Ырлар 57 - Ыдыктыг Библия

1 Хөгжүм башкарыкчызынга. «Узуткава» деп аялга үдээр . Давидтии. Миктам-ыр.

¹ Хөгжүм башкарыкчызынга. «Узуткава» деп аялга үдээр. Давидтии. Миктам-ыр.

² Кижи амытаннар, силерниң сөстериңерде чөптүг чорук ылап-ла дыңналып турар бе? Өске улусту тала тыртпайн шиидип турар силер бе?

³ Чүрээңерге-даа бузут-бакты шыгжап чоруур силер, чер кырынга холдарыңарны кемниг үүлгедиглер дола берген.

⁴ Бузуттуг улус төрүттүнгеш-ле, Бургандан ойталаан, хырын иштинден-не мегечилер бооп, соора барган.

^5-6 Оларның хораны чылан хораны дег. Олар – эң уран, илбилиг сөстер-биле магададыр сымыраачының үнүн тооп дыңнавас, кулаан кумнап алган дүлей кобра дег улус-тур.

⁷ Бурганым, оларның аастарында диштерин сый шаавыт; Дээрги-Чаяакчы, арзылаңнарның азыгларын тура шаавыт!

⁸ Олар, агым суг дег, арлып бада берзин, а Ол согуннары-биле ада бээрге, олар узуткадып алзын.

⁹ Чуура бастырган курт дег, олар кырлып калзын, херээжен кижиниң дүжүрген уруу дег, хүн чырыы көрбезин.

¹⁰ Силерниң сывыңарга теннер үнмээнде-ле, ол чечектелип турда-ла, шуурган ону, кадып калган чүвени-даа ышкаш, хадып аппарзын.

¹¹ Өжээн негээшкини көргеш, чөптүг-шынныг кижи өөрүүр: бодунуң буду-биле бузуттугнуң ханын сүзер.

¹² Улус ынчан: «Чөптүг-шынныг кижиниң алыр шаңналы бар-дыр, чер кырынга шииткел кылыр Бурган ылап бар-дыр» – деп чугаалаар.