1RAJA-RAJA 20 - Susula Malalaok Hehelu Palak Ma Hehelu Beuk

Natee-natatik no Siria

¹ Faik esa boema, Benhadad, fo mane Siria, naloo nakabubua basa solda'dun-nala lala'en-na, sama-sama no mane fe'ek teluhulu dua loo kaleta musun-nala, ma sila ndalan-na la, de lakahapi la kota Samaria.

² Boema nadenu hataholi neu leo Ahab, fo Mane Israel-la nai kota ndia no hala heheluk-ka nde ia nae,

³ “Mane Benhadad a noke no nakasetik, fo ela o fen lilopilas, lilofulak, o saoinam-mala, ma o ana mabe'i-balakai mala.”

⁴ Ahab nataa nae, “Mafa'da ama manek Benhadad a mae au akaheik. Ndia bole soa au o hata-hetom lala'en-na.”

⁵ Basa boema hataholi nadedenuk ndia fali seluk leo Ahab neu, fo nanduku-nalosak Benhadad nonoken-nakaseti fe'e na. Nonoke nakasetik ndia nalii nae leoia, “Makahulun-na ami manem-ma noke nakaseti fo ela o fen lilopilas ma lilofulak boema o saoinam-mala ma o ana mabe'i-balakai mala.

⁶ Tehu besak ia, neukose nadenu malanga solda'du la fo ala nggale'da o uma manem-ma, ma o hataholi mana'a ngga'di mala uman-nala, boema ala ho'i la su'di beek fo ala bubuluk lae bua kabelik. Balahaa fafa'kama li'u leo iak te, neukose ala mai leo ia mai.”

⁷ Boema Mane Ahab-pa naloo basa mauli-malanga Israel-la de nae, “Emi sakasii matam mae hataholi ia sanga tao susa-soe ita. Ana noke no nakasetik fo ela au fe au saoinang-ngala ma au anang-ngala boema au lilopila lilofulang-ngala, de au sipok nonoken-nakasetin ndia.”

⁸ Basa mauli-malangan-nala ma laun-na lae, “Boso litu hataholi ndia, Ama Manek! Boso tunga hihii-nanaun.”

⁹ Hu ndia de Ahab nataa Benhadad hataholi nadenun sila-la nae leoia, “Mafa'da Ama Manek, fo emi manem ndia mae au sipok nonoken-nakaseti makasososan-na, tehu nonoken-nakaseti ka duan ia, au ta sipok kana fa.” Boema hataholi nadedenuk sila-la la'o leona, tehu basa boema ala fali seluk leo Ahab mai de lae,

¹⁰ “Neukose ami manem-ma haitua solda'du makadotok nanseli mai fo ala tao lakalulutuk o kotam-ma, nalosa bei ela afu manai o kotam-ma ta dai ala la'u lenik sila liman-na fa. Ana soo fo ela basa lamatua daebafak-kala hukun ma lena-lenak ala taolisan, metema ana ta tao natetu dede'ak ndia fa!”

¹¹ Mane Ahab-a nataa nae, “Mafa'da Mane Benhadad-a mae boso mamatutua dalem-ma nai lelek natee-natati be ta, tehu mamatutua dalem-ma nai lelek basa natee-natatik-ka.”

¹² Ahab natataan ndia landuku-lalosa kana neu Benhadad nai lelek ana sama-sama no mane-mane fe'ek fo sila dalek esa, bei linu lai sila uma ofun dale. Benhadad namanene dede'ak ndia boema, ana paleta basa malanga solda'du matuainan-nala fo laheheleaon fo ala sapu-la kota Samaria. Boema laheheleaon tutik.

¹³ Ndia te, nabi esa neu leo Mane Ahab-pa neu de nafa'dan nae, “Manetualain nafa'da nae, ‘O mita solda'du makadotok sila-la? Neukose Au fe o sengis faik ia. Fo ela o bubuluk mae Au nde Manetualain na.’ ”

¹⁴ Ahab natane nae, “See kande muse natee-natati-a?” Nabi ndia nataa nae, “Solda'du muli-solu kala, basa malanga nusak-kala manatunga dean-nala. Nae leondia Manetualain na.” Manek-ka natane seluk nae, “Ma see kande nalangan-natee-nanatik ndia?” Nabi ndia nataa nae, “Amak Manek.”

¹⁵ Tutika manek-ka hoka basa solda'du muli-solu kala, basa malanga nusak-kala manatungadean-nala. Solda'du la basa-basas natun dua teluhulu dua. Basa boema ana tao leondiak neu solda'du Israel-la. Basa-basan lala'en-na hataholi lifun hitu.

¹⁶ Ala mulai sapul-las lae fai lele'dok, nai lelek Benhadad ma manek-ka teluhulu duak fo ala da'di dalek esa ndia, bei linu ala-lalu losa ala mafuk nai sila uma ofun dale.

¹⁷ Manatutulumatak makahuluk-ka nde been-na solda'du muli-solu kala. Hataholi fo Benhadad nadenus soaneu mete musu a heo-hilu na, lafa'da Benhadad lae solda'du bubuak esa sapu-la sila leme Samaria mai.

¹⁸ Benhadad fe paleta fo ela ala ho'u la solda'du musu sila no maso'dak, ta paluu ade ala mai soaneu latee-latati do soaneu ala mai dame.

¹⁹ Mane Ahab-pa hoka solda'du muli-soluk sila-la, mulai leme kota Samaria mai, de solda'du Israel-la tunga.

²⁰ Sila esa-esak taonisa musu fo nasasalematak non. Nana hataholi Siria-la lalai, de solda'du Israel-la usis. Tehu Benhadad naladeak. Ana sa'e ndala de nalai sama-sama no solda'dun manasa'e ndala de'ubee.

²¹ Mane Ahab-a boeo masok leo musu dale neu, boema ana tao nakalulutuk kaleta musu la ma ana taonisa ndalan-na la. Faik ndia hataholi Siria-la kala matuaina.

²² Basa boema nabi ndia neu leo Ahab neu de nae, “Besak ia, malolelenak tuan fali fo tao matetea aoinam-ma boema tutu'u eno na no tasak, nanahu mane Siria neukose ana mai sapu seluk nai fai timu.”

Solda'du Siria-la leu sapu kala'i duan-na

²³ Benhadad malanga solda'du matuainan-nala lafa'dan lae, “Leoina Israel-la sene-do'ok neu lamatua daebafa fe'e kala, ala koasa lai letelepa kala, hu ndia de nggileo-bobongik ndia sengi ita. Tehu tao leo bee o ita sengis, metema ita tatee-tatati nai masadokek-kala.

²⁴ Malole lenak besak ia Ama Manek nggatiheni manek-ka teluhulu duak fo sila dalek esa nenik Ama Manek malanga solda'du matuainan-nala.

²⁵ Basa soona, ela leo been-na Ama Manek hoka solda'du la de'u manasengi Ama Manek solda'dun-nala, sama-sama no ndala ma kaleta musu de'u makahulun-na boe. Neukose ita tee-tati leoina Israel ndia nai masadokek kala, soona oek ia, tao leo bee o ita sengi.” Mane Benhadad-a nakaheik, boema ana sipok malanga solda'du matuaina sila-la nanoli-nafa'dan.

²⁶ Nai fai timu manamaik ia boema, ana hoka basa solda'dun-nala de leu leo kota Afek-ka leu, fo sapu-la hataholi Israel-la.

²⁷ Hataholi Israel-la boeo sadia matalolole sila solda'dun-nala de ala la'o. Boema solda'du Israel sila-la tutulumatak nai bubuak dua dalek, de ala ofu lasasalematak loo hataholi Siria sila-la. Metema nakasasamak solda'du Israel-la loo solda'du Siria-la fo ala tapa sasala lahenu mamanak ndia soona, mete solda'du Israel-la sama leo bi'ihiik bubuak dua mesan.

²⁸ Boema nabi esa mai leo Mane Ahab-pa de nafa'da nae, “Manetualain nafa'da ka nde ia: ‘Hu kande hataholi Siria sila-la laedaenga Au koasan-nai ka'da letelepan-na te ta nai masadoke na fa, de neukose Au fe o sengi sila solda'du makadotoinan sila-la. O ma o laum-mala, neukose bubuluk mae Au nde Manetualain na.’ ”

²⁹ Nai faik hitu dalen-na, hataholi Siria-la ma hataholi Israel-la lahele leme sila ofun fo lasasalematak ndia dalek. Nai faik-ka hitu na, boema ala mulai natee-natatik-ka. Nai natee-natatik ndia dalek, solda'du Israel-la taolisa hataholi Siria lifun natun esa.

³⁰ Hataholi fo manaladeak-ka, lalai leo kota Afek ka leu, tehu ndefaheni kota ndia papala nanadama na de ana tuni na sila hataholin lifun duahulu hitu. Benhadad boeo nalai leo kota ndia neu, de ana ke'ke nai uma esa kaman dalek.

³¹ Basa malanga solda'du matuainan-nala mai de lafa'dan lae, “Hataholi la lae, Israel manen-nala nde been-na mane-manek fo lanuu dale manasue-laik. Hu ndia de, fe ami loak fo ami meu mataa mane Israel-la no ami pake si'di lafa lapik da'dileo ta'du-tanan-nasasaledalek ma pa'a tali neu ami botoliim ma da'dileo ta'du-tanan-nakatele neun. Sa'di leo been-na ana ta taonisa Ama Manek fa.”

³² Boema ala pake si'di lafa lapik ma ala pa'a tali neu botoliin-nala, boema leu lataa Ahab de lafa'da lae, “Benhadad nde been-na Ama Manek atan. Ana dokodoe fo ela Ama Manek boso taomisan.” Ahab nataa nae, “Au tolanong ndia bei naso'da do?”

³³ Memak basa Benhadad malanga solda'du matuainan sila-la bei lahani ta'du-tana malole neme Ahab mai. Da'di, nai lelek Ahab nafa'da nae, “tolanok”, boema lataa tutik lae, “Tete'e ka, Benhadad nde been-na Ama Manek tolanon.” Boema Ahab nae, “Moon leo ia mai!” Lelek Benhadad losa boema, Ahab lelekon fo ana sa'e leo kaleta lain neu.

³⁴ Boema Benhadad nafa'dan nae, “Neukose au fe falik kota-kota fo au amang loso nalas neme Tuan aman mai, leo Tuan neu. Boeo Tuan bole mapadedeik pasak nai kota Damsyik ka sama leo au amang taon nai Samaria.” Ahab nataa nae, “No Tuan hehelu-balataan ndia, de neukose au po'i Tuan.” Basa ndia boema, Ahab tao hehelu-balataak no Benhadad boema ana po'in.

Manetualain Nabi na fe salak neu Ahab

³⁵ No Manetualain paletan-na, de nabi esa nadenu nono nabin esa fepa ndia. Tehu nonon ndia ta nau fa.

³⁶ Boema nabi ndia nae, “Hu kande o ta tunga Manetualain paletan-na fa, de o fali meme ia mai tutika, neukose singa esa kaan-na o.” Tete'e ka. Ana fali neme ndia mai tutika singa esa kaan-nan.

³⁷ Basa boema nabi ndia neu leo nabi fe'ek neu de nafa'dan nae, “Fepa au leona!” Boema nabi ndia fepa napane'en nanseli, losa nakahina.

³⁸ Basa ndia boema nabi ndia potiketu mata-panan nenik tema bibiak esa, fo ela hataholi boso nalela kana, boema neu napadeik neu eno ka su'u na, fo nahani mane Israel-la tunga ndia.

³⁹ Lelek manek-ka tunga ndia boema, nabi ndia naloo bou-bou neun nae, “Ama Manek fo Mandela-masa'ak, nai lelek au bei atee-atati nai natee-natatik-ka dalek, solda'du esa ho'un-na musu hataholin esa de non leo au mai. Solda'du ndia nae, ‘Manea matalolole hataholi ia. Metema nalai soona, muse taonisa o fo nggatin do bae doifulak lifun telu.’

⁴⁰ Tehu basa boema, lelek au bei puelau, te hataholi ndia nalai.” Manek-ka nataa nae, “O maketuaom o huhukum-ma so. O muse lu'a-lepaman.”

⁴¹ Nabi ndia bukaheni mata-panan popotin-na, boema manek-ka mete neu te se'kona nabi ndia.

⁴² Boema nabi ndia nafa'da manek-ka nae, “Manetualain nafa'da ka nde ia nae: ‘Hataholi fo Au fe paleta fo ela taonisan te o po'ilota kanan-naladeak so. Hu ndia de, o muse mate nggatin. Neukose o solda'du mala lakalulutuk, nanahu ala po'ilotak solda'du musu a nalai.’ ”

⁴³ Manek-ka fali leo Samaria neu, no dalen-na ta tesapopo-tama fa ma namanasa.