Ырлар 7 - Ыдыктыг Библия

¹ Давидтиң Дээрги-Чаяакчыга ырлаан шиггайон-ыры. Вениаминниң аймаандан үнген Хустуң херээнге хамааржыр.

² Дээрги-Чаяакчы, Бурганым, Сенден хоргадалды ап чор мен, мени истеп-сүрген бүгү улустан адырып, камгалап көр,

³ оон башка олар, арзылаң дег, амы-тынымны үзүп каар, камгалаптар кым-даа чок боорга, үзерлеп кааптар.

⁴ Дээрги-Чаяакчы, Бурганым, үүлгеткен херээм бар болза, мээң холдарым кемниг херек кылган болза,

⁵ мээң-биле эп-найырал сеткип чораан кижиге бузут-биле харыылаан болзумза, (а мен чылдагаан чокка кыстыртып келгеним кижини безин камгалап чораан болгай мен),

⁶ дайзын мени истеп-сүргеш, чыпшыр четсин, амы-тынымны черже киир таптай бассын, ат-алдарымны довуракка борап каапсын. Сэла

⁷ Дээрги-Чаяакчы, килеңнээштиң, дүрген келем, дайзыннарымның калчаалыг өжүнге удур туруш, Сээң айтып-чагааның шииткелди мен дээш көдүрүп көр.

⁸ Чыылган чоннар Сени хүрээлеп кээр – оларның кырында бедикче көдүрүл.

⁹ Дээрги-Чаяакчы аймактарны шиидип турар. Меңээ шын шииткелден үндүрүп көр, чөптүүмнү, кем-буруу чогумну көрүп көр, Дээрги-Чаяакчы.

¹⁰ Бузуттугларның өжүнүң когу үзүлзүн, чөптүг-шынныг кижини быжыктыр – чөптүг Бурган болгай сен, улустуң чүректерин, ишти-хөңнүн шенээр-дир сен.

¹¹ Мөзүзү эки улусту камгалаар Бурган – мээң дозуг-камгалалым-дыр.

¹² Бурган – чөптүг шииткекчи, Ол хүннүң-не бузуттуг улусче күштүү-биле килеңнээр.

¹³ Кандыг-бир улус бачыттарындан ойталаваза, Бурган хылыжын чидидер, чазын хере тыртып, шыгаап кээр;

¹⁴ өлүм тарыыр чепсектерин белеткеп, өрттендир чиир согуннарны кылып аар.

¹⁵ Бузуду иштинде боттанган кижи өш-өжээн-биле иштелип, оп-меге божуп алган.

¹⁶ Ол ханы оңгарны каскаш, оозунче боду-ла кээп ушкан;

¹⁷ ооң өжү бодунуң бажынче кээп дүжер, ооң каржы-дошкуну бодунуң тейинче дедир бадып кээр.

¹⁸ Чөптүү дээш, Дээрги-Чаяакчыга өөрүп четтирип тур мен, Дээди Өрүкү Дээрги-Чаяакчының адын алгап ырлап тур мен.