Ырлар 99 - Ыдыктыг Библия

Өөрүп четтириишкинниң мизмор-ыры.

¹ Бүгү чер-делегей, Дээрги-Чаяакчыны алгап ырла!

² Дээрги-Чаяакчыга өөрүшкүлүг мөгейиңер, Ооң мурнунче Ону алгап ырлап барыңар!

³ Дээрги-Чаяакчы – Бурган дээрзин билип алыңар, Ол бисти чаяап каан, Аңаа хамааржыр бис, Ооң чону болгаш Ооң коданының хойлары бис.

⁴ Ооң эжик-хаалгазынче – өөрүп четтирип, Ооң өргээзинче – алгап-мактап кириңер. Ону мактаңар, Ооң адын алгап-йөрээңер!

⁵ Дээрги-Чаяакчы ачылыг-дыр, Ооң энерели – кезээ шагда үстүп төнмес-тир; Ооң шынчы чоруу – салгалдан салгал дамчып артар.