Ырлар 43 - Ыдыктыг Библия

¹ Хөгжүм башкарыкчызынга. Корахтың оолдарыныы. Маскил-ыр.

² Бурганывыс, кулаавыс-биле дыңнадывыс: ада-өгбевистиң чурттап чорааны эрте-бурунгу үелерде Сээң кылган ажыл-херээң дугайында олар биске дамчыдып чугаалааннар.

³ Бодуңнуң холуң-биле Сен бо черни чоннардан хунаагаш, ада-өгбевисти чурттадып каан сен; шак ол бүгү аймак-чоннарны чылча шапкаш, тарадыр сывыртапкан сен.

⁴ Ада-өгбевис бо черни чаалап ап турда, оларның хылыжы-даа ону кылбаан, күжү-даа тиилелгени оларга эккеп бербээн, а олар Сээң сеткилиңге кирер боорга, Сээң күчү-күжүң биле арын-шырайың чырыы тиилелгени чаалап берген.

⁵ Бурганым, Сен – Хааным сен! Израильге камгалалды хайырлаан сен!

⁶ Сээң ачыңда дайзыннарны өлүр үзүп кааптар бис, бисче халдаан улусту Сээң адың-биле таптай базып кааптар бис.

⁷ Ча-согунумга-даа идегевес мен, хылыжым-даа мени камгалавас.

⁸ Сен-не харын дайзыннардан бисти камгалаар сен, адаан-өжээн харааннарның адын баксырадыр сен.

⁹ Бурганны бис хүннү бадыр алгап-мактаар бис, Сээң адыңны кезээ мөңгеде алдаржыдар бис! Сэла

¹⁰ Ынчалзажок Сен ам бистен ойталадың, адывысты бакка суктуң, дайын-чааже аг-шериивис баштап үнместедиң.

¹¹ Дайзыннардан бисти дестирдиң, бисти көөр хөңнү чок улус үптеп-тонап турду.

¹² Хойларны дег, бисти чишке каап бердиң, өске чоннар аразынга тарадыптың.

¹³ Бодуңнуң чонуңну чиик өртекке садыптың, ону үнелиг деп санавадың.

¹⁴ Кожа чоннарга бисти кочулаарын чөпшээредиң, дескиндир чурттап турар улуска, дорамчылап, бак сөглезин дээш, бисти тудуп бериптиң.

¹⁵ Бисти өске чоннарга кочу-шоот кылып кагдың, өске аймактар улузу бисти көргеш, баштарын чайып, шоодуп тур.

¹⁶ Хүннү бадыр дорамчылатканым караамга көстүп, ыятканымдан арным кызып тур.

¹⁷ Дорамчылакчының, бастыкчының үнүнден, адаан негекчизиниң, дайзынның көрүжүнден арным кызып тур.

¹⁸ Ол бүгү бисти хөме алды. А бис Сени утпаан, Сээң берген чагыг-керээңге өскерилбээн ийик бис чоп!

¹⁹ Чүрээвис-даа дедирленип, Сенден ойталаваан, буттарывыс Сээң орууңну чандыр баспаан.

²⁰ А Сен бисти шөө-бөрүлер турар черге чылча баскаш, дүмбей караңгы-биле шуглап кагдың.

²¹ Бурганывыстан ойталааш, өске бурганга мөгейип, олче холдарывыс сунуп турган болзувусса,

²² Бурган чүге ону билип кагбас деп – чүректерниң чажыттары Аңаа ажык-ла болгай.

²³ Сени дээш хүннүң-не өлүм-биле удур-дедир көржүп тур бис, улус бисче, дөгерер дээн хойларже дег, көөр-дүр.

²⁴ Оттуп келем, чүге удуп чыдарың ол, Дээрги?! Кезээ шагда бистен ойталавайн, оттуп келем!

²⁵ Чүге бистен хая көрүндүң, түрегделге алыскан, базындырган бисти чүге уттуптуң?

²⁶ Сеткиливис довуракта таптай бастырган-дыр, ишти-хөңнүвүс черде соястаан-дыр.

²⁷ Дүрген келем, дузадан кат, энерелдииң-биле бисти айыыл-халаптан хоста.