Ырлар 81 - Ыдыктыг Библия

Мизмор-ыр. Асафтыы.

¹ Бурган хуралынга Бурган туруп келгеш, бурганнар аразынга шииткелин үндүрген:

² «Чежеге дээр чөптүг эвес шииткел үндүрер силер, бузуттуглар дээре кылдыр, улусту чежеге дээр ылгай көөр силер? Сэла

³ Ядыы, өскүс кижини шын шиидиңер, базындырган, түреңги кижиге чөптүг болуңар.

⁴ Ядыы-түреңги кижини камгалаңар, ону бузуттуглар холундан адырыңар».

⁵ Олар билбес-тир, угаап албаан-дыр, караңгыда чоруп турар-дыр; чер-делегейниң бүгү үндезиннери божаңайнып тур.

⁶ Мен: «Силер бурганнар-дыр силер, дөгереңер Дээди Өрүкүнүң төлдери-дир силер» – деп чугааладым.

⁷ Ындыг-даа болза, кижилер ышкаш өлүп каар силер, кандыг-даа ноян кижи ышкаш буураар силер.

⁸ Бурганым, чер-делегейни шын шиидип көрем – бүгү чоннар Сээң өнчүң болгай.