Ырлар 98 - Ыдыктыг Библия

¹ Дээрги-Чаяакчы хааннап турар, бүгү чоннар сүрээдеп сирилезин! Ол херувимнер кырында саадаан-дыр; бүгү чер-делегей шимчеп сирилезин!

² Дээрги-Чаяакчы Сион дагга өндүр бедик, бүгү чоннарның кырында Ол өрү көдүрткен!

³ Сээң өндүр улуг болгаш сүрээденчиг адыңны олар алдаржытсын; ол ат ыдыктыг болгай.

⁴ Күчүлүг Хаан чөптүг чорукка ынак. Сен чөптүг чорукту доктаадып кагдың, шынчы чорукту Израильге эккеп бердиң.

⁵ Дээрги-Чаяакчыны – Бурганывысты алгап-мактаңар; Ооң буттарын салыр черинге мөгейиңер, ол чер ыдыктыг болгай!

⁶ Моисей биле Аарон Бурганның бараалгакчылары тургаш, Самуил Ооң адын кыйгырган улустуң бирээзи тургаш, Аңаа мөргүп, Ону кыйгырып турганнар, а Дээрги-Чаяакчы оларга харыылаан.

⁷ Дээрги-Чаяакчы булут чагы аразындан олар-биле чугаалашкан, а олар Ооң чагыгларын болгаш Ооң берген дүрүм-хоойлузун сагып турганнар.

⁸ Дээрги-Чаяакчы, Бурганывыс, Сен оларга харыыңны бердиң! Оларны өршээп шыдаар, үүлгедиглери дээш кезедир Бурган болдуң.

⁹ Дээрги-Чаяакчыны – Бурганывысты кымдан арттыр мактаңар, Ооң ыдыктыг даанга мөгейиңер, чүге дээрге Дээрги-Чаяакчы Бурганывыс ыдыктыг болгай.