin-nala uman-nanean ndia, de Yonatan muse tunga lete lelak esa, batupiak dua laka'bi-lan, batupiak sila-la, esa na'de Bozes, ma esa seluk na'de Sene.

⁵ Batupiak manai boboan kii, nasale leo Mikhmas neu, ma manai boboan kona, nasale leo Geba neu.

⁶ Boema Yonatan nafa'da touanak manaho'u tee-tafan ndia nae, “Mai fo ata teu leo hataholi Filistin dinitiu sila-la, uma nanean-na teu. Fafa'kama Manetualain nau tulu-fali ita. Nana Manetualain hapu fe sesengik neu, nau nenik hataholi makadotok, do hataholi lumanak boe.”

⁷ Touanak ndia nataa nae, “Tuan sanga tao beek soona, ka'da taon leona, te atam-ma tunga.”

⁸ Yonatan nae, “Hei. Nai lelek ita lena leo selik teu, neukose ita tatu'du ita aoinan-na neu hataholi Filistin sila-la.

⁹ Metema, ladenu ita tate'e, fo tahani losa ala mai, soona neukose ita tahele teme ka'da mamanak ndia, fo ata boso lena leo selik teu.

¹⁰ Tehu, metema ladenu ita teu leo sila teu soona, neukose ita teu leo naa teu, nanahu ndia nde da'di ta'du-tana nae, Manetualain fe basa sila neu ita so.”

¹¹ Lelek duas latu'du aoinan-na neu hataholi Filistin-nala nai uma naneak ndia boema, hataholi Filistin sila-la lae, “Mitak hataholi Ibrani dua, kalua leme bolok fo sila mamana nafunin-na dalek mai!”

¹² Basa boema, laloo bebou neu Yonatan no atan-na lae, “Kae leo ia mai, fo daenga ami matu'du emi hata esa!” Boema Yonatan nafa'da touanak ndia nae, “Tunga au leona, te Manetualain fe basa hataholi sila neu Israel so.”

¹³ Yonatan laek leo lain neu, de touanak ndia tunga dean-na. Nai lelek Yonatan to'da mai boema, ana kalapu'a hataholi Filistin-nala de ala tu'u leu-tu'u leu-a, ma touanak ndia, taonisa hataholi Filistin manatunga dean-na.

¹⁴ Nai natee-natatik makasososak ndia, Yonatan no touanak ndia taolisa hataholi, fafa'kama duahulu, nai dae-a loloa-na, metel duahulu lima.

¹⁵ Manada'dik ndia taon-na hataholi Filistin manai mamana ofuk-ka ma manai mook-kala, dele. Basa laun Filistin lala'en-na loo manamanea manai uma naneak-kala, boema nakodaa-la bii; lena-lenak daebafak-ka dele, ma nakalupu matuaina da'di.

Hataholi Filistin-nala kala

¹⁶ Ndia te, Saul solda'du manamanea manai Gibea, fo nai Benyamin nusan-na, lita hataholi Filistin-nala lalai leu-mai no lapangamak lanseli.

¹⁷ Boema Saul nafa'da solda'dun-nala nae, “Leke basa solda'du-la, ma palisak see taak-kana.” Lakalala'ok paleta ndia, boema ala bubuluk lae Yonatan no touanak manaho'u tee-tafan, taak-kasa.

¹⁸ Saul nafa'da Imam Ahia nae, “Ho'i meni ba'du lolo'e aluk ndia Nai faik ndia.” (Ahia neni ba'du lolo'e aluk ndia nai hataholi Israel-la matan.)

¹⁹ Lelek Saul bei kokolak no imam ndia te, nakalupuk manai hataholi Filistin-nala mamana ofun-na boetai nakadele, nalosa Saul nafa'da imam ndia nae, “Ita ta hapu seluk loak soaneu toke natutu'duk neme Manetualain mai so'on!”

²⁰ Boema, Saul no hataholin-nala tutulumatak landaa, leo mamana natee-natatik-ka dale leu. Nai ndia, lita hataholi Filistin-nala esa tasibu no esa; esa sapu-na esa, ma esa taonisa esa.

²¹ Hataholi Ibrani manaleo lai hataholi Filistin-nala nusan dalek, ma manatunga sila solda'dun-nala, lepos fali boema, lakabubua loo Saul ma Yonatan.

²² Boeo hataholi Israel fo manake'ke lai Efraim pupukun-nala, lamanene lae hataholi Filistin-nala lalai so, boema lakabubua, de ala sapu-la hataholi Filistin sila-la.

²³ Latee-lata'ti su'di enok-ka nanalun-na, losa ala seli Bet-Awen. Nai faik ndia dalen-na, Manetualain soi-tefa-na Israel.

Manada'dik-kala da'di nai lelek basa natee-natatik-ka

²⁴ Nai faik ndia, hataholi Israel-la beemale ma lamala'a, nana Saul soo-supa basa nae, “Metema au beita balas au nape'da daleng-nga neu au musung-ngala fa soona, nanasoo-supak ba'eneu hataholi fo na'a su'di beek-ka nai faik ia.” Hu ndia de, nai faik ndia dalen-na, hataholi esa boeo, ta na'a fa.

²⁵ Basa boema, sila basa-basas losa nula esa, de ala hapu fanioe makadotok nanseli,

²⁶ tehu ta hapu hataholi esa boen, bole na'a fanioe ndia faaanak boen, nanahu ala bii sila la'e soo-supak fo Saul kokolak-kana ndia.

²⁷ Tehu Yonatan ta bubuluk nae aman fe laun-na nasanene'da mahelek, nenik soo-supak ndia fa; hu ndia de, ana look ana ho'i neni aitete'ek-ka neu, de ana paun leo fani popolan dale neu, boema ana ho'in-na fanioe ndia de na'an. Tutik-ka name'da aon-na malole ma be'i-balakain boeo, ana popo-tama.

²⁸ Basa boema, solda'du esa nai solda'du sila-la dalek, nafa'dan nae, “Ami basa-basam mala ndole ndaku so, hu kande la'as-sa. Tehu Tuan aman fe basa ami nasanene'da mahelek pake soo-supak nae, ‘Nanasoo-supak ba'eneu see fo na'a nai faik ia.’ ”

²⁹ Yonatan nataa nae, “Au amang tatao-nono'in ndia anseli nanseli, soaneu ita leoinan-na. Mitak, lelek au inu fanioe faaanak boema, besak-ka au ame'da au aoinang-nga malole-a so.

³⁰ Leouni'ka faik ia, fe laun-na loak la'a ala loso-la nana'ak nai lelek ala sengi musu soona, tao leo bee o, ita bisa taotisa hataholi Filistin makadotok lena seluk bai!”

³¹ Nai faik ndia, hataholi Israel-la sengi hataholi Filistin-nala, nai lelek latee-lata'ti nai enok maneme Mikhmas leo Ayalon neu. Tehu basa ndia boema, ala sota lanseli,

³² nalosa latonak bua-lo'as fo ala kalo lenis leme musu dale mai; ala ho'u-la bi'ilopo ma sapi boema ala do'dos leme mamanak ndia boe, tutika la'a matak paa ndia.

³³ Boema lafa'da Saul lae, “Ama Manek, laun-na nasala-nasingo basa neu Manetualain so, nanahu la'a paa matak.” Saul nggasi nae, “Emi hataholi manamalelesik! Loli batu matuaina esa leo ia mai.”

³⁴ Basa boema, nafa'da seluk hataholi maneni halak ndia nae, “Emi meu la'ok mafeo basa laun-na, fo madenus leni sila sapin, bi'ilopon leo ia mai, fo daenga ata do'dos lai batu ia lain, fo ta'a teme ia; no enok ndia, ta la'a paa matak so'on, fo ta lasala-lasingo seluk neu Manetualain so'on.” Le'odaek ndia boe, basa laun lala'en-na leni sila banan fo ala kalo lenik-ka, de ala do'dos leme ndia.

³⁵ Boema Saul napadedeik mei tunu-hotuk ba'eneu Manetualain; fo napadedeik mei tunu-hotuk makasososak-ka nde ndia.

³⁶ Basa boema, Saul nafa'da solda'dun-nala nae, “Mai fo ata teu sapu-ta hataholi Filistin-nala le'odaek ia boe, boema popo-tamanako bua-lo'an-nala losa fafaik, ma taotisa la'iesak-kasa.” Boema lataa lae, “Hei, Ama Manek, tao beek fo Ama Manek meten malole.” Tehu imam-ma nae, “Mai fo ata toke takahuluk natutu'duk neme Manetualain mai.”

³⁷ Boema Saul natane Manetualain nae, “Ade, au bole u sapu-a hataholi Filistin-nala do ta? Ade, neukose O fes leo Israel liman dale neu do ta?” Tehu nai faik ndia, Manetualain ta nataa fan.

³⁸ Hu ndia de, Saul nafa'da laun-na mauli-malangan nae, “Basa-basam-mala leo ia mai, fo palisak, ala tao sala-singo beek nai faik ia.

³⁹ Au aheluk pake Manetualain fo maso'dak, ma manafe sesengik neu Israel-la, na'den-na, ae hataholi masalak-ka, neukose nanahukunisak, leomae hataholi ndia nede been-na, au anamaneng Yonatan boe.” Tehu ta hapu hataholi esa boen, napalani nataa fan.

⁴⁰ Boema Saul nafa'da laun Israel-la lala'en-na nae, “Emi basa-basam-mala, mapadeik mai boboak ia.” Boema, lataa lae, “Ela leo been-na, Ama Manek tao beek fo Ama Manek meten malole.”

⁴¹ Basa boema, Saul hule-haladoi nae, “Manetualain, fo Israel Manetualain-na, tao le'e de, faik ia, O ta mataa au fa? Manetualain, mataa au tunga batu malalao-malalafuk ia-la. Metema salak ndia nai au, do nai Yonatan soona, mataa menik batu Urim, tehu metema salak ndia nai Israel, fo O anam-mala soona, mataa menik batu Tumin.” Boema Manetualain natataan-na, natu'du leo Yonatan no Saul neu; no enok ndia, nananitak nae, laun-na salan ta.

⁴² Boema Saul nafa'da nae, “Ou Manetualain, maketu au o Yonatan, see-ka nde nasala.” Boema, nananafa'dak, Yonatan nde nasala.

⁴³ Boema Saul nafa'da Yonatan nae, “Te o tao beek so?” Yonatan nataa nae, “Au ho'i fanioe faaanak nenik au aitete'eng-nga pe'dan-na, de au u'a so; au sadia soaneu mate.”

⁴⁴ Saul nafa'dan nae, “Sa'di leo been-na, Manetualain huku au, metema o ta hukunisa o fa, Yonatan!”

⁴⁵ Tehu laun-na nafa'da Saul nae, “Ade Yonatan muse nanahukunisak do? Te se'kona ndia nde neni sesengik matuaina ia? Ta! Ami maheluk pake Manetualain fo maso'dak-ka na'den-na, mae ta bole mopo Yonatan langa doon esa boen, neme langan lain mai fa. Nanahu no Manetualain nde tutulu-fafalin de, ana hapu sesengik nai faik ia.” No enok ndia, laun-na soi-nala Yonatan neme mamates-sa mai.

⁴⁶ Basa ndia boema, hataholi Filistin-nala fali le'us leo sila nusan-na leu, nanahu Saul ta usi seluk-kasa fa.

Saul paletan-na ma teidalen-nala

⁴⁷ Saul da'di mane Israel-la boema, natee-nata'ti nai basa mamanak lala'en-na, fo la'ban Israel musun-nala, fo nde hataholi Moab, hataholi Amon, ma hataholi Edom, nusak Zoba manen-nala, ma hataholi Filistin-nala. Natee-nata'ti su'di nai bee boe, tehu ana sengi tataas esa.

⁴⁸ Natee-nata'ti no napalanik nanseli, de ana sengi hataholi Amalek-kala, boema ana soi-po'i Israel neme nakodaa-la koasan-na mai.

⁴⁹ Saul amamanen-nala nde, Yonatan, Yiswi, ma Malkisua. Anafe'o ulun-na na'de Merab, ma ka dua, na'de Mikhal.

⁵⁰ Sao-na na'de Ahinoam, fo Ahimaas anan-na; malanga solda'du matuainan-na nde Abner, fo Ner anan-na, ma Saul to'on.

⁵¹ Kish fo Saul aman, ma Ner fo Abner aman nde been-na Abiel anan sila.

⁵² Nai Saul maso'dan-na dalek, natee-nata'ti no napalanik tataas esa la'ban hataholi Filistin-nala. Hu ndia de, metema Saul nita hataholi mabe'i-balakaik, do palani soona, no lai-laik ana ho'i-nan da'di ndia solda'dun.