1RAJA-RAJA 8 - Susula Malalaok Hehelu Palak Ma Hehelu Beuk

Leni Manetualain Peti Hehelu-balataan leo Uman neu

¹ Basa ndia boema Mane Salomo naloo lasi-lasi leo-la ma teidale-bobongik lala'en-na leme Israel mai fo latongo loon nai Yerusalem, fo ala laliheok Manetualain Peti Hehelu-balataan neme Sion, kota Dauk, leo Manetualain Uman neu.

² Boema basa-basas mai nai Fai Malole Lalaa Akidook-ka nai bulak Etanim fo hataholi Yahudi-la bulak-ka hitun-na.

³ Basa lasi-lasik sila-la lakabubua basa boema, basa imam mala so'u-la Peti Hehelu-balataak ndia,

⁴ de ala lenin leo Manetualain Uman-na neu. Basa imam ma hataholi Lewi-la laliheok Manetualain Lalaa teman-na ma basa bua-lo'an lala'en-na leo Manetualain Uman-na neu boe.

⁵ Mane Salomo ma basa laun Israel-lala'en-na lakabubuan-na i Peti Hehelu-balataak ndia matan-na, boema ala tunu-hotu fe Manetualain bi'ilopo, ma sapi fo ta leke-na dede'un-na fa.

⁶ Basa ndia boema, basa imam mala leni Peti Hehelu-balataak ndia leo Manetualain Uman neu de ala pe'dan nai mahahae nusa so'dak sila-la doki dulan daen-nai Kama Malalao-malalafuk nanseli-a dalek.

⁷ Doki-dulak sila-la li'dan-nala lalaaketu peti ndia no ai ndondolo nala.

⁸ Ai ndondolok sila-la manaluina, nalosa memetek pe'da nala neme Kama Malalao-malalafu ka uluk mai. (Losa besak ia, ai sila-la bei lai ndia.)

⁹ Nai Peti Hehelu-balataak ndia dalek, ta hapu hata esa boen, ka'da batu bebelak dua lai dalek. Musa tao batu sila-la leo dalek neu neme Lete Sinai fo lelek Manetualain tao hehelu-balataak no leoina Israel-la nai lelek lai leleo-lala'o nala dalek leme Masir leo Kanaan leu.

¹⁰ Nai lelek basa imam-mala kalua leme Manetualain Uman ndia mai, no kaiboik uma ndia henuk no ko'as-sa.

¹¹ Ko'as ndia nandela-nansa'a neme Manetualain matua-mademan mamai na, nalosa basa imam sila-la ta hapu leo dalek leu seluk soaneu lakalala'ok sila bela-ba'un.

¹² Boema Salomo hule-haladoi nae, “O nde fe le'do mamanak nai lalai, ou Manetualain. Tehu O hii leo nai ko'a makahatuk dale.

¹³ Besak ia au afofo'a uma mana'ahiik soaneu O, soaneu O mamana leleo ma losa dodoon-na.”

Mane Salomo-a kokolak neu laun-na

¹⁴ Mane Salomo-a hule-haladoi basa boema ana lipa leo basa laun manalapadeik lai ndia lala'en-na, boema ana dokodoe Manetualain baba'e-papalan soaneus.

^15-16 Ana nafa'da nae, “Makahulun-na Manetualain naheluk basa no au amang Dauk nae leo ia: ‘Lelek Au oo Au anang-ngala kalua leme Masir mai, nai basa nusa Israel-la lala'en-na, ta hapu kota esa boen fo Au helen da'di mamanak, fo nai bee muse nafofo'a uma soaneu mamana hule-haladoik neu Au. Tehu o, Dauk, Au helen soaneu paleta Au anang-ngala.’ Kokoa-kikiok ba'eneu Israel Manetualain fo Ana tao natetu hehelu-balataan ndia so!”

¹⁷ Salomo kokolak nakandoo nae, “Au amang Dauk tutu'u basa soaneu nafofo'a uma fo mamana hule-haladoik neu Israel Manetualain.

¹⁸ Tehu Manetualain nafa'dan nae, ‘O dale tutu'um ndia malole.

¹⁹ Tehu, ta o fa, te o ana ma nde neukose nafofo'a Au Umang ndia dei.’

²⁰ Besak ia Manetualain tao natetu hehelu-balataan so. Au da'di mane Israel nggati au amang so, ma au afofo'a basa uma soaneu mamana hule-haladoik neu Israel Aman, Manetualain so.

²¹ Nai Manetualain Uman ndia dalek, au sadia basa mamanak soaneu Peti Hehelu-balataa ka fo isin-na batu hehelu-balataak neme Manetualain no ita bei-ba'i kai nala nai lelek Ana nos kalua leme Masir mai.”

Salomo huhule-haladoin

²² Basa ndia boema, nai laun manai sila-la matan, Salomo napadeik nasale leo mei tunu-hotuk-ka neu boema ana so'uk liman duas

²³ de ana hule-haladoi nae, “Amak, fo Israel Manetualain na! Nai lalai do nai daebafak-ka boe, ta hapu hata fo sama leo O fa! O tao matetu O hehelu-balataam ma O matu'du O susue-lalaim neu O anam fo manalilinekak ma manatunga O no dalek-katema tuak.

²⁴ O tao matetu O hehelu-balataam neu au amang Dauk so. Hata fo O heluk ndia, faik ia O makalala'o kana so.

^25-26 O boeo maheluk basa moo au amang mae metema tititi-nonosin te'e-te'e ala tunga Au sama leo ndia, soona neukose o tititi-nonosim da'di manek neu Israel tataas esa. Besak ia, ou Amak, fo Israel Manetualain na, tao matetu basa hata fo O helu basan neu au amang Dauk, fo O atam ndia.

²⁷ Tehu, ou Manetualain, tete'e ka O nau leo nai daebafak ia do? Lalai lala'en-na boeo, loloan-na ta dai soaneu O fa, mu'da hata no uma hule-haladoik fo au afofo'ak ia!

²⁸ Ou Amak, fo au Manetualaing nga, au ia, O atam! Tehu sa'di leo been-na, mamanene au hule-haladoing, ma sipok ma au dokodoeng faik ia.

^29-30 Ela leo been-na lele'do-le'odaen O masulu-mahapa uma ia, fo O hele basan da'dileo mamana hule-haladoik neu O. Ela leo been-na neme O mamana leleom manai nusa so'dak-ka, O mamanene ma fe do'o do ampon neu au boema O ana mala metema ami masale leo uma ia mai fo hule-haladoi neu O.

³¹ Metema hataholi esa nanakalaak nasala neu hataholi fe'ek fo loon leo O mei tunu-hotum manai uma hule-haladoik ia dalek soaneu ana soo-supa nae ta nasala fa,

³² ou Amak, ela leo been-na O mamanenen nai nusa so'dak-ka, ma maketu O atam ia la dede'a na. Huku manamasala ka nandaa no tatao-nono'in, ma po'i sala taa ka.

³³ Metema musu a sengi O anam Israel nanahu ala lasala-lasingo, boema ala fali leo O mai ma ala fe ha'da-holomata neu O da'dileo Manetualain, basa boema ala mai leo uma hule-haladoik ia mai boema ala dokodoe loke do'o do ampon neu O soona,

³⁴ ela leo been-na O mamanenes nai nusa so'dak-ka. Sa'di leo been-na O fe do'o do ampon neu O anam ia la sala-singon, ma moos fali leo nusak fo O fe basan neu sila bei-ba'i kai nala so.

³⁵ Metema O ana mala lasala-lasingo neu O fo O hukus nenik O ta makona fes u'dan fa boema ala tukatei-saledale leme sila sala-singo nala mai, ma ala fe ha'da-holomata neu O da'dileo Manetualain, basa boema ala la'ok lasale leo uma hule-haladoik ia mai, boema ala hule-haladoi neu O lae,

³⁶ sa'di leo been-na, neme nusa so'dak-ka mai, O mamanene sila. Ma fe do'o do ampon neu O ana mala ma sila manen-na sala-singo nala. Manolis tao hata fo ndoos sa. Basa ndia soona, ou Manetualain, makona u'dan leo O nusam ia, nusak fo O fen neu O ana mala soaneu da'di sila nuun losa dodoon-na.

³⁷ Metema la'andoes do he'di-laus sa'e na nusak ia, ma ani mato'bi ka, lama-bobo'i do lamak-kala tao lalutu bubu'u-palusa nala, do metema musu a sapun-na O ana mala do he'di-laus sapun-nalas soona,

³⁸ ela leo been-na, O mamanene hule-haladoin-nala. Metema neme O anam Israel hapu nggelok no dale he'dik ana hule-haladoi neu O no ana so'uk liman-na nasale leo uma hule-haladoik ia mai soona,

³⁹ sa'di leo been-na, O nai O mamana leleom manai nusa so'dak-ka mamanene boema fe do'o do ampon ma tulu-falis. Ka'da O mesam-ma nde bubuluk hataholi daebafak-ka dale bobongo anan-na. Hu ndia de, tao hataholi esa-esak nandaa no tatao-nono'i nala,

⁴⁰ fo ela O ana mala tunga O tataas esa nai lelek ala leo nai nusak fo O fen neu ami bei ba'i kai mala.

^41-42 Metema hataholi manamai esa nusa dook namanene la'eneu O matua-mademam ma la'eneu manada'di beu kala fo O tao basan soaneu O ana mala, boema ala mai leo uma hule-haladoik ia mai, fo fe ha'da-holomata neu O ma hule-haladoi neu O soona,

⁴³ ela leo been-na, neme O mamana leleom manai nusa so'dak-ka, O mamanene hule-haladoin ma O sipok nonoken-na. No enok ndia, basa leoina manai daebafak-ka lala'en-na lalelak O ma ala tunga O sama leo O anam Israel. Neukose ala bubuluk lae uma fo au afofo'ak ia nde been-na mamanak soaneu hule-haladoi neu O.

⁴⁴ Metema O paleta O ana mala soaneu leu latee-latati la'ban musu a, boema su'di lai mamanak bee boe, ala lasale leo kota fo O nde helen ia mai, ma ala hule-haladoi lasale leo uma fo au afofo'an soaneu O ia soona,

⁴⁵ ela leo been-na nai nusa so'dak-ka O mamanene sila hule-haladoin ndia, ma fe sesengik neus.

⁴⁶ Memak tete'e ka ta hapu hataholi esa boen ta nasala-nasingo neu O fa – Tehu metema O ana mala lasala-lasingo neu O – boema hu ka nde O nasa-melum de O po'ilotak musu a sengis, de loos da'dileo hataholi nanafook leo nusak esa nai dook-ka do nai mata boeo,

⁴⁷ ela leo been-na, O mamanene hule-haladoin-nala. Metema nai nusak ndia ala tukatei-saledale leme sala-singo nala mai, ma ala hule-haladoi neu O no manaku lae sila-lasala-lasingo so, ma tao tatao-nono'i mangalauk soona, mamanene sila hule-haladoin-nala, ou Manetualain.

⁴⁸ Metema nai nusak ndia, sila no dale ndoos ma te'e-te'e tukatei-saledale leme sala-singo nala mai, ma ala hule-haladoi neu O no lasale leo nusak fo O fen neu ami bei ba'i kai mala ia, lasale leo kota fo O nde helen na, ma uma hule-haladoik fo au afofo'a basan soaneu O ia,

⁴⁹ soona neme O mamana leleom manai nusa so'dak-ka, ela leo been-na O mamanene sila hule-haladoin ma sue-lais.

⁵⁰ Fe do'o do ampon neu basa sala-singok ma sila nalelesin la'eneu O a, ma tao ma sila musun-nala tao malole neus.

⁵¹ Sila nde been-na O ana mesam, fo O moos kalua leme Masir mai, fo mamanak sila nana tuni-ndenik.

⁵² Ela leo been-na O, ou Manetualain taoafik tataas esa neu O anam Israel no manen-na. Ma sa'di leo been-na O mamanene sila hule-haladoin nai lelek laloo bebou loke tutulu-fafalik neu O.

⁵³ O, ou Manetualain O hele basa sila leme leoina lala'en-na dalek mai soaneu da'di O ana mesam so, sama leo hata fo O mafa'da neus tunga O atam Musa, lelek O hela-nole ami bei-ba'i kai mala kalua leme Masir mai.”

Huhule-haladoik-ka mate'en-na

⁵⁴ Eno na leondiak, Salomo hule-haladoi no ana senek nai mei tunu-hotuk-ka matan ma ana so'uk liman-na leo lain neu. Basa ndia boema napadeik,

⁵⁵ ma no napane'e hala na, ana noke Manetualain baba'e-papalan soaneu basa hataholi manalakabubua lai ndia nae,

⁵⁶ “Koa-kio Manetualain fo Ana fe basa mole-dame neu anan-nala sama leo hata fo Ana helun tunga atan Musa. Basa hata malole fo Ana helu ka, Ana tao natetun so.

⁵⁷ Sa'di leo been-na ita Manetualain no ita sama leo nok ita bei-ba'i kai nala. Sa'di leo been-na Ana ta la'oela ita fa.

⁵⁸ Sa'di leo been-na Ana tao ita da'di hataholi fo lilineka neun, fo ela ita tasoda tataas esa tunga hihii-nanaun, ma tunga basa hoholo-lalanek, ma paleta fo Ana fe basan neu ita bei-ba'i kai nala so.

⁵⁹ Sa'di leo been-na Amak, fo ita Manetualain na, nafandele tataas esa neu hule-haladoik ma dokodoek fo au anduku-alosa kana neun ia so. Sa'di leo been-na natu'du dale malole na tataas esa neu hataholi Israel-la ma manen-na nenik Ana fes hata fo ala paluun tunga faik.

⁶⁰ No leondiak, basa leoina manai daebafak-ka lala'en-na, neukose bubuluk lae ka'da Amak-ka mesak-kana nde Manetualain ta hapu fe'ek fa.

⁶¹ Ela leo been-na emi, fo anan-nala, lilineka tataas esa neu Amak, fo ita Manetualain na, ma tunga hoholo-lalanek ma paletan-nala sama leo hata fo emi taon nai faik ia.”

Lakatema Manetualain Uman-na

⁶² Basa ndia boema, mane Salomo ma basa hataholi manalakabubua lai ndia, fe tutunu-hohotuk neu Manetualain.

⁶³ Soaneu tutunu-hohotu mole-dame a, Salomo tunu-hotu sapi lifun duahulu dua ma bi'ilopo lifun natun esa duahulu. Leondiak, manek-ka ma basa laun-na lala'en-na tao feta nakatema Manetualain Uman-na.

⁶⁴ Faik ndia boe, Salomo nakatema baba'ek manai tala'da, fo uma so'dan manai Manetualain Uman ndia uluk-ka. Basa boema, nai uma so'dan ndia, ana tunu-hotu tutunu-hohotu nanatunuk, tutunu-hohotu gandum, ma bana mina, soaneu tutunu-hohotu mole dame. Basa sila-la ana tunu-hotus nai mamanak ndia, nanahu mei tunu-hotu liti a ana ka nanseli soaneu basa tutunu-hohotuk sila-la.

⁶⁵ Nai Manetualain Uman ndia, Salomo ma basa laun Israel-la lala'en-na, tao feta Lalaak Akidook-ka faik hitu dalen-na. Hataholi makadotok nanseli lakabubua lai ndia. Ala mai leme nusa dook-ka mai fo mulai neme Eno Hamat ta, fo nai kii, losa leo dae too loo Masir-ra, fo nai kona.

⁶⁶ Neu faik-ka falu na boema, Salomo nadenu hataholi sila-la fali le'us. Hataholi sila-la basa-basas koa-kion boema ala fali leo sila uman no dalen-nala lamahoko, nanahu basa baba'e-papalak fo Manetualain fe basan neu atan Dauk ma neu leoina Israel fo anan-nala.