1RAJA-RAJA 10 - Susula Malalaok Hehelu Palak Ma Hehelu Beuk

Nusa Syeba ina manen-na neu donge-dama Salomo

¹ Nusa Syeba ina manen-na namanene la'eneu Salomo nananita-nalelak. Boema neu leo Yerusalem neu fo ana so'ba Salomo nenik natatane mateaina la.

² Ana mai no hataholi manatunga dean makadotok nanseli ma onta fo nanafua nahenuk nenik bumbu ndende, batu poemata, ma lilopilas makadotok nanseli. Nai lelek natongon-no Salomo boema, ina manek ndia natane laiesak natatanek fo ana dudu'a dodoo nalak-kala.

³ Salomo hapu nataa nala basa natatanek sila-la, nana ba'eneu Salomo, ta hapu natatane matea esa boen.

⁴ Ina Manek ndia sakasii matan Salomo manatee teno na ba'u nanseli. Nita uma manek fo Salomo nafofo'a ka,

⁵ hataholi mana'a ngga'di nala ue-le'din nai uman manen-na, ma hataholi mana'a ngga'di nala bua-papaken-nala ma uma leleon-na la. Nita ala pe'da fes nana'a nininuk, eno na leo beek fo basa malalau-maoono la lalalau-laoono feta esa, ma tutunu-hohotuk fo Salomo tunu-hotun nai Manetualain Uman. Basa sila-la tao la nusa Syeba ina manen-na dodoo doa kana.

⁶ Boema nafa'da Mane Salomo nae, “Basa hata lala'en fo au amanenen nai au nusa-namong la'eneu Tuan, memak tete'ek-ka!

⁷ Makahulun-na au ta nau amahele fa, tehu lelek au mai de au ita basa-basan nenik au mata nga, besak-ka au amahele. Tunga ndoon-na basa hata lala'en fo au amanenen sila-la, beita ba'e duak neme hata fo au itan besak ia fa. Te se'kona Tuan manatee tenon-na, ma su'i-beten ba'ulena nanseli neme lafa'dan neu au.

⁸ Tuan saoinan-nala laua-lanale lanseli! Ma nanala matuainan-nanseli ba'eneu hataholi mana'a ngga'di fo laue-lale'di tataas esa soaneu Tuan, nalosa lamanene matan neme Tuan mai, basa nanolik fo manatee tenok lala'en-na!

⁹ Kokoa-kikiok ba'eneu Amak, fo Tuan Manetualain na! No Ana so'u Tuan da'di mane Israel-la, de Manetualain natu'du nae, namahoko nanseli neu Tuan. Sue-lalain neu leoina Israel-la ta ketu-basa fan; hu ndia de, Ana so'u Tuan da'di sila manen-na, fo ela Tuan hapu nakalala'ok hoholo-lalanek ma ndoos ma matetuk-ka.”

¹⁰ Basa boema nusa Syeba ina manen ndia fe Salomo bua palsen fo neni kala, fo nde: lilopilas kilo lifun haa lenak ma batu poemata makadotok boema bumbu ndende. Salomo ta hapu sipo nita seluk bumbu makadotok leondiak so'on sama leo nusa Syeba ina manen-na fen nana fa. (

¹¹ Hiram ofa nala leni lilopilas neme kota Ofir-ra fo fe Salomo, ma leni batu poemata makadotok ma kainituk boe.

¹² Salomo pake ai sila-la soaneu tao tarali-tarali manai Manetualain Uman-na, ma manai uma manek-ka. Boeo soaneu tao fe manamakamee kala kecapi ma gambus. Ai sila-la nde been-na kainitu maloleina, fo leni hain leo Israel neu so; ta hapu hataholi nita seluk ai maloleina leondia ka so'on.)

¹³ Fe'ek neme bua palsen fo biasa Salomo fe kala, boeo ana fe basa hata lala'en fo ina manek maneme nusa Syeba ndia noke kala. Basa boema ina manek ndia fali leo nusan-na no basa hataholi manatunga dean-nala.

Salomo su'i-beten

¹⁴ Tunga teuk, Mane Salomo sipo lilopilas hihii nae losa kilo lifun duahulu telu,

¹⁵ beita leken-nanalak fo ana hapun neme bua danga nala mai, ma neme basa manadangan-nala bea na, neme Arab manen-nala mai, ma neme basa filana Israel-la mai.

¹⁶ Salomo tao na sisili musu lilopilas nanatutuk natun dua. Lilopilas fo ala paken soaneu sisili musu sila-la esa soona, fafa'kama na'a kilo hitu.

¹⁷ Salomo boeo taon-na sisili musu lilopilas natun telu fo ana kala seluk bai. Lilopilas fo ala paken soaneu sisili musu anak sila-la esa soona, fafa'kama na'a lilopilas kilo dua, fo basa-basas lilopilas nanatutuk. Basa sisili musu sila-la nanape'dak nai Lalaa Temak Nula Libanon-na dalek.

¹⁸ Salomo boeo tao na kandela manek matuaina esa de nakataman nenik ngga'di dui ma nanabalias nenik lilopilas isik.

¹⁹ Kandela ndia malimak, ma nai boboan duas hapu singa a doki-dulan. Nai kandela ndia dean-na, hapu sapi langa doki dulan. Kandela ndia boeo, nanuu e'dak nee.

²⁰ Nai pe'dan kii ma pe'dan kona fo nai e'dak sila esa soona, hapu singa doki-dulan – basan lala'en-na sanahulu dua. Ta hapu kandela manek sama na leondiak nai nusak bee boe.

²¹ Salomo bua-lo'a nininu nala basa-basas nanataok neme lilopilas sa mai, ma basa bua-lo'as manai Lalaa Temak Nula Libanon na, nanataok neme lilopilas isik-ka mai. Ta hapu buas fo nanataok neme lilofulak-ka mai fa, nana nai Salomo tepo-lele na, hataholi a nafa'da nae lilofulak-ka belin taa.

²² Salomo ofa matuainan makadotok fo ala la'ok lakabubua loo Mane Hiram ma ofa nala. Teuk telu soona ofak sila-la fali ma'is la'iesa fo leni lilopilas, lilofulak, ngga'di dui, ko'de ma manupui manakoaok.

²³ Mane Salomo-a, su'i na lena ma manatee teno na lena neme manek bee boe nai dae bafak ia.

²⁴ Basa hataholi manai daebafak ia lala'en-na sanga enok fo latongo loo Salomo soaneu lamanene nanoli manatee tenok fo Manetualain fen neun.

²⁵ Sila esa-esak mai no leni bua palsen soaneu Salomo. Ala fe bua-lo'a lilofulak, lilopilas papake-ngganggaok, tee-tafa, bumbu ndende, ndala ma bana esa na'de bagal. Leondiak tunga-tunga teuk.

²⁶ Salomo solda'dun-na lanuu kaleta musu lifun esa natun haa, ma solda'du manasa'e ndala lifun sanahulu dua. Ana pe'da seli nai Yerusalem ma lena nala nai kota fe'ek-kala.

²⁷ Nai tepo-lelek fo Salomo paleta, nai Yerusalem, lilofula ka nalupa bua-lo'a biasa sama leo batu a; ma ai kaiou Libanon na makadotok nanseli sama leo ai kaak biasa.

²⁸ Ala ho'i ndala la leme Masir ma Kilikia mai tunga manek-ka hataholi manadangan-na,

²⁹ ma ala ho'i kaleta musu la leme Masir mai. Ndala esa soona belin-na doi fulak natun esa limahulu, ma kaleta musu esa soona belin-na doi fulak natun nee. Basa boema, tunga manadangan sila-la de, lase'o seluk ndala la ma kaleta musu sila-la leo mane Het ala ma mane Siria-la.