Ырлар 97 - Ыдыктыг Библия

Мизмор-ыр.

¹ Дээрги-Чаяакчыга чаа ырдан ырлап бериңер; Ол кайгамчык чүүлдерни боттандырган болгай, Ооң ыдыктыг күчү-күштүг холу Аңаа тиилелгени эккелди.

² Дээрги-Чаяакчы Бодунуң тиилелгезин көргүстү, Бодунуң чөптүүн, өске чоннар көрүп турда, ажытты.

³ Ол Бодунуң израиль чонунга шынчызы биле энерелин бодап келди. Чер-делегейниң кайы-даа ужу-кыдыы Бурганывыстың тиилелгезин көрүп кагды.

⁴ Бүгү чер-делегей, Дээрги-Чаяакчыны алгап ырла, өөрүп-хөглеп, байырлап ырла!

⁵ Ырны чадаганга үдеп ойнавышаан, Дээрги-Чаяакчыны алгап ырлаңар!

⁶ Хаанывыс болур Дээрги-Чаяакчының мурнунга трубалар биле эдискилер этсип, өөрүп-байырлаңар!

⁷ Далай болгаш ону долган бүгү чүве, чер-делегей болгаш ында амыдыраан бүгү чүве шимээргеп доюлзун.

⁸ Хемнер адыштарын часказын; даглар хары угда өөрүп-байырлазын!

⁹ Олар Дээрги-Чаяакчының мурнунга өөрүп-байырлазын, чер-делегейни шиидер дээш, Ол кел чыдар болгай. Дээрги-Чаяакчы өртемчейни – чөптүү-биле, чоннарны – шынга дүүштүр шиидер.