SEMUEL SUSULAK-KA ESAN-NA 11 - Susula Malalaok Hehelu Palak Ma Hehelu Beuk

Saul sengi hataholi Amon-nala

¹ Basa boema, Nahas, fo Amon manen-na, hoka la'iesak solda'dun-nala fo leu lakahapi-la kota Yabesh-sa, nai nusak Gilead-ta. Yabesh laun-nala lafa'da sila hahapun-na neu Nahas, lae leo ia, “Tao hehelu-balataak moo ami soona, neukose ami makatele neu o.”

² Nahas nataa nae, “Au nau tao hehelu-balataak, metema emi nau tao matetu dede'ak-ka nde ia, ‘Au e'do heni emi esa-esak mata konam-ma, fo da'di leo nakamumulu-nakamamaek neu Israel lala'en-na!’ ”

³ Basa boema, kota Yabesh-sa mauli-malangan lataa lae, “Ami moke fe ami loak, faik hitu dalen-na, fo daenga ami madenu hataholi neu leo dae Israel-la lala'en-na neu. Metema ta hapu hataholi nau tulu-fali ami fa soona, neukose ami makatele neu o.”

⁴ Boema ladenu hataholi sila-la losa Gibea, fo Saul mamana leleo-na. Lelek landuku-lalosak halak ndia boema, laun-na kii, nanahu ketu namahehenan-nala.

⁵ Nai hatematak ndia, Saul no sapi-nala besak-ka leme tina mai. Natane nae, “Te beek ia? Tao le'e de, basa hataholi-la kii?” Boema lafa'dan, hataholi fo ladenus leme Yabesh sila-la, leni halak-ka.

⁶ Saul namanene halak ndia boema, Manetualain Duladalen-na koasa-nan.

⁷ Namanasa nanseli, de ana pa'a-na sapi dua, boema ana tete'tes da'di bibia makadotok. Basa boema, ana haitua paa bibiak sila-la leo basa dae Israel-la lala'en-na neu, no paleta nae leo ia, “See ta tutulumatak fo natee-nata'ti tunga Saul no Semuel fa soona, neukose sapi-na nanatete'tek leo iak boe!” Leoina Israel-la bii neu hata fo fafa'kama Manetualain tao-no'in, boema basa hataholi-lala'en-na, ta ela esa boen, laheheleaon soaneu tutulumatak fo latee-lata'ti sama-sama.

⁸ Ala tao lakabubuas, de ala leke dede'un-nala, de neme Bezek mai: hapu hataholi Israel lifun natun telu, ma hataholi Yehuda lifun teluhulu.

⁹ Basa ndia boema, lafa'da hataholi fo ladenus leme Yabesh mai, lae leo ia: “Mafa'da Yabesh laun-nala, mae balahaa fafaik fo beita le'ohana fa te, neukose ala hapu tutulu-fafalik.” Lelek Yabesh laun-nala lamanene hala heheluk ndia boema, lamahoko lanseli.

¹⁰ Lafa'da Nahas lae, “Balahaa te, neukose ami makatele neu o, de o bole tao tunga o dale hihiim-nanaum.”

¹¹ Balahaa fafaik boema, Saul ba'e hataholin-nala neu baba'ek telu. De dulufula boema, ala sapu leo hataholi Amon sila-la mamana ofun-na tala'da heon de latee-lata'ti los. Beita losa le'dohana boen te, Saul solda'dun-nala sengi musu-a so. Hataholi Amon manamalai laladeak-kala, tapasasala, nalosa ta hapu hataholi dua lalaik lakabubua fa.

¹² Basa boema, leoina Israel-la latane Semuel lae, “Basa hataholi fo naka'sa lapalani lafa'da lae, Saul ta nandaa da'di ita manen fa, lai bee? Tunga ndoon-na, Ama fes leo ami mai, fo daenga ami taomisas.”

¹³ Tehu Saul nafa'da nae, “Ta bole taomisa hataholi esa boen nai faik ia dalen-na, nanahu nai faik ia dalen-na, Manetualain soi-tefa-na Israel so.”

¹⁴ Boema Semuel nafa'das nae, “Mai fo basa-basa-tala teu leo Gilgal teu, fo ata ndo ei tabebeu Saul da'di ita manen.”

¹⁵ Boema basa-basas leu leo Gilgal leu, de nai mamana makaluku-makatele ndia, Saul nanadoo ei nabebeuk da'di manek. Ala tunu-hotu tutunu-hohotu mole-dame, de Saul boema basa leoina Israel-la lala'en-na, tao manada'dik ndia fetan-na.