Ыы-сыы 5 - Ыдыктыг Библия

Бешки ыы-сыы

¹ Дээрги-Чаяакчы, бода – бистиң-биле чүү болчук, бак атка киргенивис көр-ле, көр!

² Черивисти хары улус ээлеп алган, бажыңнарны өске улус чаза баскан.

³ Ачазы чок өскүстерге дөмей-дир бис, авалар-даа дулгуяк дег болу берген.

⁴ Суувусту-даа садып ижер, ыяжывыс дээш акша төлээр апардывыс.

⁵ Мойнувуста кадыг дөңгү кедирип каан, могап-түреп, амыр-дыш-даа көрбестээн бис.

⁶ Аъш-чем-не чедишсин дээш, Ассирия, Египеттен ачы-дуза дилээр-дир бис.

⁷ Ада-өгбе бачыт кылган – олар ам чок, а кем-буруузу дээш кеземче – бисте дүшкен.

⁸ Кулдар бисти чагырып тур; кадыг холдан бисти хостаар кижи чок-тур.

⁹ Ээн ховуга дээрбечиден айыылзынып, чем тып чиирде, амы-тынны артывыска каап чор бис.

¹⁰ Оя чип кээр от дег аштан кеживис-даа суугу ышкаш кыза берген.

¹¹ Дайзыннар Сионда, Иудея хоорайларында кыстарны, херээженнерни чазарлап тур.

¹² Дайзынның холу нояннарны азып каапкан, баштыңчыларны хүндүлевээн.

¹³ Чалыы эрлер дээрбе дажы долгап турар, элээдилер ыяш чүктеп, ууп чадаан.

¹⁴ Хоорайның улус чыглыр черлеринде ирейлер ам олурбастаан, чалыы эрлер ырлашпастаан.

¹⁵ Хөрек-чүрек өөрүшкүзү өжүп калган, хөглүг самнар ажыг-шүжүг ыызы болган.

¹⁶ Бажывыстан оваадай чайлып дүшкен, бачыттыг бис – бодувустуң шорувус-тур!

¹⁷ Ынчангаштың чүрээвис ам ыстап аараан, ынчангаштың караавыстың оду өшкен.

¹⁸ Ээнзирээн Сион даанда дилгилер ам димзенип тур.

¹⁹ А Сен, Дээрги-Чаяакчы, мөңгеде хааннаар сен, Сээң дүжүлгең салгал дамчып тендиш дивес.

²⁰ Таанда бисти шуут уттур сен бе, таанда бисти төнмес өйде каар сен бе?

²¹ Дээрги-Чаяакчы, Бодуңдува бисти ээлдир – эглип кээр бис, биеэде дег, чуртталгавыс чаартып көр.

²² Бистен шуут-ла ойталадың бе, биске удур килең-кылыың хемчээл чок бе?!