Ырлар 96 - Ыдыктыг Библия

¹ Дээрги-Чаяакчы хааннап турар! Чер-делегей өөрүзүн, эңдерик ортулуктар хөглезин!

² Дээрги-Чаяакчыны сырый кара булут хүрээлеп турар; чөптүг чорук биле шын шииткел – Ооң дүжүлгезиниң үндезини.

³ Долгандыр турар дайзыннарны өрттендир чиртпишаан, Ооң мурнунда от хып бар чыдар.

⁴ Ооң чаңныктары өртемчейни чырыдар, чер-делегей ону көргеш, сүрээдеп сирилээр.

⁵ Даглар Дээрги-Чаяакчының мурнунга – бүгү чер-делегейниң Чагырыкчызының мурнунга – чук ышкаш эстип тур.

⁶ Дээрлер Ооң чөптүүн медээлеп тур, бүгү чоннар Ооң өндүр чырыын көрүп тур.

⁷ Дүрзү-бурганнарга мөгейген, хоозун дүрзүлер-биле мактанган бүгү улус бак атка кирер. Бүгү бурганнар, Аңаа мөгейиңер!

⁸ Сээң шиитпирлериңни дыңнааш, Сион өөрүп-байырлап тур, Иудеяның хоорай-суурлары өөрүп-хөглеп тур, Дээрги-Чаяакчы.

⁹ Сен бүгү чер-делегейниң кырында өрү көдүрткен-дир сен, бүгү бурганнардан бедий берген-дир сен, Дээрги-Чаяакчы.

¹⁰ Дээрги-Чаяакчыга ынак улус, бузутка хөңнүңер чок болуңар! Ол Бодунга бердинген улустуң амы-тынын камгалаар, оларны бак улустуң холундан адырар.

¹¹ Чөптүг-шынныг кижиге – чырык чырыыр, мөзүзү эки кижи – өөрүп-хөглээр.

¹² Чөптүг-шынныг улус, Дээрги-Чаяакчы дээш өөрүңер, Ооң ыдыктыг адын алдаржыдыңар!