Ырлар 80 - Ыдыктыг Библия

1 Хөгжүм башкарыкчызынга. Гиттит деп хөгжүм херексели үдээр . Асафтыы.

¹ Хөгжүм башкарыкчызынга. Гиттит деп хөгжүм херексели үдээр. Асафтыы.

² Бистиң күжүвүс болур Бурганга өөрүп ырлаңар, Израильдиң Бурганын кый деп ырлаңар!

³ Өткүт ырдан бадырыңар, тимпандан соктаңар, эткир үннүг чадаган биле чанзыга ойнаңар.

⁴ Ай чаазында, он бештиң айында, байырлалывыс хүннеринде эдискиден этсиңер.

⁵ Иаковтуң Бурганы доктааткан, Израильге айыткан дүрүм-хоойлу ындыг болгай.

⁶ Бурган ону Иосифтиң салгалынга, Египетке удур үнүп тура, бадыткал кылдыр берген. (Ол черниң дылын дыңнааш-даа, билбес турган бис.)

⁷ «Мен чоннуң эгиннеринде чүъктү дүжүрдүм, ооң холдары аар ажылдан хосталы берди.

⁸ Кыстырып-кыйдыргаш, Мени кый дидиң – ынчан сени камгалап кагдым; диңмирээшкин дагжап турар булуттан сеңээ харыыладым, Мериваның суунуң чанынга сени шенеп турдум. Сэла

⁹ Мээң чонум, дыңна, Сеңээ удур херечилеп чугаалаар мен, о Израиль, Мени тооп дыңнаарың кай!

¹⁰ Сеңээ өске бурган турбазын, хары бурганга мөгейбес сен.

¹¹ Сени Египеттен үндүрүп эккелген Бурганың – Мен-дир мен, аксың ажыдывыт – Дээрги-Чаяакчы мен сени тоттуруп каайн.

¹² Ынчалзажок Мээң чонум Мээң үнүмнү тооп дыңнавады, Израиль Меңээ чагыртпады.

¹³ Ынчангаш Мен оларга хамаарыштыр: „Чөрүү улус боттары-ла билзин“ дээн мен – бодалдарынга чагыртып чораайлар аан.

¹⁴ О, чонум Мени тооп дыңнаан болза, Израиль Мээң оруумну истээн болза!

¹⁵ Мен ынчан ооң дайзыннарын базып, ооң дарлакчыларынче холумну көдүрер ийик мен.

¹⁶ Дээрги-Чаяакчыны көрбес улус Аңаа чашпаалаар апаар – кезээ мөңгеде ындыг болур.

¹⁷ А Израильди Мен эң чаагай далган-тараа-биле чемгерип, эң амданныг ары-чигири-биле тоттурар ийик мен».