1RAJA-RAJA 1 - Susula Malalaok Hehelu Palak Ma Hehelu Beuk

Mane Dauk ka nai fai lasin-na

¹ Besak ia, mane Dauk ka namalasin-nanseli so. Leomae lalu'en nenik si'di makate boeo-na makaleni nahele.

² Malole lenak ami sanga-ma anafe'oanak esa fo ana leo no, “Ama Manek ma nafaduli Ama manek. Ana sungu sama-sama no Ama Manek fo ela Ama Manek name'da mato'bik.”

^3-4 Boema ala sanga anafe'oana manahiik esa nai basa Israel-lala'en-na. Boema ala hapu anafe'oanak esa manahiik nanseli nai Sunem na'de Abisag. Loon leo manek-ka neu, boema anan-nanea manek-ka ma nafadulin. Tehu manek-ka ta sungu no fan.

Adonia nakaseti da'di manek

^5-6 Nanahu Absalom maten so, boema Adonia, fo Dauk ana mane nomel duan-na da'di ka'ak. Inan na'de Hagit. Adonia nde been-na hataholi fo ao na makadelek ma mana'ahiik. Aman ta namanasa nita fan metema ana tao salak. Adonia nahiik nanseli da'di manek, boema ana sadia na kaleta musu makadotok ma solda'du manasa'e ndala boema hataholi manamanea ndia, limahulu.

⁷ Boema neu nakokolaok no Yoab ma Imam Abyatar ra. Yoab inan na'de Zeruya. Yoab ma Imam Abyatar ra lakaheik soaneu ala tia-to'ba Adonia dale tutu'un na.

⁸ Tehu Imam Zadok, Benaya fo Yoyada anan-na, Nabi Natan, Simei, Rei ma Mane Dauk ka hataholi manamanean-nana, ta look Adonia fa.

⁹ Nai faik esa nai mamanak fo na'de Batu Menge deka no oemata En-Rogel la, Adonia fe tutunu-hohotu bi'ilopo, sapi manem-ma sapi ana fo maao mesa-mesan. Ana ka'i Mane Dauk ka ana mane fe'e kala, ma uma manek-ka hataholi mana'a ngga'di nala leme leo Yehuda mai leo feta tutunu-hohotuk ndia.

¹⁰ Tehu ana ta ka'i fa'din Salomo, ma Nabi Natan na boema Benaya ma Mane Dauk ka hataholi manamanean-nana fa.

Salomo nanandoo eik da'di manek

¹¹ Boema Nabi Natan na neu natongon-no Batsyeba, fo Salomo inan, boema nafa'dan nae, “Ade Ina Manek-ka beita mamanene lae Adonia, fo Hagit ana manen-na, so'u aon da'di manek so, tehu Mane Dauk ka ta bubuluk hata-hata la'eneu dede'ak ndia fa do?

¹² Metema Ina Manek-ka nahiik fo ela Salomo ma Ina Manek-ka laso'da soona, au fe nanoli-nafa'da ka nde ia, fo ela

¹³ lai-lai muu mataa Mane Dauk ka, fo mafa'dan mae leoia, ‘Ade Ama Manek nde soo-supa basa neu au mae au ana maneng Salomo neukose da'di manek nggati Ama Manek hetu? Besak ia, taole'e de Adonia nde da'di manek-ka?’ ”

¹⁴ Natan kokolak nakandoo nae, “Mahani te, lelek Ina Manek-ka bei kokolak no manek-ka, te neukose au masok soaneu au atetea hata fo Ina Manek-ka kokolak basan ndia so.”

¹⁵ Boema Batsyeba neu nataa manek-ka nai Kaman dale. Nai lelek ndia, manek-ka namalasin-nanseli so, ma Abisag, fo anafe'oanak maneme Sunem ndia, bei nalalau-naoonon.

¹⁶ Batsyeba senek neu manek-ka matan-na, boema manek-ka natane nae, “O mahiik beek?”

¹⁷ Batsyeba nataa nae, “Ama Manek Fo Mandela-masa'ak, Ama Manek soo-supa basa neu au nenik Amak ka, fo Ama Manek Manetualainna na'den-na, mae au ana maneng Salomo neukose nde da'di manek nggati Ama Manek.

¹⁸ Tehu besak ia, no Ama Manek ta bubuluk fa te, Adonia da'di manek so.

¹⁹ Ana fe basa tutunu-hohotu bi'ilopo, sapi manem-ma sapi ana maao makadotok so. Boeo ana ka'i basa Ama Manek ana manen-nala ma Imam Abyatar ra boema Yoab, fo Ama Manek-ka malanga solda'du matuainan-nala leo feta ndia so. Tehu, ana ta ka'i Salomo fa.

²⁰ Ama Manek Fo Mandela-masa'ak, basa laun Israel-la lala'en-na, besak ia bei lahani talu-talu loo nakeketuk neme Ama Manek mai, la'eneu see kande neukose nggati Ama Manek da'di manek.

²¹ Metema Ama Manek ta fe nakeketuk ndia fa soona, tao leo bee o mate basa Ama Manek tutika, au ma au ana mane nga neukose ala tao ami da'di hataholi mangalauk.”

²² Lelek fo Batsyeba bei kola-kola te, Nabi Natan na losa uma manek-ka.

²³ Boema Natan nafa'da manek-ka la'eneu ndia mamai na. Batsyeba kalua, ma Natan masok, boema ana senek neu manek-ka matan na.

²⁴ Natan nae, “Ama Manek Fo Mandela-masa'ak, ade Ama Manek po'a benga basa mae Adonia nde neukose nggati Ama Manek da'di manek do?

²⁵ Faik ia boe, ana tunu-hotu basa bi'ilopo, sapi manem-ma sapi ana maao makadotok so. Ana ka'i basa Ama Manek ana manen-nala so. Boeo basa Ama Manek malanga solda'du matuainan-nala, ma Imam Abyatar ra. Besak ia ala feta loon, ma ala eki ma lae, ‘So'dak ba'eneu Mane Adonia!’

²⁶ Tehu, ana ta ka'i au fa. Imam Zadok ka ma Benaya boema Salomo boeo, ana ta ka'i fas.

²⁷ Ade Ama Manek nde nadenun tao basa sila-la, no ta nafa'da basa Ama Manek hataholi mana'a ngga'di nala, see kande neukose ana nggati Ama Manek-ka?”

²⁸ Mane Dauk ka nae, “Maloo Batsyeba.” Boema Nabi Natan na kalua ma Batsyeba fali neu nataa manek-ka.

^29-30 Boema Ama Manek nafa'dan nae, “Memak au helu basa neu o nenik Amak fo Israel Manetualain na na'den-na so, ae o ana manem Salomo nde neukose nggati au da'di manek-ka. Naa, besak ia au helu neu o nenik Manetualain fo maso'dak, fo Ana soi-po'i basa au eme au toto'a-sosotang lala'en-na mai, na'den-na, ae nai faik ia boe, neukose au tao atetu au hehelung neu o a.”

³¹ Boema Batsyeba senek ma nafa'da nae, “So'dak ba'eneu Ama Manek losa dodoon-na!”

³² Boema Mane Dauk ka nadenu leu laloo Zadok, Natan ma Benaya. Ala mai boema,

³³ manek-ka nafa'das nae, “Maloo ma basa au malanga solda'du matuaina ngala, fo meu leo au ana maneng Salomo meu. Makasasa'e kana leo au kaleta maneng lain neu fo moon leo oemata Gihon na neu.

³⁴ Nai naa, Zadok ma Natan muse so'un da'di mane Israel. Basa ndia soona, emi muse fuu pupuu ka ma eki mae, ‘So'dak ba'eneu Mane Salomo!’

³⁵ Basa soona, la'ok benongo moon fali leo ia mai fo nangatuu au kandela mane nga, nanahu ndia nde au hele basan da'di manek nggati au fo ana paleta Israel ma Yehuda.”

³⁶ Benaya nataa nae, “Hei, Ama Manek Fo Mandela-masa'ak, ela leo been-na Amak, fo Ama Manek Manetualain na, tao natea-nahele Ama Manek paletan ndia.

³⁷ Sama leo Manetualain no Ama Manek so, de ela leo been-na Ana no Salomo boe. Ela leo been-na Manetualain tao na paletan-na tetu-temak lena neme Ama Manek paletan-na mai.”

³⁸ Boema Zadok, Natan, Benaya ma manek-ka hataholi manamanean-nana, ko'o Salomo leo kaleta manek lain neu, boema ala la'ok benongo loon leo oemata Gihon na neu.

³⁹ Basa boema Zadok ho'i na mamana mina setun fo nenin neme Manetualain Lalaa teman-na mai, boema ana ndo Salomo ein-na nenik mina ndia. Pupuu ka nanapuuk boema basa hataholi manai sila-la ala eki lae, “So'dak ba'eneu Mane Salomo!”

⁴⁰ Basa boema sila basa-basas benongo loon fali ma ala eki ma ala fuu kinuk, nalosa dae a nono'kabai sanga heaba'en nanahu eeiki natadalek ndia.

⁴¹ Adonia no basa fui nala besak-ka feta basa, nai lelek lamanene eeiki natadalek ndia. Nai lelek Yoab namanene pupuu ka lii na, boema natane nae, “Hata da'di nai kota, nalosa lakasee lanseli?”

⁴² Yoab beita kokolak basa boen te, no kaiboik Yonatan, fo Imam Abyatar ra anan-na, ana mai. Adonia nafa'dan nae, “Mai leo dalek mai. O hataholi malole, de tao leo bee o, o meni hala malole boe.”

⁴³ Yonatan nataa nae, “Boso mamanasa, te hala ta malole fa. Mane Dauk ka so'u basa Salomo da'di manek so!

⁴⁴ Manek-ka nadenu basa Zadok, Natan, Benaya ma manek-ka hataholi manamanean-nana, la'ok benongo loo Salomo so. Ala lasa'e basan leo kaleta manek lain neu so,

⁴⁵ ma Zadok boema Natan so'u basan neme oemata Gihon na so. Besak ia ala fali le'us leo kota leu ma ala eki no makaseek, ma seek see nai basa kota lala'en-na. Makaseek ndia nde na'kasa emi mamanene nana.

⁴⁶ Besak ia, Salomo da'di manek so.

⁴⁷ Lena-lenak basa manek-ka malanga solda'du matuainan-nala leu fe so'da-molek neu Mane Dauk ka. Lafa'da lae, ‘Ela leo been-na ama manek Manetualain na tao na Salomo da'di nananita-nalelak lena neme ama manek mai; ela leo been-na Salomo paletan-na tetu-temak lena neme ama manek paletan-na mai.’ Basa boema Mane Dauk ka sene-do'ok neu Manetualain nai pepe'un lain,

⁴⁸ ma nae, ‘Kokoa-kikiok ba'eneu O, ou Amak, Manetualain fo hataholi Israel-la sene-do'o ka. Faik ia au so'u basa hataholi esa neme au tititi-nonosing mai, da'di manek nggati au. Ma O nau au aso'da fo au ita no au mata nga!’ ”

⁴⁹ Basa Adonia fui nala bii-lamata'u, nalosa ala fo'a lapadeik boema ala la'o, de esa-esak tunga eno na.

⁵⁰ Boema Adonia bii-namata'u nanseli no Salomo, nalosa anan-nalai leo Manetualain Lalaa teman-na neu de ana ho'u mei tunu-hotuk manai ndia, pe'da nala.

⁵¹ Hataholi la lafa'da dede'ak ndia neu Mane Salomo. Ala lafa'da lae hu kande Adonia bii-namata'u nanseli neu Salomo boema ana neu leo mei tunu-hotuk-ka neu de ana ho'u mei tunu-hotuk ndia pe'da nala ma nafa'da nae, “Neukose au ta la'o eme ia mai fa, fo Salomo beita soo-supa nae neukose ana ta taonisa au fa.”

⁵² Salomo nataa nae, “Metema ana tao malole soona, neukose ndia ta nanahukuk faa anak boen; tehu metema ana tao mangalauk soona, ndia muse nanataonisak.”

⁵³ Boema manek-ka nadenu hataholi neu nala Adonia neme mei tunu-hotuk ndia mai. Boema Adonia mai nataa manek-ka, de ana senek neu matan-na. Boema manek-ka nae, “O bole fali!”