1RAJA-RAJA 18 - Susula Malalaok Hehelu Palak Ma Hehelu Beuk

Elia ma Obaja

¹ Basa faik de'ubee dalen-na fo nai fai hanas ndia teuk-ka telun-na, Manetualain nafa'da Elia nae, “Muu mataa Mane Ahab-pa, nanahu ta dook-ka so'on te neukose Au fe u'dan-na leo daebafak-ka neu.”

² Boema Elia la'o leona. Nai lelek ndia, soe la'andoes-sa matuainan-nanseli nai Samaria so.

³ Hu ndia de Ahab naloo Obaja fo mai nataa. (Obaja nde been-na uma manek-ka malanga uma loon-na. Hataholi ia nde been-na hataholi esa, te'e-te'e ana hule-haladoi neu Manetualain.

⁴ Nai lelek Isebel taonisa Manetualain nabin-nala, Obaja ia tulu-fali na nabi natun esa nenik nafunis leme leak dale fo hataholi limahulu soona lai leak esa dalek – boema ana fes la'a linu.)

⁵ Ahab nafa'da Obaja nae, “Mai fo ata la'ok okofefeo basa nusak ia lala'en-na fo ata sanga oemata do lee. Fafa'kama ita hapu na'u soaneu ita ndalan-na la ma bana esa na'de bagal fo ela boso mate esa boen.”

⁶ Ala ba'e basa nusak fo neukose ala la'ok okofefeok sila-la boema, ala la'o leon. Ahab tunga enok esa, ma Obaja tunga eno fe'ek.

⁷ Nai eno tala'dak, Obaja natongon-no Elia. Obaja nalelelaok basa no Elia boema, ana senek fo fe ha'da-holomata neun boema natane nae, “Tete'e ka Ama Elia nde ia do?”

⁸ Elia nataa nae, “Tete'e ka, Elia nde au. Besak ia muu leona, fo mafa'da o manem-ma mae au nai ia.”

⁹ Obaja nataa nae, “Au sala beek de, nalosa Ama nau fe au neu Ahab soaneu ana tao nisa au?

¹⁰ No o Amam Manetualain fo maso'dak-ka na'den-na, au afa'da ae manek-ka nadenu basa au sanga Ama nai mamanak lala'en-na. Metema nai nusak esa manakoasan-nala lafa'da lae Ama ta nai naa fa soona, Ahab nakasetis fo ela nusak ndia manakoasan-nala soo lae memak Ama ta nai ndia fa.

¹¹ Ma besak ia ama nau au u atongo on fo au afa'dan ae Ama nai ia?

¹² Metema au la'o eme ia mai soona, neukose Manetualain Dula dalen-na fafa'kama no Ama leo mamanak fo au ta bubuluk-kana fa! Ma metema au afa'da Ahab-pae Ama nai ia, fo ta natongon-no Ama fa soona, taoleo bee o neukose ana taonisa au. Fo ela Ama bubuluk, te au ia te'e-te'e hule-haladoi neu Manetualain neme au bei anang-nga mai!

¹³ Ade Ama beita mamanene lae lelek Izebel taonisa Manetualain nabin-nala, au afuni sila natun esa nai leak dale fo limahulun-nai leak esa dalek – ma au fes la'a linu do?

¹⁴ Besak ia, taole'e de Ama madenu au u afa'da manek-ka ae Ama nai ia? Tao leo bee o neukose ana taonisa au!”

¹⁵ Elia nataa nae, “No Manetualain Fo Manakoasa, fo au alalau-aoono ka na'den-na, au aheluk neukose au u ataa matang manek-ka faik ia boe.”

Elia ma Baal-la nabin-nala

¹⁶ Boema Obaja neu nafa'da mane Ahab-a, tutika ana la'o fo neu natongon-no Elia.

¹⁷ Nai lelek Ahab nita Elia boema, naloo bou-bou nae, “Tou maneni susa soe fe Israel-la nde ia so!”

¹⁸ Boema Elia nataa nae, “Au ta nde maneni susa soe ndia fa, te Ama Manek dei. Ama Manek ma Ama Manek teidalen-nala nde maneni susa soe ndia dei. No sene-do'ok neu Baal-la sosongo-tatangon-nala, Ama Manek la'olena Manetualain paletan-nala.

¹⁹ Da'di, fe paleta neu basa laun Israel-la lala'en-na fo ala mai latongo loo au nai Lete Karmel la. Boeo moo Baal-la nabi natu ka haa limahulun-nala, ma Asyera fo lamatua daebafa inak-ka, nabi natu kahaa nala fo Ina Manek Izebel-la nakaboboik-kala!”

²⁰ Boema Ahab fo'a no basa laun nala ma nabi Baal-la sila-la leo Lete Karmel la leu.

²¹ Boema Elia neu deka no laun sila-la de nafa'das nae, “Emi dalem-ma naba'e nahele losa faihi'da? Metema Amak ndia Manetualain soona, sene-do'ok Manetualain leona! Metema Baal-la ndia Manetualain soona, sene-do'ok Baal-la leona!” Laun mana lakabubua lai ndia, ka'da bedenge.

²² Basa boema Elia nae, “Nai Manetualain nabin-nala dalek, ela ka'da au mesang-nga, te se'kona nai ia hapu nabi Baal-la natun haa limahulu.

²³ Besak ia, meni sapi mane dua leo ia mai. Madenu nabi Baal-la sila-la ho'i la esa fo ala do'don, basa soona kee keen fo pe'dan neu ai ha'i lain. Tehu sila ta bole lapila ha'i nai ndia fa. Sapi esa ka neukose au tao taon leondiak boe. Neukose au do'don fo au kee keen, boema au pe'dan neu ai ha'i lain. Tehu au boeo, neukose ta apila ha'i nai ndia fa.

²⁴ Neme na fo nabi Baal-la sila-la hule-haladoi neu sila-lamatua daebafan-na, ma au boeo neukose hule-haladoi neu Manetualain. Fo bee ka nde nataa nenik Ana haitua ha'i mai soona, ndia kande Manetualain-na.” Basa laun-na lala'en-na lataa lapane'e lae, “Ami makaheik!”

²⁵ Boema Elia nafa'da nabi Baal-la sila-la nae, “Hu kande emi makadotok, de emi hele makahuluk sapi bee ka fo sadia man, tehu boso mapila ha'i neu ai la. Basa ndia soona, hule-haladoi neu emi lamatua daebafam-ma leon.”

²⁶ Boema ala hele la sapi esa de ala sadia lan. Basa boema ala hule-haladoi neu Baal-la neme fafain ndia losa le'dohana no ala nggasi-nggasi mesan lae, “Mataa ami leon, Baal-la!” Ala tao dede'ak ndia no ala foti longe okofefeok sila mei tunu-hotu na. Tehu ta hapu hala natataak makandondook fa.

²⁷ Losa le'dohana boema, Elia mulai hakinonolis nae, “Hule-haladoi mapane'e seluk! Ndia lamatua daebafak hetu? Fafa'kama ana bei tekauk, do ana leo kakus dale neu. Bole da'di ana bei la'o leo bee neu! Do fafa'kama ana bei sungu, de emi muse fafae mafo'an!”

²⁸ Nabi sila-la hule-haladoi lapane'e seluk bai. Ma sama leo biasa ala taok-ka, de ala duduik ao nala lenik tafaina ma tee losa daa nala faa.

²⁹ Ala tao leondiak nakandondoo henin losa le'donoso, sama leo hataholi nitu sa'e ka. Tehu ta hapu manamataak, ma ta hapu manataoafik fa.

³⁰ Boema Elia nafa'da basa laun sila-lala'en-na nae, “Mai deka!” Sila basa-basas lakabubua lai boboa-kaisun, basa boema ana mulai tao matalolole Manetualain mei tunu-hotun fo ndefaheni so.

³¹ Ana ho'i na batu sanahulu dua, fo batu esa soona, ana nggati leo esa neme leo ka sanahulu duak fo Yakob tititi-nonosin-nala. Yakob fo nde Manetualain foin na'de Israel so.

³² Elia nafofo'a falik mei tunu-hotuk fo mamana hule-haladoik neu Manetualain-na, nenik batu kasanahulu duak sila-la. Nai mei tunu-hotuk ndia boboa-kaisun, ana kali oelolok maloaina, nalosa ana hapu sipok oe fafa'kama litel sanahulu lima.

³³ Ana nakatoto'dok ai ha'i neu mei tunu-hotuk lain, boema ana kee sapi kisak ndia de ana pe'das neu ai ha'i sila-lain. Basa boema nae, “Isi oe mahenu nggala ka haa kala losa henus, soona po'a oe sila leo tutunu-hohotuk ma ai la lain neu.” Ala tao basa sila-la boema,

³⁴ nafa'da nae, “La'iesa seluk,” boema ala taon. Elia nae, “La'iesa seluk,” boema ala taon boe.

³⁵ Boema oe faa okofefeok mei tunu-hotuk ndia nalosa oelolo na boeo henun no oe.

³⁶ Lelek fai na losa fe tutunu-hohotu le'donoso ka boema, Nabi Elia neu deka no mei tunu-hotuk ndia, boema ana hule-haladoi nae, “Ou Amak, Manetualain fo Abraham, Isak ma Yakob sene-do'ok-ka, matu'dun besak ia mae O nde Manetualain nai Israel, ma au ia O atam. Boeo matu'du mae basa hata lala'en fo au taon ia nde been-na no O paleta ma.

³⁷ Mataa leon, Manetualain! Mataa au leona, fo ela laun ia la bubuluk lae O nde been-na Manetualain, ma lae O nde tao ma sila fali leu O mai.”

³⁸ Boema Manetualain haitua ha'i a neme lalai mai, de ana hotu naputu tutunu-hohotuk ndia no ai ha'i na, batu nala ma daen-na boema anan-nahaa nama'da oe manai oelolok ndia dalek-ka.

³⁹ Nai lelek laun-na lita manada'dik ndia boema, ala lakatele leo dae a neu ma lafa'da lae, “Amak ndia Manetualain! Tete'e ka Amak ndia Manetualain!”

⁴⁰ Boema Elia nafa'da nae, “Ho'u ma nabi Baal-la sila-la. Boso po'ilotak esa boen nala deak!” Boema hataholi-la ho'u la nabi Baal-la sila-la, de basa boema Elia nos leo Lee Kison-na, de ala losa naa boema, ana taonisa la'iesa kasa.

Fai hanas sa nate'e

⁴¹ Basa ndia boema Elia nafa'da Mane Ahab-a nae, “Malole lenak besak ia Ama Manek neu na'a! Ba'ihanak seluk bai te, neukose u'dan-na mai, nana ita tamanene hoo na so.”

⁴² Boema Ahab neu na'a, ma Elia kae leo Lete Karmel la lain neu. Ana losa naa boema ana senek no nakatele leo dae neu, nai lungulangan duas tala'da.

⁴³ Nafa'da atan-na nae, “Kae leo lete ka poin-na muu fo mete masale leo tasi muu.” Ata ndia kae leo lete ka poin-na neu, boema ana fali de nafa'da Elia nae, “Au ta ita hata esa boen.” Elia nadenu atan ndia kae kona la'i hitu soaneu ana mete.

⁴⁴ Neu ka la'i hitu na boema, ata ndia fali ma'in de nafa'da nae, “Au ita ko'a ana ka loa lima dalek esa neme tasi a mai.” Boema Elia nafa'da atan ndia nae, “Muu leo Mane Ahab-pa muu, fo madenun ana sa'e na kaletan-na fo ana fali leon beidai u'dan-na beita napanggee na fan.”

⁴⁵ Ka'da hatematak esa mesak-kana, de lalai-a nasakoko'a, ma ani matuaina mai, boema u'daina mai leon. Ahab sa'e na kaletan-na de ana fali leo Yizreel neu.

⁴⁶ Lelek ndia, Elia hapu be'i-balakaik neme Manetualain mai. Ana ki'duk ba'du manalun-na leo lain neu de ana pa'an neu tala'da na, boema nalaik nakahuluk neme Ahab nai eno manalu ndia, losa kota Yizreel-la lelesuinan-na.