Ыы-сыы 4 - Ыдыктыг Библия

Дөрткү ыы-сыы

¹ Аа халак! Алдын өңү чайнавастаан, тулган алдын хугбайзырап, өскерилген! Кудумчу санай, белдир санай ыдык даштар төктү берген. ב (бет)

² Сионнуң чок дээн, алдын караан чая базар оолдарын кижи кылган, дойдан туткан савалар дег үнелеп тур. ג (гимел)

³ Бөрзектерин чемгерер дээш, шөө-бөрү-даа эмиин дөгээр, а мээң чонум хайыра чогу – ээн ховуда страус куш-ла. ד (далет)

⁴ Хензиг чаштың өгү, дылы кагып-суксааш, чыпшынышкан. Аъш-чем дилээн уругларга кым-даа, чүү-даа бербейн тур! ה (хе)

⁵ Пөктүр дойлап чораан улус кудумчулар кыдыын дургаар кырлып чыдар. Каас хеп кедип өскен улус даштын бокта чимзенип тур. ו (вав)

⁶ Содомнуң-даа кеземчезин мээң чонум кеземчези ажып турар: шак ол хоорай, кижи холу көңгүс дегбейн, карак чивеш дээр аразында буступ дүшкен. ז (зайин)

⁷ Чонум баштаан нояннар-даа хардан арыг, сүттен аккыр, мага-боду кораллдан каас, шырайы-даа сапфир ышкаш чордулар чоп. ח (хет)

⁸ А ам олар – арны-бажы хөө-кара, кудумчуга таныттынмас, мөчү-сөөкте херген кежи ыяш ышкаш кургап калган. ט (тет)

⁹ Хову-шөлдер куруглаарга, тыны үстүп, диригге-ле кадып калган, аштап өлген кижилерден хылыш-биле шаштырганнар кежиктиг-дир. י (йод)

¹⁰ Чонум ынчаар кырлып турда, буян-чолдуг иелер-даа ажы-төлүн пашка дүлүп, боттарынга аъш-чем кылып турганнар ийик. כ (каф)

¹¹ Дээрги-Чаяакчының килең-кылыы дендеп барды, килеңин Ол чажа каапты: Сионга Ол одун кыпсып, хоорайны өзээнге киир өрттедипти. ל (ламед)

¹² Иерусалим хаалгазындан өштүг дайзын кирип кээр деп, черде хааннар, делегейде чурттаан улус бодап безин чорааннар бе?! מ (мем)

¹³ А ол бүгүнүң дөзү кайдал? Хоорайга актыг улус ханын төккен бараалгакчылар бузудунда, медээчилер бачыдында. נ (нун)

¹⁴ Олар даштын, согурлар дег, тояап чорлар, ханга былчап, бужартадып алган боорга, хептеринге дээп болбас апарган-дыр. ס (самех)

¹⁵ «Орук чайлаңар, бужартааннар! Биске дегбейн, чоруңар!» – деп, оларже улус алгырып тур. «Тояап чоруур хейлерни! – деп, өске чоннар улузу сөглеп тур. – Моон соңгаар аравыска олар турбас». פ (пе)

¹⁶ Дээрги-Чаяакчы Боду-ла оларны тарай сывырыпкан, моон соңгаар оларже Ол ээ көрбес. Ынчангаш Ооң бараалгакчыларын-даа хүндүткээр, баштыңнарны-даа өршээр улус ам чок. ע (айин)

¹⁷ Дуза манаан караавыс-даа имистелип өштү. Камгалаар дээш, келбээн чонче доскуул кылыр суургалардан харап көрүп, шаанга киир манадывыс. צ (цаде)

¹⁸ Кудумчуже үнмезин дээш, дайзыннар каяа-даа бол бисти кедээн. Төнчүвүс ам чоокшулаан, назынывыс кызырылган, өлүр хүн-даа чедип келген. ק (коф)

¹⁹ Бисти кызап, сүрген улус дээрде ушкан эзирлерден дүрген болган. Олар бисти дагларга-даа чыпшыр чедип, ээн ховаа кедег кылып, дозуп турган. ר (реш)

²⁰ «Хаанывыска карактадып, өске чоннар аразынга чурттаар бис» – деп идегеп чораанывыс амывыстың тыныжы – Дээрги-Чаяакчының шилээн хааны какпага кирип, туттурган-дыр. ש (шин)

²¹ Уц дээр черде чурттай берген Эдом-кыс, амдыызында өөрүп-хөгле. Килең долган үлүг-дашка сеңээ чедер – шалдаңналдыр ужур ижип, эзириир сен. ת (тав)

²² Сион-кыс, кеземчеңниң төнчүзү кээр – сени Ол ам удавайн хостап салыр! А сени, Эдом-кыс, кем-бурууң дээш кезеткештиң, бачыттарың ажыдыптар.