1RAJA-RAJA 14 - Susula Malalaok Hehelu Palak Ma Hehelu Beuk

Yerobeam anan-na mamaten-na

¹ Nai lelek ndia, Yerobeam ana touanan-na na'de Abia, ana tu'u he'dis.

² Yerobeam nafa'da saoinan-na nae, “Maheheleaom leona, fo muu leo Silo muu, fo leo Nabi Ahia uman, nabi fo makahulun-na nafa'da nae neukose au da'di Israel manen-na. Tehu balias ma o aoinam-ma nalupa hataholi fe'ek, fo ela hataholi ta nalelak see o fa.

³ Meni fen loti biak sanahulu, kokis lumanak, ma fanioe boto esa. Fo matanen, hata fo neukose ana da'di neu Abia, fo ita anan-na. Neukose nabi ndia nafa'dan neu o.”

⁴ Boema Yerobeam saoinan-na neu leo Nabi Ahia uman neu, fo nai Silo. Nabi ndia ta hapu nita so'on, nanahu namalasin-nanseli so.

⁵ Tehu Manetualain nafa'dan nae Yerobeam saoinan-na ana mai fo natane la'eneu ana kamahe'di na. Ma Manetualain boeo nafa'da Nabi Ahia, hata fo mahani te ana muse nafa'dan. Lelek Yerobeam saoinan-na losa naa boema, ana tao nono'kabai ndia hataholi fe'ek.

⁶ Tehu nai lelek Nabi Ahia be namanene ein-na nakandu'u nai lelesu bafan-na boema nae, “Mai leo dalek mai, te au bubuluk Yerobeam saoinan-na nde o. O boso tao nono'kabai hataholi fe'ek bai. Hapu halak ta malole soaneu o.

⁷ Fali leona fo mafa'da Yerobeam mae Amak, fo Israel Manetualain na nafa'da dede'a ka nde ia nae, ‘Au hele basa o neme laun-na tala'da mai so, de Au tao o da'di mana koasa neu Au anang Israel.

⁸ Au fe basa o, nusak fo Au loso an neme Dauk tititi-nonosin-nala mai. Tehu o ta sama leo Au atang Dauk fa. Ana lilineka te'e-te'e neu au ma ana tunga Au paletang-ngala. Ana taok-ka'da hata fo Au akaheik ana taon.

⁹ Tehu o tao tatao-nono'i mangalauk matuaina, lena neme hata fo manapaleta makahuluk-kala tao-no'in-nana. O la'oela Au ma o tao mafo'a Au nasa-melung nenik o tao sosongo-tatangok boema doki-dula kala leme liti mai, fo o sene-do'ok neun.

¹⁰ Hu ndia de, neukose Au fe soe a tuni na o teidalem-mala. O tititi-nonosi tou mala lala'en-na, nangatutuu na leo beek boe, neukose nanataonisak. Neukose Au tao amopo o teidalem-mala sama leo hataholi a sasapu balisi kadafuk kala.

¹¹ O teidalem fo manamatek manai kota dalek, neukose busa la la'as, ma manamate nai kota deak-ka, neukose manupui la la'as. Mafandendelek te, Au nde Manetualain fo manakokolak-ka.’ ”

¹² Nabi Ahia kokolak nakandoo no Yerobeam saoinan-na nae, “Nah, besak ia fali leona! Nai lelek o bei mala kota dalek, te o anam ndia neukose maten.

¹³ Basa laun Israel-la lala'en-na, neukose ala susa ma latoi-latonon. Ni'iana ndia nde Yerobeam teidalen-na mesa-mesak-kana nde neukose latoi-latonon no ha'da-holomata, nana ka'da ndia mesak-kana nde nandaa no Amak fo Israel Manetualain dalen-na.

¹⁴ Neukose Manetualain fe Israel manek fe'ek esa fo neukose ana da'di mane mate'ek soaneu Yerobeam tititi-nonosin da'dileo manek-ka. Fain-na losa so! Mulai besak ia.

¹⁵ Neukose Manetualain huku Israel nalosa nanggonga-nggangik sama leo fii dook-ka nai oe dale. Neukose Manetualain fe'aheni Israel neme nusak malole fo Ana fen neu sila bei-ba'i kai nala ia. Neukose Ana tao tapasasalas leo Lee Efrat-ta selik leu, nanahu ala lafofo'a basa nasa-melun nenik ala tao Asyera fo lamatua daebafa inak-ka, doki-dulan.

¹⁶ Neukose Manetualain la'oela Israel nanahu Yerobeam nasala-nasingo so, ma ana tao na hataholi Israel-la lasala-lasingo boe.”

¹⁷ Basa ndia boema, Yerobeam saoinan-na fali leo Tirza neu. Nai lelek nala uma dale boema, mate anan-na.

¹⁸ Laun Israel-la susa, boema latoi-latonon sama leo hata fo Manetualain nafa'dan tunga Nabi Ahia fo atan-na.

Yerobeam mamaten-na

¹⁹ Tutui fe'ek la'eneu Mane Yerobeam-ma, fo nde paletan-na ma natee-natatik fo nauli-nalangan-na, nanasula basak nai Mane-mane Israel-la buku Tutuin dale so.

²⁰ Teuk duahulu dua dalen-na, Yerobeam paleta da'dileo manek-ka, basa boema maten de latoi-latonon. Ana na na'de Nadab nggatin da'di manek.

Mane Rehabeam-ma neme Yehuda mai

²¹ Lelek Rehabeam, fo Salomo anan-na, da'di mane Yehuda te, teun haahulu esa. Ana paleta teuk sanahulu hitu dalen-na nai Yerusalem. Neme basa kota Israel-la lala'en-na, Manetualain tao fe'e kota ndia da'dileo mamana hule-haladoik neun. Rehabeam inan nde Naama fo neme leoina Amon na mai.

²² Leoina Yehuda tao tatao-nono'i mangalauk nai Manetualain mata memeten-na. Sila tatao-nono'in tao nafo'a seluk Manetualain nasa-melun lena heni basa sila bei-ba'i kain tatao-nono'in lala'en-na mai.

²³ Nai pupuku kala lain ma nai ai matuaina la huun-na, ala lafofo'a mamana sosongo-tatangok-kala, ma lapadedeik lutu batu la boema ala tao Asyera fo lamatua daebafak inak ka doki-dulan, soaneu ala sene-do'ok.

²⁴ Nai mamanak sila-la ala tao tatao-nono'i sosoa-piaok da'dileo sosongo-tatangok neu lamatua daebafak-ka. Nakalenak touk-kala boeo hapu bela-ba'uk da'dileo mana sosoa-piaok. Hataholi Yehuda-la tao basa tatao-nono'i manggenggeok fo nanatao-no'ik neme leoina fo Manetualain usihenis nai lelek hataholi Israel-la masok leo nusak ndia dalek leu.

²⁵ Neu teuk-ka liman-na fo Rehabeam paleta, Sisak fo mane Masir-ra sapun-na Yerusalem.

²⁶ Ala loso la basa bua-lo'a kabelik manai Manetualain Uman-na, ma nai manek-ka uma manen-na, boeo buas sisili musu lilopilas fo Salomo nadenu Huram taok-ka.

²⁷ Boema da'dileo ngganggati nala, de Mane Rehabeam-ma tao bua sisili musu neme liti mai, de ana fen neu basa malanga solda'du matuaina fo manamanea manek-ka uma manen-na, lelesuinan-na.

²⁸ Nai lelek manek-ka neu leo Manetualain Uman-na neu soona, basa manamanea la leni buas sisili musu sila-la, fo basa soona, leni falik-kasa leo uman-naneak-ka neu.

²⁹ Tutui fe'ek la'eneu Mane Rehabeam-ma, nanasula basak nai Mane-manek Yehuda-la buku Tutui nala dalek so.

³⁰ Nai Rehabeam paletan-na tepo-lelen, hapu natee-natatik tataas esa nai Rehabeam-ma Yerobeam.

³¹ Basa boema mate Rehabeam, de latoi-latonon nai mane-manek manai Kota Dauk-ka, loo-laten-nala. Boema ana manen Abiam nggati da'di manek.