Захария 13 - Ыдыктыг Библия

Арыглаашкын хүнү

¹ «Ол хүн Давидтиң салгалынга база Иерусалимниң чурттакчыларынга суг бажы аттыгып үнгеш, оларны бачыттан база бужар-багындан арыглап чуур.

² Ол хүн Мен чер кырындан дүрзү-бурганнарның аттарын узуткап кааптар мен, оон ыңай улус оларны сагынмас апаар – деп, Аг-шериглиг Дээрги-Чаяакчы медеглээн. – Ол ышкаш бо черден меге медээчилерни база буктарны ырадып кааптар мен.

³ А бир эвес кандыг-бир кижи өттүр билип медеглээрин уламчылаар болза, ооң төрээн ада-иези аңаа: „Дээрги-Чаяакчының адын тудуп, мегелеп турарың дээш, өлүр ужурлуг сен“ – дээш, ол кижи өттүр билип медеглеп турда, ону өттүр шанчып каар.

⁴ Ол хүн ындыг бүдүү билирлер боттарының медеглээн көстүүшкүннеринден ыядып човай бээр; олар улус мегелээри-биле Бурганның медээчизиниң селбегер бөдүүн хевин кетпес.

⁵ Оларның кайызы-даа: „Мен дээрге Бурганның медээчизи эвес мен, тараачын кижи мен, аныяамдан-на чер ажылы кылыр салым-чолдуг болган мен“ – дээр.

⁶ Улус оон: „А чүге сээң хөрээңде сорбулар бар чүвел?“ – деп айтырарга, ол кижи: „Ол балыгларны эш-өөрүмнүң бажыңынга алган мен“ – деп харыылаар».

Кадарчыны соп каан, кодан хой тарай берген

⁷ «Хылыш, Мээң томуйлаан кадарчымче, Мээң чоок кижимче халда! – деп, Аг-шериглиг Дээрги-Чаяакчы медеглээн. – Кадарчыны соп каарыңга, хойлар тарай маңнажы бээр! А хураганнарже Мен Бодумнуң холумну көдүрер мен.

⁸ Бүгү чурттуң чонунуң үштүң ийи кезии кырдырып аар, а үштүң бир кезии дириг артар – деп, Дээрги-Чаяакчы медеглээн. –

⁹ Чоннуң арткан кезиин отче киирер мен; оларны мөңгүн ышкаш эзилдирип, шылгаар мен, алдын ышкаш арыглаар мен. Олар Мээң адымны кыйгырып, Меңээ мөргүүрге, оларга харыылаар мен: „Бо Мээң чонум-дур“ – дээр мен. А олар: „Дээрги-Чаяакчы – бистиң Бурганывыс!“ – дээр».