Ырлар 94 - Ыдыктыг Библия

¹ Барып, Дээрги-Чаяакчыга өөрүшкүлүг ырлап берээл, камгалал бээр Хаявысты ыыткыр алгап ырлаал!

² Алдаржыдып ырлавышаан, Ооң мурнунга чеде берээл, ырларывыска Ону алгап ырлаал!

³ Дээрги-Чаяакчы дээрге өндүр улуг Бурган, бүгү бурганнарны чагырар өндүр улуг Хаан болгай.

⁴ Черниң ханызы-даа, дагларның баштары-даа Ооң холунда.

⁵ Далай-даа Ооңуу болур, ону Ол чаяаган, кургаг черни-даа Ооң холдары бодараткан.

⁶ Барып, Дээрги-Чаяакчының – бистиң Чаяакчывыстың мурнунга сөгүрүп, мөгейээли, дис кырынга олураалы.

⁷ Ол – бистиң Бурганывыс-тыр, а бис – Ооң коданында чон бис база Ооң карактааны хойлар бис. Бөгүн Бурганның мынча дээн үнүн дыңнап каан болзуңарза:

⁸ «Меривага дег, ол хүнде ээн кургаг ховуда Массага дег, чүректериңер дашталдырбаңар.

⁹ Ынчан аңаа силерниң ада-өгбеңер Мээң кылган ажыл-херектеримни көргеш-даа, Мени шенеп турган.

¹⁰ Дөртен чыл дургузунда ол улус Мээң хөңнүмге дээп кээрге: „Бо дээрге чүректери будалып чоруур, Мээң оруктарымны билип албаан чон-дур“ – дээш,

¹¹ килеңней берип: „Олар Мээң амыр-дыжым черинче кирбес“ – деп даңгыраглаан мен».