1RAJA-RAJA 2 - Susula Malalaok Hehelu Palak Ma Hehelu Beuk

Dauk hala-hehelu mate'e nala neu Salomo

¹ Lelek Dauk sanga deka maten boema, naloo ana manen Salomo, de nafa'dan hala-hehelu mate'e nala. Dauk nae,

² “Fain-na losa, au mate ia so. Ela leo been-na o mamahele ma mapalani.

³ Tao-no'i hata fo o Manetualain paletan neu o. Tao tunga basa hoholo-lalanen ma paleta-paletan fo nanasulak nai Musa susulan dale, fo ela o muu leo bee muu boeo neukose o hapu buna-boak nai o tutunga-sasangam lala'en-na dalek.

⁴ Metema o tunga neu Manetualain soona, neukose Ana tao natetu hehelu-balataan nae neukose au tititi-nonosing paleta Israel, sa'di no sila dalek-katema tua na ma ao paa samanen lala'en-na lilineka tataas esa tunga paletan-nala.

⁵ Bei hapu dede'ak esa seluk! Tao leo bee o, o mafandendelek hata fo Yoab tao-no'in neu au nenik ana taonisa Israel malanga solda'du matuainan dua, fo nde Abner fo Ner anan-na ma Amasa fo Yeter anan-na. Ana taonisas nai lelek mole-dame soaneu balas kanisak fo ala taon nai lelek natee-natatik-ka. Ana taonisa hataholi sala taa ka, tehu besak ia au nde muse lu'a-lepa tatao-nono'in ma au nde manadoi-dosok-ka.

⁶ Naa, anang-ngo nei, o muse tao hata esa soaneun, tunga hata fo o mafa'da mae malole; ka'da boso po'ilota kana mate no malole.

⁷ Tehu ela leo been-na o tao malole soaneu Barzilai fo maneme Gilead mai a, ana tou nala. O muse tao matetu sila paluu tunga fai na, nana ala tao malole neu au, nai lelek au alai eme o ka'am Absalom mai.

⁸ La'eneu Simei fo Gera anan-na neme kota Bahurim ma, nai leo Benyamin nusan-na, hapu au hala-hehelung-nga neu o. Nai au leleo-lala'ong leo Mahanaim dalek, makahulun-na Simei ndia soo-supa au no nasak. Tehu basa boema, nai lelek ana mai soluk au nai Lee Yarden na, au soo-supa neun nenik Manetualain na'den-na ae neukose au ta taoisa fan.

⁹ Tehu au hala-hehelung neu o a nde ia: boso po'ilota kanan-natapo'i neme huhuku ka mai. Au bubuluk o manatee tenok; da'di, leomae namalasi so, sanga enok fo huku misan.”

Mate Dauk

¹⁰ Basa boema mate Dauk de latoin nai Kota Dauk ka.

¹¹ Ana da'di Israel manen-na, teuk haahulu dalen; ana paleta teuk hitu neme Hebron ma teuk teluhulu telu neme Yerusalem.

¹² Basa boema Salomo da'di manek nggati aman Dauk. Salomo koasan-na da'dileo manek-ka, matea-mahelek nanseli.

Adonia mamaten-na

¹³ Faik esa boema, Adonia neu leo Batsyeba neu. Batsyeba natane Adonia nae, “Ade o mamaim ia no dale hihii malole do?” Adonia nataa nae, “Hei”

¹⁴ Boema ana kokolak nakandoo nae, “Au ahiik oke hata esa neme ina mai.” Batsyeba natane nae, “Beek ndia?”

¹⁵ Adonia nataa nae, “Ina bubuluk mae au nde muse da'di manek-ka. Basa Israel-lala'en-na lamahena dede'ak ndia so. Tehu hata fo ana da'di, fe'ek neme ndia mai; au fa'di nga nde da'di manek-ka, nanahu Manetualain dale hihiin-na leondiak.

¹⁶ Besak ia hapu au nonokeng esa, ela leo been-na Ina sipok kana.”

¹⁷ Batsyeba natane nae, “O moke beek?” Adonia nataa nae, “Au dokodoe fo Ina nau noke Mane Salomo fo anan nau au sao a Abisag fo anafe'oanak maneme Sunem ndia. Au amahele, neukose Salomo sipok Ina nonoken ndia.”

¹⁸ Batsyeba nataa nae, “Hei, malole so, neukose au kokolak dede'ak ndia o manek-ka soaneu o.”

¹⁹ Boema Batsyeba neu leo manek-ka no nahiik kokolak dede'ak ndia soaneu Adonia. Manek-ka fo'a napadeik de ana sipok inan ma senek neun, boema nagatuuk seluk neu kandela manen lain. Basa boema nadenu hataholi sadia fe inan kandela neu boboa konan-na.

²⁰ Batsyeba nangatuuk-na boema nae, “Ina nahiik noke dede'a anak esa neme o mai. Ina namahena o sipok kana.” Salomo natane nae, “Beek ndia, neukose au sipok kana.”

²¹ Batsyeba nataa nae, “Fe o ka'am Adonia loak fo ana saon-na Abisag.”

²² Salomo natane nae, “Taole'e de, Ina noke au dede'ak ndia? Ndia sama no Ina noke fo ela au fen kandela manek nusak ia. Ade au ka'ang ta ndia fa do? Basa bai te, Imam Abyatar ma Yoab look kana!”

²³ Salomo kokolak basa nae leondia boema, ana soo nenik Manetualain na'den-na nae, “Neme na fo Manetualain soo-supan la'e au, metema au ta hukuisa Adonia nanahu nonoken ndia!

²⁴ Manetualain pakunisa au nangatutuu nga neu au amang Dauk kandela manen-na so. Manetualain tao natetu hehelu-balataan ma Ana fe basa kandela manek ia neu au ma au tititi-nonosing so. Au soo unik Manetualain fo maso'dak-ka na'den-na ae neukose Adonia mate faik ia boe!”

²⁵ Boema Mane Salomo fe paleta neu Benaya, boema Benaya neu taonisa Adonia.

Abyatar nanakalua-henik ma Yoab mamaten-na

²⁶ Basa boema Mane Salomo nafa'da Imam Abyatar ra nae, “Muu leo o nggolo-ta'dum nai Anatot. O mandaa nanahukunisak, tehu faik ia neukose au ta taoisa o fa, nanahu lelek o bei sama-sama moo au ama nga, o boeo mame'da mita doi-doson lala'en-na. Ma o boeo nde ito-ato Manetualain Peti Hehelu-balataan.”

²⁷ Boema Salomo kaluaheni Abyatar neme imam-ma mai. No Salomo tatao-nono'in ndia, de hata fo Manetualain nafa'da basan neme Silo la'eneu Imam Eli tititi-nonosin, ana da'di so.

²⁸ Yoab namanene la'eneu basa manada'dik sila-la so. Ana bii nanseli nanahu ana nok Adonia. Tehu, makahulun-na ta nok Absalom fa. Boema anan-nalai leo Manetualain Lalaa teman-na neu, de ana ho'u mei tunu-hotuk-ka pe'da nala.

²⁹ Halak ia nanananduku-nalosak neu Mane Salomo-a. Boema manek-ka nadenu Benaya taonisa Yoab.

³⁰ Benaya neu leo Manetualain Lalaa teman-na neu de nafa'da Yoab nae, “Manek-ka nadenu o kalua meme ia mai!” Yoab nataa nae, “Ta, au ta nau mate nai ia fa.” Benaya fali de nafa'da dede'ak ndia neu manek-ka.

³¹ Manek-ka namanene dede'ak ndia boema nae, “Muu leon fo tao tunga hata fo nafa'dan ndia. Taomisan fo matoin, fo ela au ma au amang tititi-nonosin ta lu'a-lepa seluk neu kanisak fo Yoab taon soaneu hataholi sala taa ka.

³² Neukose Manetualain hukun nanahu kanisak fo ana taon te au amang ta bubuluk fa. Abner, Ner anan-na fo Israel malanga solda'du matuainan-na ma Amasa, Yeter anan-na fo Yehuda malanga solda'du matuainan-na ta lasala fa. Sila malole lena neme Yoab mai, tehu ana taonisas.

³³ Huhukuk hu kande malanga solda'du matuainak-kaduak sila mamaten-na, neukose Yoab no tititi-nonosin-nala lu'a-lepan losa dodoon-na. Tehu basa au amang tititi-nonosin lala'en fo manada'di manek-ka, neukose Manetualain ba'e-palas tataas esa – neukose ala laua-lanale.”

³⁴ Boema Benaya neu leo Manetualain Lalaa teman-na neu, de ana taonisa Yoab neme ndia. Boema latoi Yoab nai daen dale fo nai kota deak.

³⁵ Basa boema manek-ka so'u Benaya da'di malanga solda'du matuaina nggati Yoab, ma Zadok nanandoo eik da'di imam nggati Abyatar.

Simei mamaten-na

³⁶ Basa ndia boema, manek-ka naloo Simei, de nafa'dan nae, “Tao o uma ma neu Yerusalem ia. Leo meme ndia fo boso kalua neme kota mai.

³⁷ Metema o mapalani kalua fo la'ok tunga Lee ana Kidron na soona, o muse nanatao nisak; ma o nde lu'a-lepa salak ndia.”

³⁸ Simei nataa nae, “Hei, Ama Manek Fo Mandela-masa'ak, Neukose au tunga Ama Manek paletan-na.” Boema Simei leo neme Yerusalem teuk de'ubee dalen-na.

³⁹ Basa teuk telu boema dede'ak ia la da'di: Simei atan dua lalai leo Gat leu, leo Mane Akhis sa fo Maakha ana manen-na. Lelek Simei nananafa'dak la'eneu dede'ak ndia, boema ana

⁴⁰ bela nene'ik neu keledei na, boema neu leo Mane Akhis sa nai Gat, fo ana sanga ata kaduan sila-la. Ana hapus boema no falik-kasa.

⁴¹ Lelek Salomo namanene hata fo Simei tao-no'in boema,

⁴² anan-nadenu leu laloo Simei, boema nafa'da nae, “Au fe o maheluk basa menik Manetualain na'den-na mae neukose o ta la'oela Yerusalem fa. Ma au boeo fe basa nasanene'dak neu o ae metema o kalua meme Yerusalem mai soona, o muse mate. Naa, o maheluk basa ma o makaheik soaneu tao tunga au paletang-nga so, hetu?

⁴³ Tehu besak ia, taole'e de o malelesi o hehelum ndia, ma o la'olena au paletang-nga?

⁴⁴ O bubuluk besa-besa moo o tatao-nono'i mangalaum soaneu au amang. Hu no ndia de, neukose Manetualain huku o,

⁴⁵ tehu neukose Ana ba'e-pala au, ma au amang nusan-na neukose Ana tao natea-nahelen losa dodoon-na.”

⁴⁶ Manek-ka nafa'da basa nae leondia boema, ana fe paleta neu Benaya, fo Yoyada anan-na, boema Benaya neu taonisa Simei. Besak ia, Salomo nanuu koasa henuk nai nusan dale.