Ыы-сыы 2 - Ыдыктыг Библия

Ийиги ыы-сыы

¹ Аа халак! Дээрги-Чаяакчы Сион-кысты килеңиниң булуду-биле бүргей каапты! Израильдиң өндүр каазын дээрден черже дүжүр октап, килеңиниң хүнү кээрге, дүжүлгезинден дүжүп кээп турган черин тоовайн, хая көрдү. ב (бет)

² Израильдиң хоорай-суур, турлагларын Дээрги-Чаяакчы кээргел чокка сыырыпты; Иудея шивээлерин килеңнээштиң, узуткады; күрүнени болгаш нояннарны ойтур октап, бужартатты. ג (гимел)

³ Килеңнээш, Ол Израильдиң мыйыстарын кезип каапты, дайзын кээрге, Израильди камгалавайн, оң холун чайладыпты, бүгүдени хуюктап чиир чалбыыш-отту Израильге Ол кыпсывытты. ד (далет)

⁴ Дайзын-даа дег, кадыг чазын холу-биле хере тыртты. Карак өөрткен бүгү чүүлдү, өжээтен дег, узуткады. Чалбыышталган килеңин Ол Сион-кыс өргээзинче чажа каапты. ה (хе)

⁵ Дээрги-Чаяакчы дайзын дег болу бергеш, Израильди сыырыпты, ооң хамык шивээлерин ажырыптып, ордуларын хоозуратты. Иудея черинге Ол ыы-сыыны, хомудалды нептеретти. ו (вав)

⁶ Садта үнген ыяш кескен кижи-даа дег, чыыш черин – өргээзин Ол узуткады. Сионга Ол байырлалдар, амыр-дыштың хүннерин-даа уттур кылдыр албадады; килеңнээштиң, хаанны-даа, Бурганның бараалгакчызын-даа тоовайн барды. ז (зайин)

⁷ Дээрги-Чаяакчы өргүл салыр черин тоовайн, ыдыктыг өргээзин хүлээведи. Ооң быжыг ханаларын дайзынның холдарынга киирип берди. Байырлалдың чыыжында дег, Дээргиниң өргээзинде алгы-кышкы дыңналып тур. ח (хет)

⁸ Сионнуң ханазын бузар деп, Дээрги-Чаяакчы бодап алган. Хананы Ооң холу хемчээп, үрегделден ойталаарын сагынмайн тур. Камгалал чалдары-даа, ханалар-даа буступ дүшкен, качыгдап тур. ט (тет)

⁹ Хаалгалар-даа кээп дүшкен, дээктерни Ол үреп-талаан. Хоорай хааны, нояннар-даа өске чоннар холунче кирген, ыдыктыг хоойлу база чок-тур! Медээчилеринге-даа Дээрги-Чаяакчыдан кээр ажыдыышкын үстүп-читкен. י (йод)

¹⁰ Баштарынче доозун-довурак чажып, качыгдал хевин кеткен Сионнуң баштыңнары ыыттаар сөс чок, черде орлар. Иерусалим кыстары-даа качыгдалдан бажын черже халайтылар. כ (каф)

¹¹ Карактарым чажы соглуп, согурардым, ийлей бердим. Кара баарым ажып, аараан. Мээң күжүр чонум буурап калган. Хоорайның шөлдеринде эмер чаштар, уруг-дарыг аштап өлүп чыдарын көр: ל (ламед)

¹² найысылал шөлдеринде балыг-бышкын улус дег, моорап турлар. Хөөкүйлер авазындан айтырып тур: «Аъш-чем биле суксун кайыл?» Иезиниң хойнунга-ла амы-тыны үстүп турлар. מ (мем)

¹³ Иерусалим-кыс, сени кымга дөмейлээйн, сеңээ чүнү чугаалаайн? Күжүр Сион-кыс, аргалаар дээш, сени кымга деңней көрейн? Балыың ханы – далай ышкаш – сени кым-на экиртирил?! נ (нун)

¹⁴ Медээчилериң сеңээ хей-ле меге, хоозун чүүлдер оштаан, салым-чолуң өскертир дээш, кем-бурууң ажытпааннар, меге-биле дуурайлап, сени будап каапканнар! ס (самех)

¹⁵ Чорумалдар дора көрүп, адыш часкап, Иерусалим-кысты шоодуп, бажын чайып, сыгырдылар: «Бүгү черниң таалалы, дээди каас дээр хоорай бо бе?» פ (пе)

¹⁶ Сенче хамык дайзыннарың өгү-дылын караңнатты. Азыг-дижин кыжырадып, сыгырдылар: «Ам-на ону сыырыптывыс! Күзеп-манаан хүнүвүске чедир чурттап, көрүп тур бис!» ע (айин)

¹⁷ Дээрги-Чаяакчы бодалдарын боттандырып, эткен сөзүн ээледи. Үе-дүпте аазаан сөзүн күүсетти: хайыра чок сени базып, өжээтенге шоот кылып, дайзыннарың мыйыстарын сүүрертипти. צ (цаде)

¹⁸ Дээргиге чүрек-хөңнүң ханызындан тейле-ле, о Сион-кыс! Дүн-хүн дивейн, дамырак дег, карааң чажы агып батсын, ботка дышты черле бербе, карактарың дыштандырба! ק (коф)

¹⁹ Дүннү өттүр, өйлеп-өйлеп, алгыр-кышкыр! Дээрги-Чаяакчы мурнун орта, суг-даа ышкаш, хөңнүң төп бер, кудумчулар белдиринде аштап өлүр чеде берген чаштарыңның амызы дээш, Аңаа тейлеп, холдарың сун! ר (реш)

²⁰ «Дээрги-Чаяакчы, топтап көр даан, өске кымны шак-ла мынчаар хинчектээн сен – эмзирип өстүрген уруг-дарыының эъдин ие чиптер кылдыр? Дээргиниң өргээзинге медээчизи-даа, бараалгакчызы-даа өлүр кылдыр? ש (шин)

²¹ Кудумчулар довураанда уруг-дарыг, кырганнар-даа чыткылаар-дыр; чалыы кыстар, оолдарымның тынын хылыш үзүп каан-дыр; оларны Сен килеңнээштиң, кээргел чокка узуткадың. ת (тав)

²² Коргуп чоруур дайзыннарымны, найырже дег, Дээрги-Чаяакчы чыып тур. Ооң килең хүнү чедип кээрге, камгалал ап, дириг үнер кижи чок-тур! Эмзирип өстүрген, азырап каан улузумну дайзыным кээп, узуткады».