Ырлар 44 - Ыдыктыг Библия

1 Хөгжүм башкарыкчызынга. «Лилия чечээ» деп аялга үдээр . Корахтың оолдарыныы. Маскил-ыр. Ынакшыл ырызы.

¹ Хөгжүм башкарыкчызынга. «Лилия чечээ» деп аялга үдээр. Корахтың оолдарыныы. Маскил-ыр. Ынакшыл ырызы.

² Чүрээмейден ачылыг сөс куттулуп тур: хаанга тураскааткан чогаалымны чугаалаар мен, дыл-домаам – мергежилдиг бижээчиниң демир-үжүү дег.

³ Кижи амытанда эң чаражы сен, чугаа-сөзүң кайгамчык каас, чечен, ынчангаш Бурган сеңээ ачы-буянны кезээ мөңгеде берген.

⁴ Мөге-шыырак хаан, хылыжыңны белиңге астып ал – ат-алдарың биле өндүр бедииңни көргүс.

⁵ Өндүр бедииңни көргүзүп, алыс шын, биче сеткил болгаш чөптүг чорукту камгалап, чуузага дүрген халдып олур – сээң холуң кайгамчык херектерни бүдүрзүн.

⁶ Хаан, сээң согуннарың баштары чидиг – дайзыннарыңның чүректеринче кадалы бээр – өске чоннар сээң буттарың адаанче кээп дүжер.

⁷ Бурган сени дүжүлгеге кезээ мөңгеде олуртуп каан, сээң чагыргаңның мергези – чөптүг чоруктуң демдээ-дир.

⁸ Сен чөптүг чорукка ынак, а бузутту көөр хөңнүң чок сен, ынчангаш Бурган – сээң Бурганың эш-өөрүң аразындан сени шилип ап, өөрүшкү-биле чаап кагды.

⁹ Сээң хептериң мирра, алоэ, кассия деп чаагай чыттыг чуктар-биле айдызаттынган; чаан сөөгү-биле каастаан ордуларга хөгжүм ойнап, сени хөгледип турар.

¹⁰ Даңгыналар – сээң хүндүлүг аалчыларың, хевин Офирден эккелген алдын-биле каастап каан кадын сээң оң талаңда турар.

¹¹ Мени дыңна, кызым, бээр көрнүп кел, кулааң менче ээктир: бодуңнуң чонуңну, ачаңның өг-бүлезин уттувут.

¹² Хаан сээң чараш-каазыңга хандыкшып, күзээр; ол – сээң дээргиң-дир, ынчангаш аңаа мөгей.

¹³ Тирниң чону, ооң эң бай улузу белээн сунуп чедип кээр: ээ көрнүүшкүнүңнү күзей бээр.

¹⁴ Даңгына душтуктуң бүгү чараш-каазы орду иштинче кире берген, ооң хевин алдын удазын-биле аргып, даараан.

¹⁵ Угулзалап каастаан хевин кедиргеш, ону хаанга чедире бээр, ооң соондан эштери кыстарны база эккээр.

¹⁶ Оларны өөрүшкү-маңнайлыг байдалга эккээрге, хаанның ордузунче кире бээрлер.

¹⁷ Хаан, ада-өгбеңниң орнунга дүжүлгеге оолдарың олуруп аар, оларны бүгү чер-делегейге чагырыкчылар кылдыр олуртуп каар сен.

¹⁸ Сээң адыңны улуска салгалдан салгал дамчып тураскаалдыг кылдыр кылып каар мен, ынчангаш сени бүгү чоннар кажан шагда, кезээ мөңгеде мактаар.