Ырлар 93 - Ыдыктыг Библия

¹ Өжээн негекчизи Бурган, Дээрги-Чаяакчы, өжээн негекчизи Бурган, чырып көстүп келем!

² Чер-делегейниң Шииткекчизи, туруп келем, улуургак улуска чогуур кеземчени онааштырып көрем.

³ Дээрги-Чаяакчы, чежеге дээр бузуттуг улус өөрүп-байырлаарыл, чежеге дээр?!

⁴ Олар бардам сөстер эдип, аажок турлар, бузут үүлгедикчилери шупту мактанып турлар;

⁵ Сээң чонуңну бастып турлар, Дээрги-Чаяакчы, Сээң өнчүң болур улусту дарлап турлар.

⁶ Дулгуяк херээженни база өскээртен келген кижини өлүрүп, өскүс-чавыс улусту чок кылып турлар.

⁷ «Дээрги-Чаяакчы көрбес-тир ийин, Израильдиң Бурганы билбес-тир ийин» – дижирлер-дир.

⁸ Чон аразында бүдүүлүк улус, угаан кириңер! Мелегей улус, кажан орталаныр силер?!

⁹ Бисти кулактыг кылып каан Бурган дыңнавас деп бе, карак чаяап берген Бурган көрбес деп бе?

^10-11 Чоннарны эдип-чазап турар Бурган оларга яла онааштырбас деп бе? Кижи амытанны билиглерге өөредип турар Дээрги-Чаяакчы улустуң бодалдарын билир, олар – хей-бус дээрзин билир!.

¹² Дээрги-Чаяакчы, Сээң эдип-чазап турарың, дүрүм-хоойлуңга өөредип турарың кижи амыр-чыргалдыг.

¹³ Бузуттуг хейге оңгар кастынгыжеге чедир, Сен ол кижиге айыыл-халап үезинде сагыш амыр боорун хайырлаар деп турар-дыр сен.

¹⁴ Дээрги-Чаяакчы Бодунуң чонундан ойталавас, Бодунуң өнчүзү болур улусту каапкаш барбас!

¹⁵ Шииткел база катап чөптүг чорукка үндезилеттинер, мөзүзү эки бүгү улус ону эдерер.

¹⁶ Кым мен дээш бак сагыштыг улуска удур туржурул? Кым меңээ болчуп, бузут үүлгедикчилеринге удур туржурул?

¹⁷ Дээрги-Чаяакчы меңээ дузалаваан болза, алдыы оранның шыпшыңынче бада бээр чыгыы турган мен.

¹⁸ «Будум тендиш деп тур!» – деп турган үемде, Сээң энерелиң меңээ чөленгииш бооп турду, Дээрги-Чаяакчы.

¹⁹ Ишти-хөңнүмде дүвүрел көвүдээн тудум, Сээң аргалалың сеткилимни сергедип чор.

²⁰ Дүрүм-хоойлуну ажыглап, улуска бак чүве кылып, оларны узуткап чоруур чагырыкчылар Сээң-биле чаңгыс эп-сеткилдиг болур бе?

²¹ Олар бөлүглешкеш, чөптүг-шынныг кижиже халдап, кем-буруу чок улусту өлүрүп шиидип турар-дыр.

²² Ынчалзажок Дээрги-Чаяакчы – мээң быжыг шивээм, Бурганым – мээң хоргадаар хаям.

²³ Ол бузуттугларга кем-буруузу дээш кеземче көргүзер, оларны багы дээш узуткап каар. Дээрги-Чаяакчы – Бурганывыс оларны чок кылып каар.