Захария 9 - Ыдыктыг Библия

Бурганның караа бүгү чоннарже көрүп турар

¹ Өттүр билген медеглел. Дээрги-Чаяакчының сөзү бо-дур. Ол Хадрах деп черге удур болур база Дамаск хоорайга турумчуп алыр, чүге дээрге Дээрги-Чаяакчының караа, Израильдиң шупту аймактарынче дег, бүгү улус-чоннарже көрүп турар –

² Дамаск-биле кызыгаарлашкак черлиг Хамат хоорайже-даа, улуг мергежилдиг Тир, Сидон хоорайларже-даа көрүп турар.

³ Тир бодунга шивээ тудуп алган, мөңгүннү доозун дег хөй кылдыр, алдынны – малгаш дег эңдерик кылдыр чыып алган.

⁴ Көрүңер, Дээрги ооң байлаан былаап аар, күчү-күжүн далайга узуткап каар. Тир боду отка өрттенип каар.

⁵ Ол бүгүнү көргеш, Аскалон хоорай коргуушкунга алзыптар, Газа хоорай кортканындан сириңейни бээр, Экрон хоорай база, чүге дээрге ооң идегели ышкындырган-дыр. Газага хаан турбас апаар, Аскалон ээнзирээр.

⁶ Азот хоорайга сурас өгбеден укталган улус-чон кээп чурттай бээр. Мен филистимнерниң турамыын сый шавар мен.

⁷ Оларның аксындан ханныг эът-чемни, диштеринден – чүдек-бужар аъш-чемни ушта тыртар мен. Филистимнерниң артынчызы база бистиң Бурганывыска хамааржып, Иудеяның бир аймаа дег апаар, а Экрон хоорай иевус чон дег апаар.

⁸ Мен Бодумнуң чуртумну таварты эртип турар аг-шеригге удур камгалал бооп туруп аар мен. Моон соңгаар кандыг-даа кызагдакчы олап эртпес, чүге дээрге Мээң караам ол бүгүже көрүп турар.

Келир үедеги хаан болгаш камгалал

⁹ Сион-кыс, өөрүп-хөгле, Иерусалим-кыс, амырап-байырла-ла! Көр даан, хааның сенче кел чыдыр: чөптүг, тиилелгелиг, биче сеткилдиг хаан элчиген, кыс элчиген оглу мунуп алган кел чыдыр.

¹⁰ Мен Израильде дайынчы тергелерни, Иерусалимде дайынчы аъттарны узуткап каар мен, дайынчы ча-согун база узуткаттырар. Ол хаан өске чоннарга амыр-тайбыңны медеглээр, бир далайдан өске далайга чедир, Евфрат хемден чер-делегейниң ужу-кыдыынга чедир чагырар.

¹¹ Сион-кыс, сеңээ хамаарыштыр. Мээң сээң-биле чарып, хан-биле күштүг болдурган чагыг-керээмни бодааш, сээң туттурган улузуңну суг чок оңгардан хостаар мен.

¹² Ам идегели бар апарган туттурган улус, шивээңерже чана бериңер, чидирииңерни ийи катап хөй кылдыр эгидип бээримни бөгүн силерге медеглеп тур мен.

¹³ Иудеяны ча дег кылдыр хере тырткаш, Израильди согун кылдыр салып аар мен. Сион, сээң оолдарыңны дайынчы хылыш дег көдүрер мен; грек чон, оларны сээң оолдарыңга удур көдүрер мен.

¹⁴ Дээрги-Чаяакчы чонунуң кырынга көстүп кээр, Ооң согуну чаңнык дег кызаш дээр. Дээрги-Бурган-Чаяакчы труба этсир, мурнуу чүктен хадаан шуурган-биле чедип кээр.

¹⁵ Аг-шериглиг Дээрги-Чаяакчы чонунга дозуг-камгалал дег боор; олар дайзыннарынче даш шывадаар, өжээтеннерин сыырыптар; олар арага ишкен улус дег шимээргээр база хан кудар аяктар дег, өргүл бедигээжиниң азыглары дег, дола бээрлер.

¹⁶ Израильчилерниң Бурганы Дээрги-Чаяакчы ол хүн оларны камгалаар, Бодунуң чонун, кодан хою дег, камгалаар. Олар Ооң черинге оваадайда улуг үнелиг даштар дег чайынналыр.

¹⁷ Ооң чону кайы хире ачылыг, кайгамчык чараш бооп көстүрүл! Далган-тараадан, виноград чулуундан аныяк оолдар-кыстар чечектелир.