Ырлар 71 - Ыдыктыг Библия

Соломоннуу .

¹ О, Бурган, хаанывыска – шынныг шииткелдериңни, хаанның оглунга – чөптүг чорууңну хайырлап көр.

² Ол Сээң чонуңну шынныы-биле, ядыы улузуңну чөптүү-биле шиитсин.

³ Чон дээш дагларга – чаагай чорук, тейлерге – чөптүг чорук боттанзын.

⁴ Хаан чон аразында ядыы улусту шын шиитсин, түреңги улусту камгалазын, дарлакчыны хай дизин.

⁵ Салгалдан салгал дамчый, хүн биле ай чырыдып-ла турар болза, улус Сенден коргуп чорзун.

⁶ Хаан, шөлче чагган чаъс дег, черни суггарган чаъс дамдылары дег, дүжүп келзин;

⁷ ооң чагырар үезинде, ай чырытпас апаргыже, чөптүг-шынныг кижиниң амыдыралы чечектелзин, амыр-тайбың элбекшип, доктаазын.

⁸ Ол ынчан бир далайдан өске далай чедир, Евфрат хемден чер-делегейниң ужу-кыдыынга чедир чагырзын;

⁹ ооң мурнунга ээн ховуларның чурттакчылары сөгүрүп, бараалгазын, дайзыннары довурак пактазын.

¹⁰ Фарсис деп чер биле ортулуктарның хааннары албан-үндүдүн аңаа эккелзин, Шева биле Севаның хааннары белектерин сунзун.

¹¹ Шупту хааннар аңаа мөгейзин, бүгү чоннар – бараан болзун.

¹² Ону кыйгырган ядыы кижини, болчур чүвези чок түреңги кижини хаан камгалаар;

¹³ ядыы-түреңги кижиге ээ-хайыралыг болур, эң түреңги улустуң амы-тынын камгалаар;

¹⁴ оларның амы-тынын дарлал биле күчүлелден адырар; оларның төккен ханы дээш, ооң сеткил-сагыжы муңгараар болгай.

¹⁵ Хаан үр чурттазын, улус аңаа Шевадан алдынны эккеп берзин, хаан дээш үргүлчү мөргүзүн, ону хүннүң-не алгап-йөрээзин;

¹⁶ ооң чуртунга, даглар бажынга тараа элбек болзун, дүжүт, Ливанга үнер дүжүт дег, эгээртинмес хөй болзун; хоорайларынга чурттаар улус, черден үнген оът-сиген дег, өзүп-көвүдезин.

¹⁷ Ооң ады, хүн-не хүннеп турар болза, кезээ мөңгеде артсын, ат-алдары салгалдан салгал дамчып артсын; ооң ачызында бүгү чоннар ачы-буянны алзын, олар ону амыр-чыргалдыг кижи деп адазын.

¹⁸ Дээрги-Чаяакчыга – Израильдиң Бурганынга алдар! Ол чааскаан кайгамчык чүүлдерни бодарадып турар.

¹⁹ Ооң алдарлыг ады кезээ мөңгеде алгадып-йөрээтсин, Ооң алдары бүгү чер-делегейни бүргезин. Аминь, ындыг-ла болзунам!

²⁰ Иессейниң оглу Давидтиң мөргүлдери мооң-биле төнген-дир.