Захария 12 - Ыдыктыг Библия

Иерусалимниң тиилелгези

¹ Өттүр билген медеглел. Дээрги-Чаяакчының израиль чон дугайында сөзү бо-дур. Дээрни херип чаткан, черниң үндезиннерин салган, кижини амы-тынныг кылып каан Дээрги-Чаяакчы мынча деп медеглээн:

² «Көрүңер, Мен Иерусалимни эзиртир дашка кылып каар мен, бүгү кожа чоннар эзирик улус дег кээп дүжер. Иерусалимни бүзээлеп турда, Иудеяның салым-чолу база ындыг болур.

³ Ол хүн чер-делегейниң бүгү чоннары Иерусалимге удур чыглып кээрге, Мен ону оларның шуптузунга угдунмас даш кылып каар мен. Иерусалимни көдүрер дээн бүгү чоннар кемдей бээр.

⁴ Ол хүн Мен дайынчы аът бүрүзүн аажок коргудуптар мен, ооң мунукчузунуң угаанын солуудадыптар мен – деп, Дээрги-Чаяакчы медеглээн. – Иудеяның чонунче кичээнгейлиг көөр мен, а өске чоннарның бүгү аъттарын согурартып каар мен.

⁵ Ынчан Иудеяның баштыңчылары сеткил-чүрээнде „Аг-шериглиг Дээрги-Чаяакчы оларның Бурганы болгаш, Иерусалимниң чурттакчылары күштүг-дүр“ деп бодаар.

⁶ Ол хүн Мен Иудеяның баштыңчыларын оттулар ыяш аразында оттуг суугу дег, моожалар аразында хып турар чырыткы дег кылып каар мен; олар чоок-кавызында – оң, солагай талазында чурттап турар бүгү чоннарны өрттендир чип кааптар. А Иерусалим бодунуң турган черинге катап база чурттакчы чоннуг апаар.

⁷ Дээрги-Чаяакчы баштай Иудеяның шериглеринге тиилелге хайырлаар – оон башка Давидтиң салгалының, Иерусалимниң чурттакчыларының алдары Иудеяның улузунуң алдарындан ажа бээр.

⁸ Ол хүн Дээрги-Чаяакчы Иерусалимниң чурттакчыларынга дозуг-камгалал болур, оларның аразында эң кошкак кижи ол үеде Давид хаан ышкаш апаар, а Давидтиң салгалы Бурган дег, чонну баштап чоруур Дээрги-Чаяакчының төлээзи дег апаар.

⁹ Ол хүн Мен Иерусалимче халдап турар бүгү чоннарны кыргып-хыдыырын бодаар мен».

Өттүр шанчып алганы кижи дээш кажыыдал

¹⁰ «А Давидтиң салгалын, Иерусалимниң чурттакчыларын ээ көрнүүчел болгаш Меңээ чаннып мөргүүр улус кылып каар мен. Олар өттүр шанчып алганы кижиже көөр, эр чаңгыс оолдуң ажыын ажааны дег, ооң ажыын ажып ыглап-сыктаар, дун оол дээш кажыыдааны дег, ол кижи дээш кажыыдаар.

¹¹ Ол хүн Иерусалимге, Мегиддон шынаазында Гадад-Риммон дээш ыы-сыы дег, канчаар-даа аажок улуг ыы-сыы болур.

¹² Чурттуң чону кажыыдап ыглаар – төрел бөлүк бүрүзү аңгы кажыыдап ыглаар: Давидтиң салгалының төрел бөлүү – бир аңгы, оларның херээжен улузу – бир аңгы; Нафанның салгалының төрел бөлүү – бир аңгы, оларның херээжен улузу – бир аңгы;

¹³ Левийниң салгалының төрел бөлүү – бир аңгы, оларның херээжен улузу – бир аңгы; Шимейниң төрел бөлүү – бир аңгы, оларның херээжен улузу – бир аңгы.

¹⁴ Арткан бүгү төрел бөлүктер база ындыг: төрел бөлүк бүрүзүнүң эр улузу – бир аңгы, оларның херээжен улузу – бир аңгы кажыыдап ыглаар».