Ырлар 83 - Ыдыктыг Библия

1 Хөгжүм башкарыкчызынга. Гиттит деп хөгжүм херексели үдээр . Корахтың оолдарыныы. Мизмор-ыр.

¹ Хөгжүм башкарыкчызынга. Гиттит деп хөгжүм херексели үдээр. Корахтың оолдарыныы. Мизмор-ыр.

² Аг-шериглиг Бурган, Сээң өргээ-майгыныңның сеткилге тааржырын!

³ Дээрги-Чаяакчының өргээзиниң мурнунче эрттиксээш, сеткилим хинчектени берди, бүгү бодум дириг Бурган дээш өөрүп, ырлап тур.

⁴ Бора-хөкпеш безин бодунга хоргадаар черни, хараачыгай-даа төлдерин чыттырар уяны Сээң өргүл бедигээштериңниң чанындан тып аар, Аг-шериглиг Дээрги-Чаяакчы, мээң Хааным болгаш Бурганым!

⁵ Сээң өргээңде турумчуп алган улус амыр-чыргалдыг! Олар Сени үргүлчү алгап-мактаар. Сэла

⁶ Сенден күш кирип ап турар, Сээң өргээңге чедер орук дугайында бодап турар улус амыр-чыргалдыг.

⁷ Олар Ыы-сыы шынаазы-биле эртип бар чыткаш, аңаа суг бажын ажыдыптар, чаъс ону ачы-буян-биле хөме аптар.

⁸ Олар улам-на күш кирер, Сионда бурганнарның Бурганы көстүп кээр.

⁹ Аг-шериглиг Дээрги-Бурган-Чаяакчы, мөргүлүмнү дыңна! Израильдиң Бурганы, кичээнгейиң сал! Сэла

¹⁰ О Бурган, дозуг-камгалалывыс, бээр көрнүп келем, Бодуңнуң шилип алган хааныңны деткип көрем!

¹¹ Сээң өргээңниң мурнунга эрттирген чаңгыс-ла хүн безин өске муң-даа хүнден дээре-дир. Бурганымның бажыңының эргининиң чанынга турары – бузуттуг улустуң өргээлеринге чурттаарындан дээре.

¹² Дээрги-Бурган-Чаяакчы – хүн-дүр, дозуг-камгалал-дыр, Ол ээ көрнүүшкүн биле алдарны хайырлаар; кем-буруу кылбас улуска ачы-буянын хайырлаарындан ойталавас.

¹³ Аг-шериглиг Дээрги-Чаяакчы, Сеңээ идегээр улус амыр-чыргалдыг!