Ырлар 91 - Ыдыктыг Библия

¹ Амыр-дыш хүнүнде ырлаар мизмор-ыр.

² Дээрги-Чаяакчыны алгап-мактаары ачылыг-дыр; Дээди Өрүкү, Сээң адыңны алгап ырлаары эки-дир;

³ эртен – Сээң энерелиңни, кежээ – шынчы чорууңну медээлээри эки-дир;

⁴ чанзыга, чадаганга үдеткеш, Сеңээ ырлаары эки-дир!

⁵ Дээрги-Чаяакчы, Сээң ажыл-херээң мени өөртүп тур, Сээң холуңнуң боттандырган чүүлдери дээш, өөрүп ырлап тур мен.

⁶ Сээң ажыл-херээң өндүр улуг-дур, Дээрги-Чаяакчы; Сээң бодалдарың кайгамчык ханы-дыр!

⁷ Олар ындыг дээрзин чүгле мелегей кижи билбес, чүгле бүдүүлүк кижи угаазылап шыдавас.

⁸ Бузуттуг улус оът-сиген дег өзүп үнүп, бачыт үүлгедикчилери чечектелип турар-даа болза, кезээ мөңгеде узуткаттырар.

⁹ А Сен, Дээрги-Чаяакчы, кезээ мөңгеде бедидир көдүрткен сен.

¹⁰ Дайзыннарың бо-дур, Дээрги-Чаяакчы, олар кырлып тур, бачыт үүлгедикчилери шупту тарай шаптырып аар.

¹¹ Сен мээң күчү-күжүмнү, мөге-шыырак шарыныы дег, өстүрүп бердиң, мени чаа олива үзү-биле хүндүлеп чаап кагдың;

¹² дайзыннарым буураашкынын караам-биле көрүп кагдым, халдап келген өжээтеннерим аштырыышкынын кулаам-биле дыңнап кагдым.

¹³ Чөптүг-шынныг улус пальма ыяш дег чечектелир, Ливан сыннарында пөш дег бедип өзер.

¹⁴ Оларны Дээрги-Чаяакчының өргээзинде тарып каан, олар Бурганывыстың бажыңының мурнунга чечектелир.

¹⁵ Олар кырый бергеш-даа, чимизин бээр – быжыг, ногаан артып каар.

¹⁶ Ынчангаш мээң чалым-хаям болур Дээрги-Чаяакчы чөптүг дээрзин, Ында шын эвес чүве чок дээрзин олар медээлээр.