Ырлар 51 - Ыдыктыг Библия

¹ Хөгжүм башкарыкчызынга. Маскил-ыр. Давидтии.

² Эдом чурттуг Доик Саулга чедип келгеш: «Давид Ахимелехтиң бажыңында турар» – деп медээлеп чугаалаан таварылгага хамаарылгалыг.

³ Эй, сен, маадыр, бузудуң-биле мактанып чооруң ол? Бурган энерелин хүннүң-не көргүзер!

⁴ Сээң аксы-дылың меңээ айыыл-халап белеткеп турар-дыр, сээң кара сагыштыг дылың чидиг хылыш дег-дир.

⁵ Буянга көөрде, бузутка ынак апарган-дыр сен, шынын чугаалаарынга көөрде, мегелеп чугаалаарынга ынак апарган-дыр сен. Сэла

⁶ Сээң нүгүлдүг аас-дылың өлүмнүг сөстерге ынак апарган-дыр.

⁷ Ол дээш Бурган сени кезээ мөңгеде узуткап каар, сегирип алгаш, оран-саваңдан үндүр октаптар, дазыл-дөзүңнү дириглер оранындан тура соп кааптар. Сэла

⁸ Чөптүг-шынныг улус ол бүгүнү көргеш, Бургандан коргары дам барып, ол кижини кочулап:

⁹ «Бурганны бодунуң камгалал-шивээзи кылып аарын күзевээн, а эңмежок эртине-байлаанга идегээн, бак күзээшкини-биле быжыгланган кижи бо-дур» – дээр.

¹⁰ А мен Бурганның өргээзинде ногаарарган ыяш дег мен, Бурганның энерелинге кезээ мөңгеде идегээр мен.

¹¹ Мени бодааш, кылган чүүлдериң дээш Сеңээ кезээ мөңгеде өөрүп четтирер мен, Сээң адыңга ынанмышаан, Сеңээ бердинген улус мурнунга ачы-буяныңны медээлээр мен.