SEMUEL SUSULAK-KA ESAN-NA 10 - Susula Malalaok Hehelu Palak Ma Hehelu Beuk

¹ Basa boema, Semuel ho'i-na kete mina setun-na, de ana po'a mina ndia neu Saul langan lain, ma ana de'in, boema nafa'da nae, “Manetualain ndo ei basa o da'di manek neu Ndia anan Israel so. Neukose o paleta anan-nala, ma masulu-mahapas leme musun-nala mai. Ta'du-tanan nde ia, nae Manetualain hele basa o da'di manek neu anan-nala:

² O la'oela basa au nai faik ia soona, neukose o matongo moo touk dua, deka no Rahel late-na nai Zelza, fo nai Benyamin nusan-na. Neukose lafa'da o lae leo ia, O sanga keledei-la, hapus so. Besak ia, o amam ta hela-hae so'on la'eneu bana sila-la, tehu natane do'e-do'e, muse ana tao leo beek fo natongo no o.”

³ Semuel nafa'da seluk nae, “O la'ok makandoo meme ndia leo ai fo, mamana makaluku-makatele-a nai Tabor. Neukose o matongo moo touk telu bei beela'o leo Betel leu, fo ala tunu-hotu fe Manetualain tutunu-hohotuk. Hataholi esa foo bi'ihiik telu, ma esa neni loti boak 3, ma esa seluk, neni alukosu bana louk esa, angol nai dalek.

⁴ Neukose late'a o, ma neukose ala fe o loti boak telu, fo muse o sipo-man.

⁵ Basa ndia soona, o muse muu leo Manetualain pupukun-na nai Gibea, fo hataholi Filistin-nala mamana ofun-na. Nai lelesu masok leo kota dale neu, neukose o matongo moo nabi bubuak esa, kona leme pupukuk tutunu-hohotuk lain mai. Ala foti-longe ma ala eki beekao, lakaminak gambus, rebana, seruling ma kecapi.

⁶ Nai hatematak ndia boe, neukose Manetualain Duladalen-na koasa o, fo neukose o tunga hataholi sila-la fofoti-lolongen ma eekin-nala, boema ala fe o ha'da-palii beuk, nalosa o masafali da'di hataholi fe'ek.

⁷ Metema, basa sila-la da'di soona, tao su'di beek fo o dodoo-nana malole, nanahu Manetualain no o.

⁸ Basa ndia soona, muse o muu leo Gilgal muu, fo mahani faik hitu nai naa. Mahani te, au mai fo tunu-hotu tutunu-hohotu nanatunuk ma tutunu-hohotu mole-dame, ma au afa'da o, hata fo o muse taon.”

⁹ Saul la'oela Semuel tutik-ka, Saul sipo ha'da-palii beuk neme Manetualain mai. Ma Semuel nafa'dan basa dede'ak lala'en-na boeo, ala da'di nai faik ndia boe.

¹⁰ Lelek Saul no malalau-maoonon losa Gibea boema, latongo loo nabi bubuak esa. Nai hatematak ndia boe, Manetualain Duladalen-na koasa Saul, de ana tunga nabi sila-la fofoti-lolongen ma eekin-nala.

¹¹ Hataholi fo nalelak-kana neme makahulun eli mai, lita ha'da-tataon ndia, boema esa natane esa nae, “Ade, hata da'di Kish anan ndia so? Ade, Saul boeo, da'di nabi do?”

¹² Boema hataholi esa, ana leo nai ndia, natane nae, “Tao leo beek no nabi fe'ek sila-la – tunga emi hahapum-ma, sila aman nde see?” Dede'a bini ia, dada'di makasososan-na nde ndia, “Ade Saul boeo, da'di nabi do?”

¹³ Saul foti-longe ma eki basa boema, neu leo mei tunu-hotuk-ka nai pupukuk lain.

¹⁴ Saul to'on nita Saul no malalau-maoonon boema, natanes nae, “Emi meme bee mai.” Saul nataa nae, “Ami sanga keledei manamopok sila-la, de lelek ami ta hapu fas boema, ami meu leo Semuel meu.”

¹⁵ Saul to'on natanen nae, “De nafa'da o beek?”

¹⁶ Saul nataa nae, “Nafa'da nae hapu bana sila-la so.” Tehu Saul ta tui to'on, nae Semuel ndo ei basan da'di manek so.

Saul nanahelek da'di manek

¹⁷ Boema, Semuel naloo laun Israel-la, fo lakabubua nai Mizpa,

¹⁸ de nafa'das nae, “Manetualain, fo Israel Manetualain-na, nafa'dak-ka nde ia, ‘Au o emi kalua meme Masir mai, ma Au soi-po'i emi neme hataholi Masir-ra koasan-na mai, ma leoina fe'ek lala'en fo manatuni-ndeni emi so.

¹⁹ Au soi-po'i emi neme basa doidosok ma honggu'uk lala'en-na mai so, tehu besak ia, emi ta sipok Au, fo emi Manetualaim-ma fa, nanahu emi moke, fo ela Au atu'du fe emi manek esa. Nah, malole so, de makabubua nai Au, fo emi Manetualaim Manakoasam-ma matan, tunga emi esa-esak leon.’ ”

²⁰ Boema Semuel nadenu basa leo-la leu leo uluk leu, de hehelek-ka la'e Benyamin leon-na.

²¹ Lelek ladenu basa teidalek manai Benyamin leona dalek, leu leo uluk leu, boema hehelek-ka la'e Matri teidalen-na. Mate'en-na, basa touanak manai teidalek Matri dalek leo uluk leu, de hehelek-ka tu'da la'e Saul, fo Kish anan-na. Boema ala sanga Saul, tehu taak-kana.

²² Hu ndia de, hataholi-la latane Manetualain lae, “Ou Manetualain ade hataholi ndia, nai ia so do beik?” Manetualain nataa nae, “Saul ke'ke nai bua-lo'as nanasadiak-kala dean-na.”

²³ Boema no lai-laik, leu lala Saul neme ndia mai, de loon leo laun-na tala'da heon neu. Boema Saul napadeik neu hataholi sila-la tala'da, de ndia nde madema nanseli; hataholi fe'ek-kala losa ka'da alun-na.

²⁴ Basa boema, Semuel nafa'da laun-nala nae, “Manetualain, hele hataholi-a nde ia, ta hapu hataholi nai ita dalek, sama-na leo hataholi ndia fa.” Leoina ndia lala'en-na, ala eki ma lae, “So'dak soaneu manek-ka!”

²⁵ Basa boema, Semuel nafa'da mangalele'do leoina ndia, la'eneu manek-ka hak-ka ma bela-ba'un, boema ana sulak-kana nai susulak fo nanape'dak nai mamana malalao-malalafuk-ka dalek. Basa ndia boema, Semuel nadenu leoina ndia lala'en-na, fali le'us leo esa-esak uman neu.

²⁶ Saul boeo, ana fali leo uman-na nai Gibea, de Manetualain nakababale hataholi palani ta'ti batu de'ubee dalen-nala, fo ala tunga loon.

²⁷ Tehu, hataholi mangalauk de'ubee lafa'da lae, “Masa bole, hataholi ia masosoa-ndandaak ba'eneu ita?” Lakadadaek Saul, ma ala ta fen bua palsen fa, Tehu, ta'ko ana ta bubuluk fa.