Ырлар 6 - Ыдыктыг Библия

¹ Хөгжүм башкарыкчызынга. Шеминит деп аян-биле үдээр. Мизмор-ыр. Давидтии.

² Дээрги-Чаяакчы, килеңнээн хүнүңде мени сойгалава, кылыктанган хүнүңде мени кезетпе!

³ Дээрги-Чаяакчы, харыксырай бердим, ынчангаш менче ээ көрүн; Дээрги-Чаяакчы, ишти-хөңнүм дойлуп тур, ынчангаш мени экиртип каг.

⁴ Сеткилим аажок хөлзеп тур, чежеге дээр манадыр сен, Дээрги-Чаяакчы?!

⁵ Дээрги-Чаяакчы, эглип келгеш, мени камгала. Энерелдииң-биле мени адырып хоста.

⁶ Чевегге чыткаш, Сени бодаар кижи турбас; өлүглер оранынга Сени кым-даа мактавас.

⁷ Ыглап-сыктааш, могай бердим: дүнениң-не орун-дөжээм өл-шык болур, караам чажындан чыдыным шыгый бээр.

⁸ Шупту дайзыннарым балазындан карактарым шоозу өжүп, кударалдан карактарым соглуп тур.

⁹ Бузут үүлгедикчилери, шупту менден ырай бериңер, Дээрги-Чаяакчы мээң ыы-сыымны дыңнап каан-дыр.

¹⁰ Дээрги-Чаяакчы тейлээн сөзүм дыңнап каапкан – мөргүлүмнү Ол хүлээп алыр.

¹¹ Дайзыннарым дөгерези аажок дүвүреп, ады баксыразын, аткаарлап, кончуг дүрген бак атка кирзин.