1RAJA-RAJA 4 - Susula Malalaok Hehelu Palak Ma Hehelu Beuk

Salomo hataholi mana'a ngga'di nala

¹ Salomo da'di manek neu basa nusa Israel-la lala'en-na.

^2-6 Manaho'u paleta madema fo Salomo so'u kala nde ia la: Imam-imam: Zadok, Azarya fo Zadok anan-na, Abyatar. Hataholi manasulak susulak-ka nde: Elihoref ma Ahia fo Sisia anan-nala. Hataholi manape'da doi ka nde: Yosafat fo Ahilud anan-na. Malanga solda'du matuaina nde: Benaya fo Yoyada anan-na. Manamanea basa bupati la nde: Azarya, fo Natan anan-na. Manamanoli-mafa'da manek-ka nde: Imam Zabud, fo Natan anan-na. Uma manek-ka malanga uma loon-na nde: Ahisar. Malanga manamanea bela nusak-ka nde: Adoniram, fo Abda anan-na.

⁷ Salomo so'u bupati sanahulu duan nai basa nusa Israel-la lala'en-na. Sila bela-ba'un nde pe'da lakabubuan-na na'a-nininuk fo maneme sila nusan dale mai soaneu manek-ka ma uma manek-ka isin-nala. Bupati la esa-esak fe natataak neu dede'ak ndia nai bulak esa dalen-na tunga teuk.

^8-19 Filana esa nalanga bupati kasanahulu duak sila-la. Bupati sila-la na'den-nala ma sila nusa paletan-na nde ia: Ben-Hur: nusak manai letelepak Efraim. Ben-Deker: kota Makas, Saalbim, Bet-Semes: Elon, Bet-Hanan Bet-Hesed: kota Arubot, Sokho, ma basa nusa Hefer lala'en-na Ben-Abinadab, Tafat fo Salomo-anafe'ona saotou na: basa nusa Dor-ra lala'en-na. Baana fo Ahilud anan-na: kota Taanakh, Megido, ma basa nusak manadeka Bet-Sean, deka kota Sartan-na nai kota Yizreel boboan kona losa leo kota Abel-Mehola ma kota Yokmeam-ma. Ben-Geber: kota Ramot nai Gilead, nggolo-nggolok manai Gilead-ala, fo leo Yair-a nuun ndia. Leo Yair ndia, Manasye tititi-nonosin sila, nusa Argob-a nai Basan; basa-basan lala'en-na kota matua neehulu fo ala tao latea-lahelen nenik kota musu ma ala tao ai betubala liti neu lelesuinan-nala. Ahinadab fo Ido anan-na: nusa Mahanaim ma, Ahimaas, Salomo-anafe'on Basmat sao tou na: Nusa Naftali Baana fo Husai anan-na: nusa Asyer, ma kota Alot Yosafat fo Paruah anan-na: nusa Isakhar Simei fo Ela anan-na: nusa Benyamin Geber fo Uri anan-na: nusa Gilead, fo makahulun-na Sihon fo mane Amori koasan-na ma Og fo mane Basan.

Salomo paletan-na matua-mademan

²⁰ Laun Yehuda ma Israel dede'u na sama leo solokaek manai tasi su'u na. Sila nana'a nininun dai boema so'da nala malole.

^21-25 Basa teidalek-kala lanuu osi angol ma osi ai kaak. Nai Salomo fai maso'da na, laun manai Yehuda ma Israel-lala'en-na, neme kota Dan-na losa kota Bersyeba laso'da nee nee-lino linok boema tetu-temak. Nana, basa manek manai lee Efrat-a boboan muli, lakatele neun, ma basa leoina maleme nusaina manai nusan-na boboa kaisun, tao tiak loon. Dae manai Lee Efrat-a boboan muli, fo mulai neme Tifsah, nakandoo leo muli neu, fo leo kota Gasa nai Filistin losa Masir dae too na, Salomo koasa basan lala'en-na. Leoina manai nusak ndia, lakatele neun ma ala fe kefek. Nana'ak fo Salomo paken tunga faik nde been-na ha'desopu lutuk kilo lifun lima, ma ha'desopu selak kilo lifun sanahulu, sapi nakaboboik sanahulu, sapi nana po'ilotak duahulu, ma bi'ilopo natun esa. Fe'ek neme ndia mai boe, nusa mata-matak-kala manupui mata-matak-kala.

²⁶ Salomo nanuu solda'du manasa'e ndala lifun sanahulu dua ma ndala manahela kaletan-nala, lalae lifun haahulu.

²⁷ Nai bulak esa dalen-na, bupati la langganggati aok fe nana'ak soaneu Mane Salomo ma soaneu basa hataholi manahapu nana'ak manai uma manek-ka, nalosa ala ta to'a-taa hata esa boen.

²⁸ Bupati sila esa-esak boeo fe gandum ma ha'deaik soaneu Salomo ndalan-na la, nau ndala sasa'ek do ndala manahela kaleta la boe. Leni bana sila nana'a na leo ndala-la lalae na neu fo dede'un-na, ba'u ala paluu ka.

²⁹ Manetualain fe Salomo manatee-tenok, ma malela matuaina boema dudu'a-aafi mademainan-nanseli.

³⁰ Nai nusak dulu la ma nai Masir ta hapu hataholi malela na lena fan.

³¹ Te'e-te'e malela na lena basa hataholi-lala'en-na. Ana lena Etan fo hataholi Ezrahi, Heman, Kalkol ma Darda fo Mahol anan-nala. Salomo na'den-na nananita-nalelak nai mamanak lala'en-na nai nusa-nusak manai nusan-na boboa kaisun.

³² Ana tao na dede'a bini lifun telu ma nakameek lifun esa lenak.

³³ Ana tui nalelak ai la ma bubu'u-palusa tutuin-na – neme ai kaiou Libanon nala losa na'u hisop fo ana moli nai batu papala kala. Ana kokolak nalelak la'eneu bana manu boe, sama na leo manupui, bana manalo'do lae ka ma i'a kala.

³⁴ Mane-manek manai daebafak-ka lala'en-na lamanene la'eneu Salomo malela na, nalosa ladenu hataholi neu fo lamanenen ana kokolak.