Ырлар 88 - Ыдыктыг Библия

1 Маскил-ыр. Зерах уктуг Эфанныы .

¹ Маскил-ыр. Зерах уктуг Эфанныы.

² Дээрги-Чаяакчы, Сээң энерелиңни мөңге шагда алгап ырлаар мен, Сээң шынчы чорууңну салгалдан салгал дамчып чугаа-сөзүм медээлээр.

³ Бадыткаар мен: энерелиң мөңгези-биле тургустунган, шынчы чорууң дээрлерде доктааттынган.

⁴ «Шилип алганым хаан-биле керээ чардым, Мээң чалчам Давидке:

⁵ „Үре-салгалыңны кезээ мөңгеде үстүп төнмес кылып каар мен, сээң дүжүлгеңни салгалдан салгал дамчып тургузар мен“ – деп даңгырагладым» – дээн сен. Сэла

⁶ Дээрги-Чаяакчы, Сээң кайгамчык ажыл-херектериңни дээрлер алдаржытсын, Сээң шынчы чорууңну ыдыктыг төлээлериңниң чыыжынга алгап-мактазын.

⁷ Дээрлерде Дээрги-Чаяакчы-биле эннежир кым барыл? Бурганның оолдарының аразында Дээрги-Чаяакчы-биле дөмейлежир кым барыл?

⁸ Бурганның ыдыктыг төлээлериниң өндүр улуг чыыжынга Ол аажок хүндүледир, Бурганны хүрээлээн бүгү амытаннар Оон коргар.

⁹ Аг-шериглиг Дээрги-Бурган-Чаяакчы! Сен дег күчүлүг өске кым барыл? Сээң шынчы чорууң Сени бүргей апкан-дыр!

¹⁰ Далайның калчаалыг килеңин чагырар сен: ооң чалгыглары көдүрлүрге, оожургадыр сен.

¹¹ Сен Рахавты, секти дег, чылча базып турдуң; улуг күжүң-биле дайзыннарыңны тарадыр сывырыптың.

¹² Дээрлер – Сээңии, чер база – Сээңии; өртемчейни, ону долган бүгү чүвени Сен бодараттың.

¹³ Сен соңгу болгаш мурнуу чүктү чаяадың; Фавор биле Эрмон даглар Сээң адың дээш өөрүшкүлүг ырлажып тур.

¹⁴ Сээң күчү-күжүң улуг – холуң дыңзыг, күштүг холуң бедидир көдүрүлген.

¹⁵ Чөптүг чорук биле шын шииткел – Сээң дүжүлгең үндезини; шынчы чорук биле энерел Сени медээлеп бар чыдар.

¹⁶ Бурганны өөрүшкүлүг алдаржыдып билир чон амыр-чыргалдыг. Дээрги-Чаяакчы, олар Сээң чырыткылыг шырай-арныңны көрүп чоруур.

¹⁷ Хүннү бадыр Сээң адың дээш өөрүүрлер-дир, Сээң чөптүүң-биле бедидир көдүртүрлер-дир.

¹⁸ Сен – улузуңнуң алдарлыг күжү сен; Сээң ээ көрнүүшкүнүң-биле күчү-күжүвүс бедидир көдүрткен-дир.

¹⁹ Бистиң камгалалывыс Дээрги-Чаяакчыдан кээр, бистиң хаанывыс – Израильдиң ыдыктыг Бурганының төлээлекчизи.

^20-21 Сеңээ бердинген кижиге ажыдыышкын кылып тура, кажан-бир шагда мынча дээн сен: «Мээң чалчам Давидти тып алдым, ону ыдыктыг олива үзү-биле чаап кагдым; ол мөге-шыырак кижиге дуза көргүстүм, чон аразындан шилиттинген кижини бедидир көдүрдүм.

²² Мээң холум ону кадагалаар, Мээң күчү-күжүм ону быжыктырар.

²³ Дайзын ону ажып-тиилеп шыдавас, кара сагыштыг кижи ону бастып шыдавас.

²⁴ Ооң мурнунга дайзыннарын чылча шавар мен, ону көрбес улусту узуткаар мен.

²⁵ Шынчым биле энерелим ооң-биле артып каар, Мээң адым ачызында ооң күчү-күжү немежир.

²⁶ Ооң холун далайга чедир, күштүг холун хемнерге чедир сундурар мен.

²⁷ Ол Мени: „Сен – мээң Ачам сен, Бурганым сен, мени камгалаар Хая сен“ – деп адаар.

²⁸ Мен ону дун оглум кылып аар мен, чер-делегейниң хааннарындан бедидир олуртур мен;

²⁹ Бодумнуң энерелимни аңаа кезээ мөңгеде көргүзер мен, ооң-биле чарган керээмге шынчы боор мен.

³⁰ Ооң үре-салгалы кезээ мөңгеде үстүп төнмес, ооң дүжүлгези, дээр туруп турда, тендиш дивес.

³¹ А ооң үре-салгалы Мээң хоойлумну үрээр болза, дүрүмнеримни сагывас болза,

³² Мээң чагыгларымны тоовас болза, айтыышкыннарымны күүсетпес болза,

³³ Мен оларны кемниг херектери дээш – шыкпыыш-биле, бачыттары дээш – кымчы-биле кезедир мен.

³⁴ Ынчалзажок энерелимни Давидтен дедир албас мен, шынчы чоруумну өскертпес мен.

³⁵ Чарган керээмни үревес мен, аксымдан үнген сөстеримден ойталавас мен.

³⁶ Мен Бодумнуң ыдыктыым-биле чаңгыс катап даңгыраглаан мен – Давидти мегелеп каар ужурум чок.

³⁷ Давидтиң үре-салгалы кезээ мөңгеде артар, ооң дүжүлгези, хүн дег, Мээң мурнумга чырыыр,

³⁸ ай дег, кезээ мөңгеде турар, а шынчы херечи – дээрлерде». Сэла

³⁹ А Сен ам Бодуңнуң шилип алган хааныңны кааптың, оон ойталадың, олче килеңней бердиң;

⁴⁰ Бодуңнуң чалчаң-биле чарган керээңни тоовайн бардың, чалчаңның оваадайын черже дүжүр октаптың;

⁴¹ ооң чурттаан хамык ханаларын үрегдеп, шивээлерин бузуп кааптың.

⁴² Чаны-биле эрткен-дүшкен улус дөгерези ону үптеп-тонап тур, кожаларынга ол кочу-шоот болду.

⁴³ Сен ооң дарлакчыларының күчү-күжүн өстүрдүң, ооң хамык дайзыннарын амыраттың.

⁴⁴ Ооң хылыжының чидиг бажын дайын-чаа үезинде дайзынга дыынмас кылып кагдың;

⁴⁵ ооң өндүр чайынын хунаагаш, дүжүлгезин черже дүжүр октаптың;

⁴⁶ ооң чалыы үезин кызыргаш, бак атка киирип кагдың. Сэла

⁴⁷ Дээрги-Чаяакчы, чежеге дээр чаштынар сен? Кезээ мөңгеде бе? Сээң килеңиң, от дег, чежеге дээр кыптыгарыл?

⁴⁸ Назыным аргажогун бодап көр. Кижи амытанны кандыг хоозун куруг чуртталга дээш чаяаган сен?

⁴⁹ Мөңгези-биле амыдырап, өлүм көрбес кижи бар бе? Алдыы орандан амы-тынын чайладып шыдаан кижи бар бе? Сэла

⁵⁰ Биеэги энерелиң кайыл, Дээрги? Давидке шынчы чорууң-биле даңгыраглааның бода!

⁵¹ Дээрги, Сээң чалчаларыңның бүгү күштүг чоннарга базындырып келгенин – ишти-хөңнүм саргыдып чоруур шак ол дарлаашкынны бодап келем;

⁵² Сээң дайзыннарыңның дора көрүүшкүнү кандыг ийик, Дээрги-Чаяакчы, Сээң шилип алган хааныңны кайы хире дорамчылаар ийик!

⁵³ Дээрги-Чаяакчыга кезээ мөңгеде алдар! Аминь, ындыг-ла болзунам!