Захария 2 - Ыдыктыг Библия

Үшкү көстүүшкүн: Иерусалимни хемчээксээр кижи

¹ Мен катап база топтап көргеш, холунда чер хемчээр хендир туткан кижини эскерип кагдым.

² «Кайнаар бар чыдыр сен?» – деп айтырдым. Ол: «Иерусалимниң доора база узун дуртун билип аар дээш, ону хемчээрим ол-дур» – деп харыылады.

³ Оон дээрниң мээң-биле чугаалажып турган төлээзи бурунгаар чоруптарга, өске төлээзи аңаа уткуштур үнүп келди.

⁴ Бирги төлээ ийигизинге мынча дээн: «Маңнап баргаш, дуу ол аныяк оолга мынча де: „Чурттакчы чону, мал-маганы хөй болгаш, Иерусалим ханаларынга сыңмас хоорай апаар.

⁵ Мен Бодум хоорайны долгандыр турар оттуг хана боор мен – деп, Дээрги-Чаяакчы медеглеп тур. – Өндүр чырыымны ооң ортузунга көргүзер мен“».

Бурганның Бодунуң чонун кыйгырганы

⁶ «Эйт, эйт! Соңгу чүкте чурттан бээр дезип маңнажыңар! Силерни дээрниң дөрт хады-биле тарай шаапкан болгай мен – деп, Дээрги-Чаяакчы медеглээн. –

⁷ Эйт, Вавилонда чурттап турар Сионнуң чону, ол хоорайдан адырлып үнүңер».

⁸ Чүге дээрге Аг-шериглиг Дээрги-Чаяакчы силерни олчалап ап турган чоннарга хамаарыштыр (алдарлыг Бурган мени айбылап чоруткан соонда) мынча дээн: «Мээң чонумга дээп турар улус Мээң караамның огунга дээп турары ол-дур.

⁹ Мен оларже холумну анныр мен, олар ынчан боттарының кулдарының олчазы апаар». (Ынчан мени Аг-шериглиг Дээрги-Чаяакчының чорутканын билип аар силер.)

¹⁰ «Сион-кыс, ырлап, өөрүп-байырла! Мен чедип келгеш, силерниң араңарга чурттай бээр мен – деп, Дээрги-Чаяакчы медеглээн. –

¹¹ Ол хүн хөй чоннар Дээрги-Чаяакчы Меңээ каттыжып кээп, Мээң чонум апаар. Иерусалимниң чону, Мен силерниң араңарга чурттай бээр мен». (Ынчан мени силерже Аг-шериглиг Дээрги-Чаяакчының чорутканын билип аар силер.)

¹² Дээрги-Чаяакчы ыдыктыг чер-чуртка Иудеяны Бодунуң хувааглыг чери кылдыр ээлеп аар, Иерусалим катап база Ооң шилиттинген хоорайы боор.

¹³ Кижи амытан бүрүзү Дээрги-Чаяакчының мурнунга ыыды чиде берзин! Чүге дээрге Ол туруп келгеш, Бодунуң ыдыктыг чурттаар черинден кел чыдар-дыр.