1RAJA-RAJA 7 - Susula Malalaok Hehelu Palak Ma Hehelu Beuk

Salomo uma manen-na

¹ Salomo boeo nafofo'a uma manen-na. Uma manek ndia nafofo'a na na'a teuk sanahulu telu.

^2-3 Nai uma manek ndia, Salomo taok-kama fo loken lae, “Lalaa Temak Nula Libanon”. Uuku na: nanalu na metel haahulu haa, loloa na metel duahulu dua, ma dedema na Metel sanahulu telu seselik. Lalaa Temak ndia nanuu dii telu lakadadalak fo leme ai kaiou Libanon na mai; dalak esa soona, ala tao dii sanahulu lima neu, ma nai lain, ala pasak lolo ma papak neme ai kaiou Libanon na mai. Uma hunun-na ala pake ai matak esa fo poti ketu ai nananakalelea'ak sila-la.

^4-5 Nai pandopo ndia papalan kii ma kona hapu jendela la: fo nai papalan kii jendela telu lasasale matak loo jendela telu nai papalan kona. Koseng lelesu jendela balakak.

⁶ Salomo boeo nafofo'a “Lalaa Temak Dii nanadama matuaina”. Lalaa Temak ndia nanalu na metel duahulu dua ma loloa na metel sanahulu telu senti lima. Nai pandopo ndia uluk, hapu kama fo dii nanadamak matuaina ma mae'dak.

⁷ Lalaa Temak fe'ek esa seluk nde “Lalaa Temak Kandela Manek” fo loken lae Lalaa Temak Manamaketu-mala'dik boe. Lalaa Temak ia mulai neme laten-na losa lolo nananakalele'ak-kala, lakapopo-taman nenik ai kaiou Libanon. Nai pandopo ia nde Salomo naketu dede'ak.

⁸ Salomo mamana leleon-na ala tao lan sama leo uma fe'e kala, nai Lalaa Temak Naketu-nala'dik-ka dean-na. Soaneu saoinan-na fo nde mane Masir-ra anafe'o soona, Salomo nafofo'a fen uma fo matak esa boe.

⁹ Basa uma sila-la, boeo uma so'dan-na, mulai neme fanderen na losa puni na, nanataok neme batu mana'ahiik-kala mai. Batu sila-la nanasadiak nai mamana kakali batu a, ma ala tatis tunga uuku na; ala tao latetu batu sila dea dalen nenik hoholo batu.

¹⁰ Uma sila-la fanderen nala, ala taon neme batu matuainak-kabeli kala. Batu sila-la nggelok nanalun-na metel telu seselik, ma nggelok metel haa.

¹¹ Nai lain, ala pasak batu fe'ek kabeli kala, boema ala poti ketun nenik ai kaiou Libanon.

¹² Papala nanadamak manai uma manek-ka so'da na, ma nai Manetualain Uman-na so'dan manai dalek-ka boema pandopo a papala nanadaman manai Manetualain Uman-na uluk basa-basan nanataok neme ai kaiou Libanon, fo lakatoto'dok batu ta'dak teli soona ai ta'dak esa.

Huram bela-ba'un soaneu tao namadai Manetualain Uman-na oe-isin

^13-14 Nai kota Tirus sa hapu touk esa na'de Huram. Hataholi ndia te'e-te'e malelainan-nanseli nai tao bua-lo'a liti mata-matak lala'en-na. Aman fo maten so, nde been-na hataholi Tirus ma malelainan-nanseli nai bua-lo'a liti dalek. Inan neme leo Naftali mai. Mane Salomo-a nadenu hataholi neu nala Huram soaneu mai nalanga basa manatao bua-lo'a liti la tatao-nono'in lala'en-na. Boema Huram mai de ana tao hata fo Salomo noken.

Dii matuaina duan-nanataok neme liti mai

¹⁵ Huram tao na dii liti dua, esa soona dedema na metel falu, baba'un-na metel lima senti telu hulu, ma liti kakaten-na senti hitu ma mili haa. Dii sila-la dalen-nala kapoos.

¹⁶ Ana tao na dii langak dua neme liti mai soaneu dii sila-la, fo esa soona, dedema na metel dua senti dua hulu.

^17-20 Lupa na sama leo laisona se'ba fo dedema na metel esa senti falu hulu. Dii langak sila-la esa soona nanabalias nenik dalima boak, dalak dua neme liti a mai. Nai basa dii langa sila-la poin-na, hapu dalima boak natun beke duak. Boema Huram nala'e namosina neme liti a mai, de ana taon neu dii sila-la poilain-nala. Hapu namosinan-nala'e hitu nai dii la esa-esak poilain-na, ma nai namosinan-nala'ek sila-la esa-esak poilain-na boeo hapu netes bobongok esa. Nai netes bobongok ia lain nde,

^21-22 dii langak fo lalupa laisona se'ba ndia nde nanapasak neu dii sila-la. Lapadedeik dii sila-la nai lelesu masok leo Manetualain Uman-na uluk – esa nai boboan kona ma esa nai boboan kii. Fo manai boboa konan-na, ala foin na'de Yakhin ma manai boboa kiin-na ala foin na'de Boas. Leondiak Huram tao nakababasak dii sila-la.

Nggusi liti

²³ Basa boema Huram tao na nggusi liti esa bobongok, no uuku na leo iak: dedeman-na metel dua senti duahulu, bafan-na loloan-na metel haa senti haa hulu, ma bobongo na metel sana hulu telu senti dua hulu.

²⁴ Su'un manai dean-na nanabalias okofefeok nenik nggela boa nanadoki-dulak dalak dua, de dama nakabubua no nggusi ndia.

²⁵ Nggusi ndia nanape'dak nai sapi liti nanadoki-dulak sanahulu dua muliha'in lain – telu lasale leo kii neu, telu leo kona neu, telu leo muli neu ma telu leo dulu neu.

²⁶ Nggusi ndia kakaten-na mili hitu hulu lima. Su'udoo na nalupa leo mango tee su'udoo na fo ana dilu leo deak neu, fo hihinae nae leo laisona se'ba manamakapelak-ka. Nggusi ndia nanalan-na fafa'kama oe liter lifun haahulu.

Kaleta liti la

²⁷ Huram taon-na kaleta liti sanahulu boe, fo esa soona, nanalu na metel esa senti falu hulu, loloa na metel esa senti falu hulu, dedema na metel esa senti telu hulu.

²⁸ Ala tao papa balakak neu kaleta sila dalen-nala.

²⁹ Papak sila-la nanabalias nenik doki-dula singa, sapi ma mahahae nusa so'dak. Nai papak sila su'u na – nai dulak singa ma sapi sila-lain ma dae – ala lona bunga nanan-nala'e ka doki-dulan neu.

³⁰ Kaleta sila-la esa soona, nanuu ei liti haa, ma ei na dalek boeo neme liti mai. Nai kaleta sila-la bu'un haas, hapu dii manato'ba bokol fo nanataok neme liti mai no nana balias nenik bunga nananala'ek nai boboan deak.

³¹ Dii manato'ba ka haak sila nisilain-na natutik no papa bebela bobongok esa fo ana to'ba bokor la. Dii manato'bak sila dema lena de dedema na senti haahulu haa nai papa balakak ndia lain, ma senti duahulu duan nai dae. Nai lelesu-a su'u doon ndia bafan-na hapu doki-dulak.

³² Ein-nala dedema na senti neehulu nee; fo nai papak kala dae. Ein-na tala'da heon, da'di esa no kaleta.

³³ Ein sila-la sama no kaleta musu a ei na; ein-na no basa heo-han lala'en-na, nanataok neme liti a mai.

³⁴ Hapu dii manato'bak haa nai bu'uk kala esa-esak nai kaleta ndia dae. Dii sila-la lalupa baba'ek esa loo kaleta.

³⁵ Nai kaleta ndia boboan lai hapu su'udook fo loloa na senti duahulu dua. Dii mana to'ba na ma papan nala da'di esa no kaleta.

³⁶ Dii manato'ba kala ma papa kala nanabalias nenik mahahae nusa so'dak-ka dulan-na, singa dulan-na, ma ai palem ma dulan-na nai mamanak bee fo hapu mamana louk soaneu nanabalias, sama-sama no bunga nananala'ek okofefeo-la dii la.

³⁷ Kaleta sila-la tatao na leondiak. Basa-basas matak esa – lupak esa ma uukuk esa.

³⁸ Huram taon-na bokor matuaina sanahulu boe, fo kaleta esa na hapu esa. Bokor sila-la esa-esak loloa na metel esa senti falu hulu.

³⁹ Huram pe'da kaleta liman-nai Manetualain Uman-na boboan kona, ma liman-nai boboan kii. Ana tao nggusi liti nai bu'uk manai boboan kona duluk.

Susulak fo nanasula keke'uk la'eneu Manetualain Uman-na bua-lo'an namadai

^40-45 Huram tao tasu, sakop ma mango boe. Basa ndia boema, basa la'iesak tatao-nono'ik lala'en-na ba'eneu Mane Salomo soaneu Manetualain Uman-na. Bua-lo'a mana daik fo ana taok-kala nde ia: Dii matuaina dua Dii langak dua lalupa mango fo nanape'dak nai dii ka duak sila-lain Namosinan-nala'ek nai dii langak-kala esa-esak Dalima liti natun haa de nananakatoto'dok nai dalak dua dalek fo okofefeo la namosinan-nanaane ka nai dii langa kala esa-esak Kaleta sanahulu Bokol matuaina sanahulu Ule bobongo manalu liti Sapi liti fo manato'ba ule bobongo manalu ndia sanahulu dua Tasu, sakop ma mango. Basa bua-lo'a manadaik soaneu Manetualain Uman ndia fo Huram tao fe Mane Salomo-a, nanataok neme liti ma nanalosek losa mangadilak.

⁴⁶ Manek-ka nadenu tao bua-lo'as sila-la neme mamanan-natanoe liti a nai Sukot ma Sartan tala'da fo nai Bafak Yarden na.

⁴⁷ Salomo ta nadenu tai bua-lo'a liti sila-la fa, nana dede'u nala makadotok nanseli. Da'di ta bubuluk bua-lo'as sila-la bela nala fa.

^48-50 Mane Salomo boeo nadenu tao lamadai bua-lo'a fe'ek neme lilopilas sa mai soaneu Manetualain Uman-na. Bua-lo'a nanatao namadai kala nde ia: Mei tutunu-hohotuk Mei soaneu loti fo ala fen neu Manetualain Banu eik sanahulu fo ala taon nai Kama Malalao-malalafu ka matan-na, fo lima lai boboan kona ma lima lai boboan kii Bunga la Banu kala Sepit-sepit Mangotee Buas soaneu taonisa banu ka Mango la Pingak soaneu boomenik Pingak soaneu ha'ikaa bei manapilak Hensel-hensel soaneu lelesu Kama Malalao-malalafu ka ma lelesu manai Manetualain Uman-na deak.

⁵¹ Mane Salomo naofo'a basa Manetualain Uman-na boema, ana pe'da basa lilofulak, lilopilas, ma bua-lo'a fe'ek fo aman Dauk fen neu Manetualain na, lai uma ndia gudang ngala dalek.