1RAJA-RAJA 15 - Susula Malalaok Hehelu Palak Ma Hehelu Beuk

Abiam, mane Yehuda

¹ Nai teuk-ka sanahulu falu na, fo Mane Yerobeam paleta Israel, Abiam da'di mane Yehuda

² ma ana paleta teuk telu dalen-na nai Yerusalem. Inan nde Maakha, fo Abisalom anan-na

³ Abiam tao sala-singok sama leo aman. Ana ta lilineka no dalek-katema tua na neu Amak, fo Manetualain na fa, ndia fe'ek no Dauk fo ba'i nelu na.

⁴ Tehu, hu kande Mane Dauk ka, boema Manetualain fo Dauk sene-do'ok-ka, fe basa Abiam, ni'iana esa fo ana paleta nggatin nai Yerusalem fo nanea nahele kota ndia.

⁵ Manetualain tao dede'ak ndia hu kande Dauk tao namahoko dalen-na so. Ta la'iesa boen fo Dauk la'olena Manetualain paletan-nala fa, ta'da fe'e nai Uria fo hataholi Het ndia, dede'a na dalek.

⁶ Rehabeam no Yerobeam latee-latati lakandoo losa tepo lelek Abiam paleta.

⁷ Tutui fe'ek la'eneu Abiam, nanasula basak nai Mane-manek Yehuda-la buku Tutuin-na dalek so.

⁸ Boema mate Abiam de latoin nai Kota Dauk-ka, nde ana manen Asa nggatin, da'di manek.

Asa, mane Yehuda

⁹ Nai teuk-ka duahulun-na fo Mane Yerobeam-ma paleta Israel, Asa da'di mane Yehuda.

¹⁰ Ana paleta teuk haahulu esa dalen-na nai Yerusalem. Bein nde Maakha, fo Abisalom anan-na.

¹¹ Sama leo Dauk, fo ba'ikai na, Asa tao namahoko Manetualain dalen-na.

¹² Ana usiheni basa ina manasosoa-piaok manai mamana sosongo-tatangok-kala, ma basa sosongo-tatangok fo mane-manek manapaleta makahuluk-kala lapadedei kasa lai nusak ndia lala'en-na, ana tao nakalulutuk la'iesa kasa.

¹³ Ana kaluaheni bein Maakha, neme nangatutuun-na, nana ana tao doki-dula sosongo-tatango manasosoa-piaok soaneu Asyera, lamatua daebafa inak fo manafe bubu'u-palusa lalole. Asa tao nakalulutuk sosongo-tatangok ndia de ana hotuhenin neme Bafak Kidron-na.

¹⁴ Leomae Asa ta tao nakalulutuk basa mamana sosongo-tatangok-kala fa, tehu ana lilineka nahele neu Manetualain nai fai maso'dan-na dalek.

¹⁵ Basa lilopilas ma lilofulak fo aman fe basan neu Manetualain na, nenis leo Manetualain uman neu, leondiak boe ndia fe lilopilas ma lilofula kala boe.

¹⁶ Nai tepo lelek Mane Asa neme Yehuda ma Mane Baesa neme Israel paleta, manek-ka duak sila-latee-latati tataas esa.

¹⁷ Mane Baesa neu sapun-na Yehuda, ma ana tao natea-nahele kota Rama soaneu ana kena ketu Yehuda eno masok kalua na.

¹⁸ Hu ndia de, Mane Asa ho'i na basa lilopilas ma lilofulak fo bei lai Manetualain Uman ma manek-ka uma manen-na boema ana haituas leo Damsyik fo leo Benhadad, fo mane Siria, fo Tabrimon anan-na, fo nde Hezion upu na. Ana haitua bua-lo'as sila-la tunga uma manek-ka hataholi manaho'u paletan de'u bee, ma ana fe hala heheluk-ka nde ia nae,

¹⁹ “Mai fo ata tao tia-laik sama leo ita ina ama nala taok-ka. Sama-sama no susulak ia, au haitua lilopilas ma lilofulak da'dileo bua palsen, ma au kokoe tuan fo boso boe tao hehelu-balataak moo Baesa fo mane Israel-la, fo ela ana hela falik solda'dun-nala leme au nusang-nga mai.”

²⁰ Benhadad sipok nonokek ndia, boema nadenu malanga solda'du matuainan-nala sama-sama loo Asa solda'dun-nala leu sapu-la Israel kotan-nala. Ala sengi Iyon, Dan, Abel-Bet-Maakha ma Kinerot fo ana deka no Dano Galilea boema basa nusa Naftali lala'en-na.

²¹ Lelek mane Baesa namanene dede'ak ndia boema, ana hahae tao natea-nahele Rama. Neu leo Tirza neu, fo ana hahae natee-natatik-ka lalai.

²² Basa ndia boema, Mane Asa paletas basa hataholi manai Yehuda-la lala'en-na fo leu ko'oheni ai batu fo Baesa pakes nai Rama soaneu tao natea-nahele kota ndia. Asa pake ai batu sila-la soaneu tao natea-nahele kota Mizpa ma Geba, fo kota esa nai nusa Benyamin-na.

²³ Tutui fe'ek la'eneu Mane Asa, fo nde palani tati batu na ma ana tao natea-nahele kota-kota la, nanasula basak nai Mane-manek Yehuda-la buku Tutuin dale so. Nai fai lasin-na dalek, Asa hapu he'dis nai ein duas.

²⁴ Maten de latoin nai mane-manek-kala loo laten-nala nai Kota Dauk. Ana manen Yosafat nggatin da'di manek.

Nadab, mane Israel

²⁵ Mane Asa paleta Yehuda neu teuk-ka duan-na boema, Nadab fo Yerobeam anan-na da'di manek nai Israel, de ana paleta teuk dua dalen-na.

²⁶ Saman-na leo aman fo ana paletan-nakahuluk neme ndia mai, ndia boeo tao tatao-nono'i mangalauk nai Manetualain mata memeten-na, nalosa ana tao na hataholi Israel-la lasala-lasingo.

²⁷ Baesa fo Ahia anan-na, neme leo Isakhar-ra mai, tao nakabua makahatuk fo la'ban Nadab, boema ana taonisan. Nai lelek ndia Nadab no solda'dun-nala bei lakahapi la kota Gibeton fo nai nusa Filistin-na.

²⁸ Manda'dik ndia da'di nai teuk-ka telun-na fo Mane Asa paleta Yehuda. Leondiak, Baesa da'di mane Israel nggati Nadab.

²⁹ Baesa da'di manek tutika, ana taonisa la'iesak Yerobeam tititi-nonosin. Nandaa no hata fo Manetualain nafa'da basan tunga atan, Nabi Ahia neme Silo mai, boema basa Yerobeam teidalen lala'en-na, nanataonisak, de ta ela hataholi esa boen.

³⁰ Yerobeam nasala-nasingo, de ana tao na hataholi Israel-la boeo lasala-lasingo. No enok ndia, Yerobeam tao lafo'a Amak fo hataholi Israel-la Manetualain-na nasa-melun.

³¹ Tutui fe'ek la'eneu Nadab, nanasula basak nai Mane-mane Israel-la buku Tutuin dale so.

³² Nai tepo lelek Mane Baesa neme Israel paleta, natee-natatik-ka ana da'di tataas esa no Mane Asa neme Yehuda mai.

Baesa, mane Israel

³³ Nai teuk-katelun-na fo mane Asa paleta Yehuda, Baesa fo Ahia anan-na da'di manek neu Israel-lala'en-na. Ana paleta nai Tirza teuk dua huluhaa dalen-na

³⁴ Basa leo manek Terobeam fo ana paletan-nakahuluk-kana, mane Baesa boeo nasala-nasingo neu Manetualain de ana tao na hataholi Israel-la lasala-lasingo.