1RAJA-RAJA 17 - Susula Malalaok Hehelu Palak Ma Hehelu Beuk

Elia ma fai hanas matuaina

¹ Hapu nabi esa na'de Elia. Ana da'di neme Tisbe, fo kota esa nai nusa Gilead. Faik esa boema, neu leo Mane Ahab neu de nafa'da nae, “No Manetualain fo maso'dak-ka na'den-na, fo hataholi Israel-la Manetualain-na fo au alalau-aoonon, au afa'da Tuan ae nai teuk dua do telu manamaik ia, neukose ta hapu dinis do u'dan faa anak boen, ta'da fe'e au nde afa'dan nana.”

² Basa ndia boema, Manetualain nafa'da Elia nae,

³ “La'oela mamanak ia fo muu leo dulu muu, leo Lee Yarden-na selik deka no Lee anak Kerit a, fo mafuni meme ndia.

⁴ O hapu minu oe neme lee anak ndia oe na mai, ma Au adenu manupui kaa fo neukose neni fe o nana'ak.”

⁵ Elia tunga Manetualain paletan ndia, de neu leo lee anak Kerit a neu, boema nafuni neme ndia.

⁶ Ninu oe neme lee anak ndia oe na mai, ma na'a loti ma paa fo tunga-tunga fafai le'donoson manupui kaa neni fen.

⁷ Basa faik de'ubee dalen-na boema, ma'da lee anak ndia oe na, nanahu u'dan ta.

Elia ma inafalu nai Sarfat

⁸ Basa boema, Manetualain nafa'da Elia nae,

⁹ “Besak ia o muse muu leo kota Sarfat-ta deka no Sidon, fo leo meme ndia. Au adenu basa inafalu esa nai ndia so, fo daenga ana fe o mu'a.”

¹⁰ Boema Elia neu leo Sarfat neu. Lelek ana losa kota ndia lelesun-na boema, nita inafalu esa, ana bei hehele ai ha'i. Boema Elia nafa'da inafalu ndia nae, “Ina, sue na fe au oe nininuk faa anak dei.”

¹¹ Lelek inafalu ndia bei neu ho'i oe ndia te, Elia naloo bou-bou nae, “Ina, menin no loti faa anak boe.”

¹² Boema inafalu ndia nataa nae, “No Manetualain fo maso'dak-ka, na'den-na, fo hataholi Israel-la Manetualain-na, fo au soo ae au loting ta. Au anuu ka'da ha'desopuk la'uk esa nai mango dale, ma mina setun faa anak nai boto dale. Au bei hehele ai ha'i fo au do'de-nasu ha'desopu faa anak ndia, fo daenga au o au anang-nga mi'a. Ami nana'a mate'e ma nde ndia so; basa ndia soona, neukose ami mahani ka'da mamates sa mamain.”

¹³ Elia nafa'dan nae, “Ina, dale ma boso ba'ihana! Ina do'de-nasu soaneu Ina ma Ina ana ma. Tehu nakahuluk neme ndia mai, tao makahuluk loti anak esa neme ha'desopuk ma mina faa anak ndia fo menin leo ia mai.

¹⁴ Nana Amak fo hataholi israel-la Manetualain-na nafa'da nae mango ndia, neukose henun no ha'desopuk tataas esa, ma boto ndia neukose henun no mina tataas esa losa neu lelek Manetualain fe u'dan-na leo daebafak-ka mai.”

¹⁵ Boema inafalu ndia neu tao hata fo Elia nafa'dan ndia. Boema telus lanuu nana'ak dai tunga-tunga faik.

¹⁶ Ma sama leo hata fo Manetualain nafa'da basan tunga Elia nae, mango ndia henuk no ha'desopuk tataas esa, ma boto ndia boeo henuk no mina tataas esa.

¹⁷ Faik de'ubee makabuin-na boema, inafalu ndia anan-na tu'u he'dis. Ni'iana ndia he'din-na tunga faik boetai namabelak-ma, losa maten.

¹⁸ Boema inafalu ndia nafa'da Elia nae, “Manetualain Atan-na nei, taole'e de Ama tao leo iak soaneu au? Ade Ama mai fo tao ma Manetualain nafandele au sala-singong, nalosa au anang-nga muse maten do?”

¹⁹ Boema Elia nataa nae, “Moo ni'iana ndia leo ia mai.” Boema Elia sipo na ni'iana ndia neme inan mai de non leo kama manai lai na, leo kama fo Elia sungu nai dalek-ka. Elia nangapepe'uk ni'iana ndia neu pepe'uk lain,

²⁰ boema ana hule-haladoin-napane'e nae, “Ou Amak, fo au Manetualaing-nga, taole'e de O fe soe ia neu inafalu ia. Ana sipok au leo nai uman, ma besak ia O taomisa anan-na!”

²¹ Basa ndia boema, Elia bala ao na la'itelu neu ni'iana ndia lain ma ana hule-haladoi nae, “Ou Amak, fo au Manetualaing-nga, sa'di leo been-na tao maso'da ni'iana ia!”

²² Manetualain namanene Elia hule-haladoin; ni'iana ndia mulai hae de naso'da falik.

²³ Boema Elia kona neme kaman na mai, de no ni'iana ndia leo inan neu ma nafa'dan nae, “Ina anan-na nde ia, naso'da falik so!”

²⁴ Inafalu ndia nataa nae, “Besak ia au bubuluk, Ama nde been-na Manetualain atan, ma Ama hala-kokolan memak tete'e ka neme Manetualain mai!”