Ыы-сыы 1 - Ыдыктыг Библия

Бирги ыы-сыы

¹ Аа халак! Аажок хөлдүг хоорай-даа ээнзирээн-дир. Көвей чоннар агайы ам дулгуяк дег. Чурттарның кадыны ам албадаткаш, ажыл кылыр үүлелиг! ב (бет)

² Дүнелерде ыглап орар – чаактары көк суг болган. Ынак чораан улустан ам аргалаптар кижи чок-тур. Өөрү шупту саттыныпкаш, өжээтеннер апарган-дыр. ג (гимел)

³ Албадаткан аар ажыл, айыыл-халап соон дарый Иудея дайзынның холундува кире берди, өске чоннар аразынга хоргадал-дыш тыппастады, истеп-сүрген улус ону кызап келгеш, тудуп алды. ד (далет)

⁴ Байырлап кээр улус читкен, Сионче баар оруктар ам муңгаргай-дыр, эжик-хаалга ээнзирээн. Бурганның бараалгакчылары човууртап тур, ыраажы кыстар шупту муңгак, хоорайның үүлези ажыг-берге! ה (хе)

⁵ Иерусалим дайзыннары тергиидеп тур, өштүглери өөрүп тур. Эңдерик хөй бачыды дээш, Дээрги-Чаяакчы ону качыгдатты. Дайзыннар ооң ажы-төлүн хары черже сүрүп бар чор. ו (вав)

⁶ Сион-кыс, өндүр каазың оңуп каап-тыр. Нояннарың одар тыппаан ивилерге дөмей-дирлер, сүргеннерниң мурнунда-ла шаа төнген илгип чорлар. ז (зайин)

⁷ Иерусалим түреп-човаан, улчуп-тояан хүннеринде; дайзынга чон алзыпканда; өмек болур кижи чокта, эрте шагдан эдилеп чораан эртине-байлаан сактып туру. Олче кайгаан дайзыннар, кошкаан көргеш, шоодуп турлар. ח (хет)

⁸ Медээжок аар бачыды дээш, Иерусалим бужартады. Шалдаң-дыр деп көрүп каапкаш, алдаржыдып чорааннар ам куду көрдү. А ол боду хая көрнүп, ыы-сыылыг човууртап тур. ט (тет)

⁹ Ооң хеви хирлиг турган – келир өйде чүү боорун бодаваан-дыр. Кончуу сүргей буступ дүштү – аргалаптар кижи ам чок. «Дээрги-Чаяакчы, хинчээмни көр – дайзыным дендеп барды!» י (йод)

¹⁰ Ооң бүгү эртине-байлаан дайзынның холу хунаан. Ыдык өргээ саза баскан өске чоннар улузун ол көрүп турар. «Ниитилелиңерге олар каттышпазын!» – деп хорудуң чоп, Дээрги-Чаяакчы! כ (каф)

¹¹ Өскелерден аъш-чем дилеп, хоорай чону човууртап тур. Деңгел кирер чемге орнап, эртинезин бээрлер-дир. «Дээрги-Чаяакчы, менче көрем, базындырып турарымны! ל (ламед)

¹² Эрткен-дүшкен чорумал чон, дилеп тур мен, эргилип кээп, көрүңер даан: өндүр килең хүнүнде Дээргимден кээр кеземчем дег, шак ол кончуг човалаң дег човалаң-даа турар деп бе?! מ (мем)

¹³ Ол сөөктеримче сиңниктир отту дээрден бадырды; буттарымга четки салгаш, дезе бээрин албадапты; күжүр мени аймааратты – хүнден хүнче күжүм калды. נ (нун)

¹⁴ Дээргиниң холу эптээн дарлал-дөңгү – бачыттарым – мойнум кызып, күчү-күжүм суларатты. Ооң мени хүлээткени холдар быжыг – ушта чүткүп шыдавас мен! ס (самех)

¹⁵ Улуг-шыырак эрлерни Ол менден үндүр сывырыпты; чалыы экерлерим узуткаар дээш, меңээ удур чыыш кылды: арыг кызы – Иудеяны арбайлаштыр соктап каапты. ע (айин)

¹⁶ Үргүлчү ыглаар ужурум ол; ийи караам суун иштим. Сорук-күжүм омакшыдар аргалакчы ырай берди. Дайзыннарның күжү дендеп, ажы-төлүм качыгдады». פ (пе)

¹⁷ Сион-кыс хей-ле холун сунган – аргалакчы тывылбады. Бүзээлээн бүгү дайзыннарга Израильди Дээрги-Чаяакчы тудуп беривитти. Иерусалимни олар үглеп келгеш, бужар херээженни дег аажылааннар. צ (цаде)

¹⁸ «Дээргиниң чөптүүн аарай! Ооң сөзүнге удурланып канчаарым ол! Бүгү чоннар, дыңнаңарам, хилинчээмни көрүңерем: хып дээн чалыы оглу-кызым дайзынга туттурдулар. ק (коф)

¹⁹ Таныштарым кыйгырган мен, олар мени мегелеп каан. Бурганның бараалгакчылары-даа, ак салдыг кырганнар-даа амыдыраар, шыдал кирер аъш-чем дилээш, хоорайга кырылдылар. ר (реш)

²⁰ Ырмазыраан менче көрем, Дээрги-Чаяакчы: ийлей бердим. Чүлдү-чүрээм чарлыр четти – Сеңээ аажок удурланып турган-дыр мен. Даштын хылыш ажы-төлдү кыргып-хыдаан, бажыңда – база-ла өлүм. ש (шин)

²¹ Дайзыннар-ла човуурумну дыңнап турар – аргалаптар кижи чок-тур. Айыыл-халап, аар-бергем Сенден дээрзин олар дыңнааш, өөрүп турлар. Ынчалза-даа айытканың хүннү „Кел!“ де – ынчан олар мен дег апаар! ת (тав)

²² Бачыттарым шуптузу дээш, кеземчең Меңээ онаарың дег, дайзыннарымны ынчаар кезет – хай-бачыды Сеңээ бүрүн көстү берзин! Чүге дээрге човуурум-даа үзүлбес-тир, чүрээм күжүр качыгдап тур!»