Захария 1 - Ыдыктыг Библия

Дээрги-Чаяакчыже эглиринче кыйгырыг

¹ Дарий хаанның чагыргазының ийиги чылының сес айда Дээрги-Чаяакчы Аддонуң оглунуң оглу, Берехияның оглу Захарияга Бодунуң сөзүн ажыткан:

² «Дээрги-Чаяакчы силерниң ада-өгбеңерге дыка килеңнээн турган-дыр.

³ Ынчангаш бо чонга Аг-шериглиг Дээрги-Чаяакчының чугаалаан чүвезин дамчыт: Менче эглип келиңер, ынчан Мен база силерже эглип кээр мен.

⁴ Ада-өгбеңер дег болбаңар. Оларны Бурганның биеэде турган медээчилери кыйгырып, Аг-шериглиг Дээрги-Чаяакчының: „Бузуттуг оруктарыңардан база багай үүлгедиглериңерден ойталаңар“ – деп чугаалаан чүвезин дамчыдарга, олар Мени тооп дыңнаваан, Менче кичээнгей салбаан болгай – деп, Дээрги-Чаяакчы медеглээн. –

⁵ Ам ол ада-өгбеңер кайыл? Мээң медээчилерим-даа болза мөңге чурттаар деп бе?

⁶ А Мээң чалча-медээчилеримге айыткаан сөстерим ада-өгбеңер-биле боттанмаан чүве бе? Олар ынчан бачыттарын миннип: „Аг-шериглиг Дээрги-Чаяакчы биске хамаарыштыр, Боду канчаар доктаадып кааныл, ынчаар кылды – бистиң оруктарывыс болгаш үүлгедиглеривис ёзугаар кылды“ – дээн болгай».

Бирги көстүүшкүн: аъттар

⁷ Шеват дээр он бир айның чээрби дөртте, Дарийниң чагыргазының ийиги чылында Дээрги-Чаяакчы Аддонуң оглунуң оглу, Берехияның оглу Захария медээчиге Бодунуң сөзүн ажыткан.

⁸ Дүне када көстүүшкүн көрдүм: шилги аът мунган кижи көстүп келди. Ол кижи ыйгыл черде мирт ыяштар аразында турду, а ооң артында шилги, доруг болгаш ак чүзүннүг аъттар көзүлдү.

⁹ Мен: «Дээргим, бо чүү деп чүвел?» – деп айтырдым. Мээң-биле чугаалажып турган дээрниң төлээзи: «Мен сеңээ ол чүү деп чүвел дээрзин айтып берейн» – диди.

¹⁰ Мирт ыяштар аразында турар кижи: «Оларны Дээрги-Чаяакчы черни эргий кезип эртсин дээш чоруткан-дыр» – деп харыылады.

¹¹ Аъттыг улус мирт ыяштар аразында турган Дээрги-Чаяакчының төлээзинге: «Бис черни эргий кезээш келдивис, бүгү чер кыры оожум, амыр-тайбың-дыр» – диди.

¹² Дээрги-Чаяакчының төлээзи ынчан: «Аг-шериглиг Дээрги-Чаяакчы, Сен Иерусалимге база Иудеяның хоорайларынга кээргел көргүзеринден кажанга чедир ойталаар сен? Оларга ам чеден чыл килеңнеп тур сен» – дээн.

¹³ Дээрги-Чаяакчы мээң-биле чугаалажып турган Бодунуң төлээзинге ачы-буянныг, сагыш-сеткил оожургадыр сөстер-биле харыылады.

¹⁴ Ынчан мээң-биле чугаалажып турган дээрниң төлээзи меңээ мынча дээн: «Аг-шериглиг Дээрги-Чаяакчының чугаалаан чүвезин улуска медеглеп дамчыт: Мен Иерусалим дээш, Сион дээш кедергей хүннеп тур мен,

¹⁵ а амыр-шөлээн чурттап турар чоннарже кедергей хорадап тур мен. Израильчилерге килеңнээним шоолуг эвес турда, ол чоннар хора халдадырын күштелдирген-дир.

¹⁶ Ынчангаш Дээрги-Чаяакчының чугаалаан чүвези бо-дур: Мен Иерусалимче кээргээр сеткилдиг эглип келдим, аңаа Мээң өргээмни катап тудар. Иерусалимни катап база хемчээп, тудар.

¹⁷ Оон ыңай Аг-шериглиг Дээрги-Чаяакчының чугаалаан чүвезин улуска медеглеп, дамчыт: Мээң хоорайларымны катап база бай-байлак чык дола бээр, Дээрги-Чаяакчы Сионну катап база аргалаар, Иерусалим катап база Мээң шилиттинген хоорайым боор».

Ийиги көстүүшкүн: мыйыстар болгаш ус-дарганнар

¹⁸ Мен оон топтап көргеш, дөрт мыйысты эскерип кагдым.

¹⁹ Мээң-биле чугаалажып турган дээрниң төлээзинден: «Бо чүү боор?» – деп айтырдым. Ол: «Бо дээрге Иудея, Израиль болгаш Иерусалимниң чонун тарадыр үзүпкен күштер-дир» – деп харыылады.

²⁰ Ооң соонда Дээрги-Чаяакчы меңээ дөрт ус-дарган кижини көргүстү.

²¹ Мен: «Олар маңаа чүнү кылыр деп турары ол?» – деп айтырдым. Ол: «Дуу мыйыстар дээрге Иудеяның чонун кым-даа бажын көдүрүп шыдавас кылдыр тарадыр октапкан чоннар-дыр. Олар иудей черге удур мыйызын көдүрген боорга, ус-дарганнар оларны барып коргудуп, мыйыстарын дүжүр шаап кааптар» – деп харыылады.